Hagayi 1
1
Mpangera zaHompa zokutungurura ntembeli
1Momumvho gwauvali gwahompa Daliusi gwaPeresiya, mezuva lyomuhowo lyokwedi kwautano‐nakumwe, Hompa ta uyungire momuporofete Hagayi. Mbudi ezi kwa hamene kwangoronera gwaJuda, Serubabeli zaSeyalitiyeli nokomupristeli gomunene, Josuwa zaJehosadaka.
2 Hompa Munankondo nadinye kwa tanterere Hagayi asi: “Vantu ava kuna kutanta asi: Esi kapisi yiso siruwo sosiwa sokutungurura ntembeli.” 3Hompa yipo nye ga gavere mbudi ezi kovantu zi gendere momuporofete Hagayi asi: 4“Vantu vange, yinke nye yokukerera one mononzugo va tunga nawa, azo ntembeli zange kuna zunguruka? 5Nye tomu yi mono eyi yina kumuhorokera ndi? 6One kwa kuna rukokotwa rorunzi, nye yiyo mwa zangura tungapi tupu. Mwa kara nonondya dokulya, nye kapi da gwana po di mu kutise. Mwa kara novhinyu zokunwa, nye kapi za ngwana po zi mu korwese! Mwa kara noyikoverero, nye kapi ya gwana po yi mu durure. Murugani kapi a gwana mo yokuvhura kumuparura. 7Tomu yi mono asi yinke yina kuhorokera eyi ndi? 8Ano ngesi zendeni konondundu mu ka rete nonkambo, mu ya tungurure ntembeli; makura ntani ngani zi hafera, ngani fumanene po.
9“One kuhuguvara muzangu gomunzi, nye ago tagu piruka gu kare mununu. Nomu reta muzangu gweni kembo, ame tani gu rerwire kwi. Yinke eyi ani yi ruganene oyo? Morwantembeli zange haza zungurukira, one nye nkenye ogu kuna kurugana nzugo zendi. 10Yiyo nye zina pilire mvhura yi pire ko yokumena. 11Ame kwa reta ruteni mosirongo — konondundu, momapya gorukokotwa, moyikunino yoyindjembere noyipata yomauzwe — kwankenye muzangu ogu agu zanguka mevhu, kovantu nokoyikorama, nakwankenye esi muna kukambadara kukuna.”
Vantu tava limburukwa kompangera zaHompa
12Makura Serubabeli naJosuwa novantu navenye ava va ka tengwire koupika koBabironiya, tava rugana eyi ga va tanterere Hompa asi va yi rugane. Awo kwa tjilire, makura tava limburukwa komuporofete Hagayi, ntumi zaHompa. 13Makura Hagayi ta gava mbudi zaHompa kovantu asi: “Ame ngani kara kumwe neni — eli yilyo etumbwidiro lyange.” 14Hompa ta pindura mpepo zanavenye, va rugane ntembeli. Serubabeli ngoronera ngwaJuda, nomupristeli gomunene novantu navenye ava va ka tengwire koupika. Tava tameke kurugana ntembeli zaHompa Munankondo nadinye, Karunga gwawo 15mezuva lyonomurongo mbali nagane mokwedi kwautano‐nakumwe komvhura zauvali zepangero lyaDaliusi.
Currently Selected:
Hagayi 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
