Exodus 33

Ekatuko poNdundu zaSinayi

1 Hompa kwa tanterere Mosesa asi: “Tunda po pevega eli kumwe nombunga, ezi wa gusa moEgipite. Zendeni kosirongo esi na tumbwidilire oAbirahamu naIsaka naJakopo, apa na va tanterere asi: ‘Sirongo esi ngani si gava koruvharo rweni.’ 2Ame ngani tuma muengeli komeho zeni. Ame ngani tjida mo Vakanani noVaheti noVaperesi noVajebusi. 3One kuna kuza kosirongo sosiwa sevhu lyewa. Nye ame kapi nani za neni, yeeyi one vantu wokurunda nomutwe, neisi nani mu manena sikatji.”

4Vantu eyi va zuvha mbudi ezi zondona, makura tava tende mo va lire, nagumwe si hena ogu ga dwere maurenga gokulimbagura. 5Hompa ta tantere hena Mosesa asi: “Tantera mbunga zaIsraeli asi: ‘One vantu wokurunda nomutwe. Ngano asi nyame nina kuza neni, nampili karuwogona tupu, ngano tani mu hanagura po nu. Ntaantani lihutureni eyi mwa litjapera, makura ame ni dive nye omu nani mu rugana.’ ” 6Kutunda opo poNdundu zaHoreba, mbunga zaIsraeli kapi hena ngazi dwara maurenga gazo.

Nkongoronzugo zoMagwanekerero

7Mosesa nga ninki ngesi, Nkongoronzugo ta ka zi litulira zelike, zi kare ure nokamba. Age nga zi tumbura asi “Nkongoronzugo zokupongera.” Nkenye ogu ana hara kupura yuma kwaHompa, ta zi koNkongoronzugo zokupongera. 8Mosesa, nsene ta zi koNkongoronzugo, vantu navenye tava sikama. Nkenye ogu ta sikama pevero lyotenta zendi, a tarere Mosesa dogoro kooku na ka hwilira moNkongoronzugo. 9Mosesa, nsene ana hwilire moNkongoronzugo, ngundi zeremo lyesovagani tazi hegumuka, makura tazi kara pevero lyoNkongoronzugo, makura Hompa ta uyungisa Mosesa, age meremo. 10Vantu navenye, nsene vana mono ngundi zeremo pevero lyoNkongoronzugo, makura tava sikama. Nkenye ogu ta ligandere pevero lyotenta zendi. 11Makura Hompa ta uyunga naMosesa, awo kuna litara, moomu tupu ava uyunga vantu namukwawo. Na ninka Mosesa ta tengura kokamba. Nye munona gwendi, ogu ga kere mukareli gwendi, Josuwa zaNunu, kapi nga tundu po poNkongoronzugo.

Etumbwidiro lyekaropo lyaHompa

12Mosesa ta tantere Hompa asi: “Hawe yosili eyi ono tantere nge asi ni tware ava vantu kosirongo, nye simpe kapi ono tantere nge ogu natu za nendi. Ove kuna kutanta hena asi: ‘Ame na ku diva na ku hafera.’ 13Ano nsene asi ove kwa hafera nge, tani hundire, o tantere nge, eyi wa panga, ni ku divire po, ame ngani ku hafese ngorooro nokomeho. Diworoka hena asi ogu muhoko, mbunga zoge.”

14 Hompa ta mu tantere asi: “Ame ngani za noge, ngani ku fundisa.”

15Mosesa ta mu tantere asi: “Nsene kapi ono kuza nose, wa ha tu rekera, tu tunde po apa. 16Nani omu ngava diva vantu asi wa hara mbunga zoge, name wa hara nge, ngapi nye, nsene kapi ono kuza nose? Nsene o za nose, vantu woge name yipo ngatu lisigira novantu navenye vepevhu.”

17 Hompa ta tantere Mosesa asi: “Ngani yi rugana, moomu ono tanta, yeeyi ame kwa ku hafera, ame hena na ku diva nawa‐nawa.”

18Makura Mosesa ta ninki asi: “Na kanderere, ninka nge, ni mone uyerere woge.”

19 Hompa ta limburura asi: “Ngani ninka uwa wange naunye u pite komeho zoge, ame hena ngani divisa edina lyange, Hompa, komeho zoge. Ngani fira nkenda, tani zaverere ogu na hara.” 20Hompa ta twikire ko hena asi: “Ove nokuwapa si o mone sipara sange, yeeyi kutupu ogu a mono nge, nye a paruke.” 21Hompa ta tanta asi: “Tara evega lyeli poyiha yange apa, o sikame pemanya. 22Nsene uyerere wange tau piti po, nani ku tura mekero lyemanya, nkumwe ni ku kudumike nokuwoko kwange dogoro noku nani pita po. 23Makura ntani nye nani gusa ko kuwoko kwange, o mone mugongo gwange, nye kapisi o mone sipara sange.”

Currently Selected:

Exodus 33: KWN

Highlight

Copy