JESAYA 59
59
Muporofete ta pangura nonzo dombunga
1Mwa ha gazara asi Hompa kapi ga paka nonkondo dokumukwafa, ndi asi sipurupuru a dire kuzuvha nkugo zeni zekwafo! 2Eyi a dilire kumuzuvha, morwanonzo deni. Nonzo deni yido da mu gusa ko kwaKarunga apa omu kambadara kumutongamena. 3One vanzoni moyimpempa nomoukorokotji nemedipago.
4One kuza kompanguro, nye kutupu youhunga kombinga zeni. One kwa huguvara moyimpempa mokupopera nonkango deni. One kusikisa mo magazaro geni, mu korese vapeke konomutjima. 5-6Yibofa yoyidona eyi omu rugana kwa fana mauta gomazoka gouhungu aga aga li vantu. Taura nye olyo euta, ezoka nali tunda mo! Nye yibofa yeni kapi ngayi mu wapeka — ayo kutupu sikwafa ngwendi sikoverero sonongodi dakauvi! 7Nkenye apa one kugazara yoyidona, one hena kapi omu kererere ko kuyirugana. One kugenderera kudipaga vantu va hana nzo. Nkenye apa muna vyuka kusiga po erunda nezonauko, 8kutupu ogu a yoworoka nsene nyone po. Nayinye eyi omu rugana, yeeyi ya dira kuhungama. One kukwama nzira zokupenga, nye nagumwe si a gendi nzira ozo asi nga yoworoke.
Vantu tava tongonona nzo zawo
9Vantu tava tanta asi: “Ntaantani tuna yi diva nye eyi ana kudilira kutuparura Hompa kwava ava tu hepeke. Ose kwa huguvara asi tu gende mouzera, nye nani mundema gwelike, 10makura yiyo tuna kupuputira ngwendi gaga asi masiku, ngwendi nyose ava tuna kara momundema mosirongo sovafe. 11Guna tu pwaga, ose hena kuna guvarara. Ose kuna diworoka asi Karunga a tu parure mo mweyi yoyidona, nye nomutompo si.
12“Hompa, mausima getu koge manzi. Nonzo detu kuna kutupa usima. Tuna di diva nadinye nawa‐nawa. 13Ose kwa katuka tu ku vyuke, tatu ku zumbu, tu nyoke kukukwama. Ose kwa hepeka vapeke, yiyo twa ku pa mugongo. Magazaro getu goyimpempa; nonkango detu kutupu usili. 14Uhungami wa tunda po, youhunga kapi hena yina kukara pepi. Usili kuna kupundauka pomarandero, ano youhunga kapi yina kumoneka po. 15Uhunga una pumbu, ano ogu ana kuhageka kurugana udona tava mu hakana.”
Hompa ta liwapaikire kuyoworora vantu vendi
Hompa ana yi mono eyi, makura yiyo yina dili kumuhafesa, morwa uhungami patupu. 16Age kwa tetukire pokumona asi, patupu nampili gumwe ogu ana kukwafa ava ava hepeke. Yipo nye nga ruganesa nonkondo damwene a va yoworore a funde. 17Age nga dwara uhungami ngwendi mbaikisa zosivera, ano efundo ngwendi embare lyosivera. Nga lidwareka mwene neharo lyenene lyokuwapeka yininke, ta futisa oku ta koneke mapuko omu ava hepere vantu. 18Age nga futisa nonkore dendi mokuliza neyi va rugana, navaava si va kara koyirongo yaure. 19Kutundilira koUpumezuva dogoro koUtokero navenye ngava mu tjira nononkondo dendi dononene. Age nga wiza ngwendi mukuro guna kupopomoka, ngwendi mpepo zondigu.
20 Hompa ta tantere mbunga zendi asi: “Ngani wiza koJerusarema ni ya mu popere, ni ya parure navenye ava muna kuzumba nonzo deni. 21Tani paka po egwanekero neni eli: na mu pe nonkondo dange nomarongo gange, ga kare geni narunye, kutunda apa ngesi limburukweni nge mu ronge vana veni nonontekuru deni, ngadi limburukwe nge nokomeho oko.”
Currently Selected:
JESAYA 59: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
