ESITERA 8
8
Vajuda tava tengwida kuwoko nkore zawo
1Ano mezuva tupu lyoolyo, hompa Serekesesi makura ta gava komumbanda Esitera maugawo nagenye aga ga kere gaHamani, nkore zoVajuda. Esitera kwa tanterere hompa omu va likere naMoredekayi. Kutunda nye opo, Moredekayi kwa mu pulisilire kusika kosipara sahompa. 2Hompa kwa gusire kalinga nosinongweneso sendi (eyi ya kere kwaHamani), makura ta yi gava kwaMoredekayi. Esitera kwa gavere kwaMoredekayi ugawo naunye ou wa kere kwaHamani u kare mosinka sendi.
3Esitera kwa tanterere hena hompa, age ana ligandere konompadi dendi oku ta lili, ta mu likwambere asi a rugane po yuma yokuhagekesa udona waHamani, gekoro lyaAgage wokuvyuka Vajuda. 4Hompa ta zerwire Esitera mburo zendi zosiuhompa, makura Esitera ta sikama ta tanta asi: 5“Nsene yi ku wapera ove hompa o pakere nge mbili, nye o yi tare yina zire mo, rukusi nina kwata, divisa nompangera daHamana zaHamedata gezimo lyaAgage, va ha di sikisa mo edi ga divisire asi va hanagure po Vajuda navenye ava va kara mosirongo. 6Ame ngapi omu ngani vhura kulididimikira ezonaguro olyo nsene ngali gwana mbunga zange va dipage po ekoro lyange nalinye?”
7Hompa Serekesesi ta tantere mumbanda Esitera noMujuda Moredekayi asi: “Tareni, ame nina mangerere Hamani, morwaehandu lyendi lyokuhanagura po Vajuda navenye. Ame nina gava ugawo wendi naunye kwaEsitera. 8Nye tjangeni mu divise medina lyange, one mu tambe ko sinongweneso souhompa esi asi dili kurunduruka. One kuvhura tupu kutjangera Vajuda nkenye tupu eyi muna hara. One kuvhura mu tjange medina lyange nokutamba ko nosinongweneso sosiuhompa.”
9Eyi yangesi, kwa horokere po mezuva lyonomurongo mbali nantatu lyokwedi kwautatu, kuninka asi kwedi Sivani. Moredekayi makura ta zigida vahamutjanga vahompa, va tjangere Vajuda novapangeli woyigaununorongo nomarenga goyirongo nayinye 127, kutunda koIndiya dogoro koSudani. Nombilivhe kwa di tjangere nkenye ezi meraka lyosirongo sawo. Ano Vajuda meraka lyawo pankedi ezi ava tjanga. 10Moredekayi kwa tjangesesere nombilivhe medina lyahompa Serekesesi, makura ta tamba ko sinongweneso sosiuhompa. Nombilivhe kwa di tumine novarondi wononkambe nava wononsino nonongameru.
11Nombilivhe edi kwa fatwilire asi hompa ana gava epulisiro koVajuda mwankenye sitata asi va pange vene mokuligamena. Nsene tadi va vyuka nonkore dawo mwankenye muhoko mosirongo, awo kuvhura va tengwide kuwoko nonkore odo, va hanagure po vakadi vawo novana vawo. Va va dipage dogoro komuntu gokuhulilira, awo va guse po maugawo gawo. 12Etokoro eli ngali rugana mosirongo nasinye saPeresiya mezuva eli va tura po asi yilyo lyokudipaga Vajuda, ano mezuva lyautatu lyokwedi komurongo nauvali kwaAdara. 13Eyi kwa yi divisire ngoveta, yi divikwe kwankenye ogu mosirongo. Vajuda kwa liwapaikire va ligamene, nsene ezuva olyo ngali sika mo. 14Pampangera zahompa, varondi tava kutire nonkambe dombara, makura tava rondo va genderere usimbu. Mbudi kwa zi divisire kwanavenye hena moSusa, sitata sepangero.
15Moredekayi ta tundu mo mombara, age kuna dwara yikoverero youhompa yosineguru neyi yoyizera nerwakani lyegeha lyolina zene‐zene nonkata zongorodo zosiuhompa. Ano nonzira daSusa kwa hafere unene, oku tava likugilire. 16Vajuda vamo kwa hafere tadi zi mo, morwa kulizuvha unerago medina lyefundo. 17Mwankenye sitata nosirongo, omu lya sikire ediviso lyahompa, Vajuda kwa ninkire epwizumuko lyosipito sehafo. Vantu wovanzi kwa ninkire va kare Vajuda, yeeyi opo ngoso awo kwa tjilire Vajuda.
Currently Selected:
ESITERA 8: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003