ESITERA 9
9
Vajuda tava hanagura po nonkore dawo
1Ezuva lyomurongo nagatatu lyaAdara nalyo tali siki mo nye, ezuva lyokusikisa mo ediviso lyahompa, ezuva eli da huguvarere nonkore doVajuda asi di va funde. Nye mevega lyehuguvaro lyawo lyangesi, Vajuda tava dimbi ekandanga, vana fundu. 2Mwankenye sitata somosirongo omu va kere Vajuda, Vajuda kwa liwapaikire va rwise nkenye ogu ga kambadarere kuvaretera simpagwa. Mosirongo nasinye vantu kwa tjilire Vajuda, nagumwe si ga va lipepekerere. 3Ano marenga nagenye novapangeli woyirongogaununo novakarelipo vahompa mosirongo, kwa kwafere Vajuda, yeeyi navenye kwa tjilire Moredekayi. 4Mosirongo nasinye kwa divire asi Moredekayi ntaantani ana kara muntu gononkondo mombara. Ano nonkondo dendi ngadi nenepa narunye. 5Vajuda kwa ruganene nkenye eyi va here nonkore dawo. Awo kwa tjida‐tjidire nonkore dawo nonomfuro oku tava di dipaga.
6MoSusa mwene, mositata sepangero, Vajuda kwa dipagere mo vantu mafere gatano. 7-10Ano mokatji kawo kwa kere mo vana wovagara vaHamani zaHamedata, nkore zoVajuda ava: Parasandata naDalifoni naAsipata naPorata naAdaliya naAlidata naParamasita naAlisayi naAlidayi naVayisata. Nye kapi va kwatere mamona gawo.
11Ano mezuva tupu lyoolyo sivaro sava va dipagere moSusa tava si divisa kwahompa. 12Hompa ta tantere mumbanda Esitera asi: “Vajuda vana dipaga vantu mafere gatano moSusa mwelike, rambangako novana wovagara vaHamani. Moyigaununorongo yikwawo yinke nkare va rugane mo? Yinke hena eyi ono hara? To yi gwana tupu. Tantera nge tupu eyi ono hara hena, to yi gwana.”
13Mumbanda Esitera ta limburura hompa asi: “Nsene yi ku wapera ove hompa, pulisira Vajuda womoSusa hena mungura ngava rugane eyi vana va pulisire asi va yi rugane naina. Gava mpangera asi, yimpu yovana wovagara vaHamani, va yi zenzereke koyitji.” 14Hompa makura ta gava mpangera va yi rugane eyi. Ano ediviso kwa li tjangere moSusa. Yimpu yovana wovagara vaHamani kwa yi zenzerekere koyitji. 15Ano mezuva lyomurongo nagane lyokwedi kwaAdara Vajuda womoSusa tava lipongaike hena, makura tava dipaga vantu womositata wokupita pomafere gatatu. Nye napaapa, kapi va gusire yuma yomougawo wawo.
16Ano Vajuda womoyigaununorongo yikwawo nawo kwa liwapaikire va ligamene vene. Awo kwa lipoperere kononkore dawo, makura tava dipaga vantu ava va va nyenga mayovhi nomurongo ntano‐nambali nomayovhi gatano. Nye napaapa kapi va gusire yuma yomougawo wawo. 17Eyi kwa yi rugene mezuva lyomurongo nagatatu lyokwedi kwaAdara. Ano eyi lina si ko, mezuva lyomurongo nagane, kapi kwa kere hena madipago. Awo kwa li ninkire ezuva lyosipito lyehafo. 18Vajuda womoSusa, kwa pangere ezuva lyomurongo nagatano li kare ezuva lyepwizumuko, kutunda apa va dipagere nonkore dawo mezuva lyomurongo nagatatu neli lyomurongo nagane, makura tava hageke mezuva lyomurongo nagatano. 19Ano Vajuda ava va tunga moyitata yoyinunu, ezuva eli lyomurongo nagane lyokwedi kwaAdara kwa li ninka li kare ezuva lyepwizumuko lyehafo nosiruwo sosipito sokulipaapa uhwi wonondya.
Sipito saPulimu
20Moredekayi kwa tjangere yihoroka eyi, makura ta tumu nombilivhe koVajuda navenye, ava va kere pepi nokoure mosirongo nasinye saPeresiya, 21ta va tantere asi ava diworoke ezuva lyomurongo nagane neli lyomurongo nagatano gaAdara asi mazuva gepwizumuko nkenye mvhura. 22Aga yigo mazuva va lipoperere Vajuda kononkore dawo. Oku yiko kwedi komalisinto goruveze roruhodi, pu horoke ruveze rwehafo lyokufa nokutara. Awo kwa va tanterere va diworoke narunye mazuva aga nokudana yipito nokuhafa pamwe motumbunga, va lipaape uhwi wonondya nokugava hena konohepere. 23Ano Vajuda kwa kwama marongo gaMoredekayi, makura edano lyosipito yiyo lya kara sipito sopampo sankenye mvhura.
24Hamani zaHamedata gezimo lyaAgage nonkore zoVajuda kwa ninkire fungu‐fungu (ezi ava tumbura asi “Purim”) va ture po ezuva lyokuhanagura po Vajuda. Age kwa tokwere kuvakomba po nu. 25Mumbanda Esitera ta zi kwahompa, makura hompa ta gava nompangera dokutjanga edi da dipagesere Hamani, morwaegazaro lyendi lyokudipagesa Vajuda — age kwa mu zenzerekere koyitji kumwe novana vendi wovagara. 26Yiyo nye ava tumbwire ezuva eli lyepwizumuko Pulimu, morwambilivhe zaMoredekayi neyi nayinye ya va horokerere. 27Vajuda kwa litulilire po vene veta kumwe nomazimo gawo nankenye ogu nga kara Mujuda, asi nkenye mvhura mazuva aga gavali va hepa kugadiworoka narunye posiruwo sosiwa pamarongo gaMoredekayi. 28Ano nkenye epata lyoMujuda lyorudi rokomeho mwankenye sigaununorongo nositata, va hepa kudiworoka mazuva gaPulimu nokomeho oko.
29Ano mumbanda Esitera zaAbihaili kumwe naMoredekayi tava tjanga hena mbilivhe zekoreko lyononkondo lyokuhamena Pulimu ezi ga tjangere nare Moredekayi. 30Mbilivhe kwa zi tanterere Vajuda navenye. Ano nombilivhe nonkwawo tava di tumu koyirongogaununo nayinye 127 yomosirongo saPeresiya. Eyi kwa kererere po mbili neyoworoko lyoVajuda, 31yi va pitisire noruvharo rwawo ngaru diworoke mazuva gaPulimu posiruwo sosiwa, nawa‐nawa moomu va tura po nompangera dokudilira noyiruwo yononkali. Eyi yiyo va uyungire navenye vavali, Moredekayi nomumbanda Esitera. 32Ano ekoreko lyaEsitera lyokuhamena konompangera doPulimu kwa di tjanga mobuke zegango.
© Egwanekerobibeli Lyanamibia 1987, 2003
© Bible Society of Namibia 1987, 2003