JEREMIYA 1
1
1Buke ezi kwa hamena kweyi ga tente Jeremiya zaHilikiya, mupristeli gumwe gomositata saAnatoti mosirongo saMbenyameni. 2Hompa kwa uyungisire Jeremiya momumvho gomurongo nantatu gepangero lyaJosiya zaAmoni, hompa gwaJuda, 3age kwa mu uyungisire hena apa ga zire mouhompa Jehoyakimu zaJosiya. Kutunda opo, Hompa ta mu uyungisa yikando yoyinzi, dogoro komumvho gomurongo nagumwe gepangero lyaSedekiya zaJosiya. Mokwedi kwautano komvhura ozo, vantu womoJerusarema kwa va twere moupika.
Ezigido lyaJeremiya
4 Hompa ta tantere nge asi: 5“Ame kwa ku diva ame simpe kapi na ku ungire mo mezimo lyonyoko, kwa ku horowora ove simpe nokukuhampuruka si, o kare muporofete gonomuhoko.”
6Ame tani limburura asi: “Hompa Mupangeli, ame nokuvhura si kuuyunga; simpe ni munona unene.”
7Nye Hompa ta tantere nge asi: “Wa ha tanta asi simpe o munona unene, yeeyi nkenye oku ngani ku tuma, nyove kuza, hena nkenye eyi ngani ku tantera, yiyo ngo rugana. 8Nokuvatjira si, ame ponili poge, ngani ku popera. Ame Hompa nyame na yi uyunga!”
9Makura Hompa ta gonona kuwoko kwendi, a gume kokana kange, ta tanta asi: “Purakena, ame tani ku pe nonkango dange edi ngo uyunga. 10Naina tani ku pe nonkondo dokupangera nomuhoko noyirongo, o dure oku to koko, to zonagura oku to hanagura, to tungu oku to tapeke.”
Mamoneko gavali
11 Hompa ta pura nge asi: “Jeremiya, yinke eyi ono kumona?”
Ame tani limburura asi: “Mutayi gositji somandeli.”
12 Hompa ta tanta asi: “Ono hungike, ame kuna kutara asi nonkango dange di sike mo.”
13Makura Hompa ta tantere nge hena asi: “Yinke hena eyi ono kumona?”
Ame tani limburura asi: “Na mono kayiga kana kuvira koMuzogo kana tara koyiha eyi.”
14Age ta tantere nge asi: “Ehanauko ngali vilira navenye ava va kara mosirongo esi, li tundilire koMuzogo, 15morwa ame tani zigida nomuhoko nadinye dokoMuzogo di wize. Ohompa vado ngava tura yipundi yawo youhompa pomarungavero gaJerusarema nokukunduruka makuma gaso, hena ngadi kunduruka yitata peke yaJuda. 16Ame ngani futisa vantu vange morwa va zona; va zumba nge, yiyo vana kuzambera vakarunga peke, makura yiyo vana rugana vakarunga woyimpempa va va tongamene. 17Liwapaika, Jeremiya; zende o ka va sansekere nayinye eyi nani ku pangera asi yiyo no ka tanta. Wa ha va tjira apa ngesi, neisi ngani ku ninka o mengeserere moyipafi yawo. 18-19Purakena, Jeremiya! Nkenye ogu mosirongo esi — ohompa vaJuda, marenga, vapristeli novantu — ngava ku vyuka. Nye naina tani ku pe nonkondo dokuvadiinina po; ove ngo kara ngwendi sitata somakuma, ngwendi ngundi zosivera ndi ngwendi ekuma lyongoporo. Kapi ngava ku vhura, morwa ame ngani kara noge ni ku popere. Ame Hompa, nyame na yi uyunga.”
Currently Selected:
JEREMIYA 1: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
