Vagaratiya 5

Emanguruko lyomukriste

1Kristusa kwa tu mangurura asi, tu manguruke sili. Koreni nye, walye omu lisigilire hena mu ze mondjoko zoupika.

2Tareni, ame Paurusa tani mu tantere asi, nsene mu lisigilira va mu rugane yovamba, Kristusa kutupu sikwafo kweni. 3Eyi tani yi mu pamperekedere unene asi, ogu nava rugana yovamba, nkenye eyi za tanta Veta a yi sikise mo ntani. 4One ava mwa hara asi zi mu hungameke Veta, kwaKristusa mwa tunda ko, yiyo mwa ligusa mo moufenkenda waKarunga! 5Ose ko nye kuna huguvara asi Karunga nga tu hungamekesa koMpepo ezi azi rugana mepuro lyetu. 6MwaKristusa, va ku rugane yovamba ndi va dire kuyikurugana, yiyo tupu, sosinene po epuro eli ali reta eharo.

7Nare ngomu rugana nawa! Yilye ogu ga mu nyokesa kulimburukwa kousili? 8Eyi kapisi asi Karunga ogu ga mu zigida yige ga yi rugana. 9“Yihahesogona kuhahesa yiduva mudima!” 10Ame kuna mu huguvarere mwaHompa asi, mwa ha kara nomagazaro nagopeke. Nye nkenye ogu ana kumupukisa, mpanguro zaKarunga ana kulikokera, nampili a kare asi yige yilye.

11Ano ame ko nye no, nsene asi simpe yovamba nina kuudisa, kuhepekera nge hena yinke? Makura eudiso lyange lyosilivindakano saKristusa ngano nokureta si udigu. 12Ani owo vana kumupiyaganeka ngoso, ngano tava lirutura vene!

13Vakwetu, one kwa mu zigidira emanguruko, nye kapisi emanguruko lyokusigilira madowo geni ga mu pangere, nani nye omu likwafa‐kwafe meharo. 14Yeeyi Veta mudima kwa zi pakerera mo mosipango esi asi, “O hare mukweni moomu wa lihara nyamoge.” 15Nsene mu lihumagura oku tomu lilyaalya, takameseni, mwa ha limana po!

Mpepo zaKarunga noyikara yopaunsitwe

16Ame kuna kutanta asi: omu sige Mpepo zaKarunga zi mu pitisire, mu dire kusikisa mo madawo gopaunsitwe. 17Madowo gorutu kwa lilimba noMpepo, ano Mpepo nazo kwa lilimba nomadowo gorutu. Eyi yivali kwa likwatera sikore, kuninka asi, eyi mwa hara kurugana, nokuvhura si hena kuyirugana. 18Ano nsene zi mu pitisira Mpepo, one nokukara si hena mepangero lyoVeta.

19Yirugana yorutu ya lihorora, ayo yiyo eyi: ruhonda norukehe rozanyi nokudira kukuhuka nokudira kukuruka, 20nokukerera vakarunga woyimpempa noumpure nounkore nonomutangu nesupa noumbudi nomaligaunuko motumbunga nomonombunga, 21nomfudu nounkorwe nomadipago noyipito yomakurulya, nayimwe hena yangoso. Tani mu rondora moomu na mu rondwere nare asi, ava ava rugana eyi, kapi ngava ka za moUntungi waKarunga.

22Nye yiyimwa yoMpepo, eharo nehafo nombili nezaverero nounongo nouwa noulimburukwi, 23nougomoki nelipangero. Eyi yangesi Veta kapi za yi silika. 24Ava va hama kwaJesus Kristusa, kwa pampara kosilivindakano yikara yawo yopaunsitwe, noruho nomadowo gawo nagenye. 25Nsene asi Mpepo za tu pa mwenyo gomupe, azi tu pitisire nye moukaro wetu. 26Walye atu papareni efumano lyoyimpempa ndi tu kare nousindidi ndi nomfudu.

Currently Selected:

Vagaratiya 5: KWN

Highlight

Copy