JESAYA 13
13
Karunga nga futisa Babironi
1Mbudi zokuhamena Babironi ezi ga gwene Jesaya zaAmosa kwaKarunga zezi:
2Zerureni erembe kondungu zondundu za hana yuma! Zigireni vakwayita mu rape vakwayita va ya rwise marungavero gositata esi sa litumba. 3Hompa kuna zigida vakwayita vendi ava va litumba wovaradi asi va rwe yita yokupongoka va futise ava ga handukira.
4Purakeneni ezogerero konondundu — nzogera zombunga zonene zovantu, nzogera zonomuhoko noyirongo yina pongo. Hompa gonombunga dovakwayita kuna kuwapaikira vakwayita vendi yita. 5Awo kuna kutundilira koyirongo yaure oku kwa ka hura uzuni. Hompa kuna kuwiza mehandu lyendi a ya hanagure sirongo mudima.
6Lireni unene! Ezuva lyaHompa pepi lina kara, ezuva eli nga reta Munankondo nadinye ehanauko. 7Mawoko ganavenye ngaga mya, ano uradi wanavenye ngau va pwa. 8Navenye ngagu va pwaga, taku va diinine po kukora, ngwendi kukora komukadi gokoruzega. Navenye ngava litara‐tara guna va pwaga, ano yipara yawo ngayi likisumuna konomuga. 9Ezuva lyaHompa tali wiza — ezuva olyo lyedona lyehandu lyendi lyedigu. Evhu ngali kara mapuku, ano vananzo navenye ngava hanauka po. 10Nkenye mbungururu, nankenye mbunga zonombungururu kapi ngazi tema, ezuva ngali sovagana pokupuma, ano kwedi kapi ngaku gava uzera.
11 Hompa ta tanta asi: “Ame ngani reta yihuna pevhu ni futise vadinikarunga navenye morwanonzo dawo. Ngani nunupika nkenye ogu a linenepeke, tani futisa nkenye ogu ga litumba goukorokotji. 12Ava va hupa po ngava pumba kupitakana ngorodo. 13Ame ngani ninka eguru li kankame, ano evhu ngali ligumagura li tunde pevega lyalyo mezuva olyo ngani likida ehandu lyange, ame Hompa Munankondo nadinye.
14“Vanayirongo ava va kara moBabironi ngava dukira koyirongo yawo, ngava lihana ngwendi yikorama yina kuduka vakongo, ndi ngwendi nonzwi dina pili musita. 15Nkenye ogu ngava kwata, ngava mu urura rufuro ta fu. 16Vana vawo ngava va myona, mambo gawo ngava ga bubagura, ano vakadi vawo tava va rara awo vene kuna kutara, neisi vana kutompora po.”
17 Hompa kuna kutanta asi: “Ame tani va sangumwine Vamede ngava rwise Babironi. Awo kapi ava pakere mbili sisiliveli ndi zi va hongorore ngorodo. 18Awo ngava dipaga vamati nomauta gonkanza. Awo kapi ngava fira nkenda vakeke ndi asi va zaverere vanona. 19Babironi sirongo sosiwa unene kupitakana nayinye; aso efumano lyovantu vamo. Nye ame Hompa ngani si hanagura po moomu na rugene oSodoma naGomora! 20Nagumwe si googu nga tunga mo hena. Muarabiya ogu a gendagura kapi nga tomeka mo tenta zendi, ano vasita nawo si kapi ngava lisira mo nonzwi dawo. 21Alyo ngali kara evega lyoyikorama yomowiza. Momambo gawo ngava zura mo vakakuru. Nompo ngadi kara mo, ano yinkisauka ngayi danena momarunda. 22Momaruhungu nomonombara mambungu novambanze ngava takuma mo. Siruwo saBabironi sina siki! Mazuva gendi gana pu po nye.”
Currently Selected:
JESAYA 13: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
