JESAYA 58
58
Ediliro lyosili
1 Hompa ta tanta asi: “Zigira unene paapa wa hulira! Tantera vantu vange Vaisraeli yokuhamena nonzo dawo! 2Awo kutongamena nge nkenye ezuva, tava tanta asi awo kuna kara nomupampi gokudiva nonzira dange nokulimburukwa konoveta dange. Awo kutanta asi kuna harere nge ni va pe ko noveta douhunga, makura va hafere kutongamena nge.”
3Vantu tava pura asi: “Yinke eyi natu dililira age Hompa ga hana kuyipakera mbili? Yinke eyi natu kerera nonzara age nombili si?”
Hompa ta va tantere asi: “Usili wowu asi posiruwo esi omu dilire, kupapara yaamweni, ano varugani veni tomu va hepekere mo. 4Ediliro lyeni kumupiyaganeka, tomu tangura oku tomu rwanangana. One kugazara asi, ediliro lyangesi li ninkise nge nye ni purakene makanderero geni ndi? 5Apa omu dilire, nyamweni tupu omu lihepeke; one kunyongeka unene nomutwe deni ngwendi mahako gowayi, tomu zara nonsako oku tomu kuwu enoto mu rare po. Olyo kweni one ediliro nye ndi?
6“Ediliro eli na hara ame lyeli: Guseni ko malyenge gehepeko nondjoko zouhasili, mu mangurure vanaruhepo. 7Omu pe ko wonzara nondya, tomu keveda momambo geni vanaruhepo ava va pira mambo. Omu pe ko yidwara ava va yi pira. Walye omu nyoka kukwafa vekoro lyeni.
8“Makura nkenda zange ntani ngazi mu temena ngwendi ezuva ngurangura, yironda yeni yi veruke mosikando. Ame ngani kara neni nkenye apa ni mu verure; ekaropo lyange ngali mu popera konombinga nadinye. 9Nsene ngo kanderera, tani ku limburura. Ngo zigida nge, tani yi tambura.
“Nsene ngo hageka ehepeko nankenye eswau nankenye kankango kokadona; 10nsene o gava nondya kwava wonzara, o wapeke ava vana hepa, makura ngano mundema ogu gwa ku kundurukida, ngagu lisitunuka uzera womutwekatji. 11Makura ame ngani ku gendese nkenye apa, tani ku kutike neyi yoyiwa. Ngani ku kondopeka, tani ku wapeke. Ove ngo fana sikunino esi ava tekere nawa, ngwendi runone romema oru rwa ha pwire. 12Mbunga zoge ngazi tungurura eyi ya zunguruka, va tungire hena komatateko ganare. Makura ngo diwikwe asi mbunga ezi azi wapukurura nonzugo edi da zunguruka.”
Mfuto zokudameka Esabata
13 Hompa ta tanta asi: “Nsene o pongora Esabata o dire kupapara yanyaamoge mezuva olyo; nsene o li tumbadeka ezuva lyange lyokupongoka, o li fumadeke pokudira kugenda ndi kurugana ndi kuuyunga ya hana mulyo mezuva olyo, 14ngano ngo gwanena po ehafo eli ali tundilire mokukerera nge. Ame ngani ku ninke o fumane mouzuni mudima, makura ngo pembure mosirongo esi na pere onyokokuru Jakopo. Ame Hompa, nyame na yi uyunga.”
Currently Selected:
JESAYA 58: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
