Exodus 34

Yitafura yivali yomamanya

(Deut 10:1-5)

1 Hompa ta tantere Mosesa asi: “Honga yitafura yivali yomamanya ngwendi yomuhowo. Makura ame ngani tjange po nonkango, edi da kere pweyi yomuhowo, eyi wa taura. 2Liwapaika, ngurangura nkumwe ngo ronde koNdundu zaSinayi, ngo ka gwanekere name komutwe gwazo. 3Nokupitura ko si gumwe, ndi asi pa moneke gumwe pondundu. Nonzwi nonongombe nado nokulya si pedi lyondundu.” 4Mosesa ta hongo hena yitafura yivali yomamanya ngwendi yomuhowo, makura ta meneka ngurangura zonene, a ronde koNdundu zaSinayi, moomu ga mu tanterere Hompa, makura ta simbi yitafura yomamanya nayinye yivali momawoko gendi.

5Ano Hompa makura ta mu hegumukire meremo, ta ya sikama pwendi. Age makura ta kugu edina lyaHompa. 6Hompa ta piti komeho zendi oku ta uyunga asi: “Hompa, Hompa, Karunga goMufenkenda, age Karunga gombili noMudidimiki. Uwa wendi unzi, age Mulimburukwi. 7Age kufira nkenda dogoro koruvharo romayovi, a dongonone po udona nomayipiko nononzo. Age kapi a tarerere nonzo, ga hana kudifutisa. Age kutondora ozinyakurwa kovana nokonontekuru kwava ngava kara ko vautatu nava vaune.”

8Mosesa makura ta genderere kunyongama, ta ligandere pevhu, 9ta tanta asi: “Hompa, nsene asi ono fire nge nkenda, Hompa ngano to gendi pokatji ketu, yeeyi mbunga ezi kwa runda mutwe, nye tu dongwenena po udona wetu nononzo detu, o tu tambure, tu kare upingwa woge.”

Malikwatakanununo

(Ex 23:14-19; Deut 7:1-5; 16:1-17)

10 Hompa ta tanta asi: “Tani paka po malikwatakano pwetu noge. Ngani rugana yononkondo, azo mbunga zoge nazinye kuna kutara. Yirugana oyo kapi ya kara ko rumwe konauzuni, ndi va yi rugane momuhoko gumwe. Vantu ava wa kara nawo, navenye ngava mona eyi a vhuru kurugana Hompa, yeeyi ame ngani ku ruganena sininke sosidigu. 11Ngo limburukwe koyipango, eyi nani ku pa naina. Ame ngani tjida Vaamoli noVaheti noVakanani noVaperesi noVahevhi noVajebusi. 12Eyi no diva po yeyi asi, nokukalizuka si mundiro novantu wokosirongo esi ono vyuka, ngano ehanauko ngayi ku retera. 13Eyi ngo ka rugana, yokukazungurura yizambero yawo, to ka hanagura mamanya gawo gokupongoka, oku to komangere yitji yawo yokupongoka.

14“Nokutongamena si karunga nagepeke, yeeyi asi edina lyaHompa yilyo ‘Esupa’. Ame nyame Karunga gesupa. 15Nokukalizuka si mundiro nava wosirongo oso, yeeyi apa ngava rugana ngwendi vahondedi, pokutongamena vakarunga vawo oku tava va zambere, neisi ngava ku zigida ko nove ngo ka lye kononzambo dawo. 16Kuvhura o guse vana vawo wovakadi va kware vana woge, ano owo vakadi awo ngava rugana ngwendi vahondedi pokutongamena vakarunga vawo, makura ngava hwedese vana woge, ngava dire kulimburukwa kwange, nawo ngava tongamene vakarunga vawo.

17“Nokuliruganena si vakarunga woyivera yokuhemuna.

18“Sipito soNomboroto da hana muhahu si kwata, moomu na yi ku pangera. Nomboroto da hana muhahu to di li mazuva gatano‐nagavali mokwedi kwaAbibu, yeeyi asi mokwedi oko, yimo wa tunda moEgipite.

19“Sinene mbeli zomuntu ndi zosikorama, zange. Sinene sosigara, nombeli nadinye donongombe nedi dononzwi dange. 20Nye mbeli zosindongili ngo zi futira to pinganesere mo nzwi, nsene o dira kusifutira, ntudi to zi teza nsingo. Sinene muna gomugara to mu futire.

“Nagumwe si gokuhoroka kwange ga hana nzambo.

21“To rugana mazuva gatano‐nalimwe, nye mezuva lyautano‐nauvali nokurugana si, nopokupurura‐purura nopokuteza‐teza si paapa.

22“Sipito soYivike naso ngasi kare po, Sipito soSipe sonombuto nesi soMuzangu gwenyango pehagero lyomumvho.

23“Rutatu momumvho vagara navenye tava horoka kwange, ame Hompa Karunga, Karunga gwaIsraeli. 24Apa ngani mana kutjida nomuhoko komeho zoge, yipo nye ngani babumuna sirongo soge, hena nagumwe si ogu nga pinga sirongo soge, moyiruwo yitatu momumvho eyi ngo ka horoka kosipara sange, ame Hompa Karunga goge.

25“Nokuruganesa si mboroto zomuhahu, pokuzambera nge nzambo zosimuna. Nyama zoposipito saPaska nokuzirangeka si.

26“O rete sipe sosiwa somomapya goge konzugo zaHompa.

“Nzwigona nokuziterekesa si komasini gazinyazo.”

27 Hompa ta tantere Mosesa asi: “Tjanga nonkango edi, yeeyi asi yido ngani dikisa malikwatakano getu noge noVaisraeli.” 28Mosesa kwa ka kere pwaHompa mazuva nomurongo ne nomasiku nomurongo ne, ga hana kulya ndi asi a nwe yuma. Hompa makura ta tjanga poyitafura nonkango domalikwatakano — yipango murongo.

Mosesa ta tundu koNdundu zaSinayi

29Mosesa, apa ga tundire koNdundu zaSinayi, age ana kara noyitafura yivali yoyipango, kapi ga divire asi sipara sendi tasi paima morwa kuuyunga naHompa. 30Arona nombunga nazinye, apa va mwene asi sipara sendi tasi paima, tava tjira kuheda pepi nendi. 31Mosesa ta va zigida, makura Arona novapristeli navenye wombunga tava wiza kwendi, ta va uyungisa. 32Eyi ya pwa eyi, makura mbunga nazinye zaIsraeli tazi zi pepi nendi. Mosesa makura ta va tantere nompangera nadinye, edi ga mu tanterere Hompa koNdundu zaSinayi. 33Mosesa, eyi ga mana kuuyunga nawo, makura ta kudumike sipara sendi newiwili. 34Mosesa, nsene ta hwilire moNkongoronzugo kosipara saHompa, ta likudumuna ewiwili dogoro noku ana kupwaga mo. Nsene ana pwaga mo, a wize kombunga zaIsraeli, makura ta zi tantere nayinye, eyi vana ka mu tantera asi a yi uyunge. 35Nava mona sipara sendi tasi paima, makura Mosesa ta likudumike hena ewiwili kosipara sendi dogoro ezuva eli nga za, a ka uyunge naHompa.

Currently Selected:

Exodus 34: KWN

Highlight

Copy