MUUDISI 12
12
1Diworoka musiti goge momazuva goge goudinkantu, ago mazuva gomadona nonomvhura simpe kapi dina wiza, apa ngo uyunga asi: “Kapi yina wapera nge.” 2Siruwo oso paapa ngau ku sovaganena uzera wezuva nou wokwedi nou wonombungururu. Ano momaremo namo kapi ngamu tunda mvhura. 3Mawoko goge aga aga ku gamene, ngaga kankama. Ano ga kare maguru goge aga gana nkondopa ntaantani, ngaga pira nonkondo. Mazego goge kapi ngaga tompora mokutakina nondya doge, ano ga kare meho goge ngaga uvira, kapi ngaga twisa mokutara nawa‐nawa. 4Matwi goge ngaga limbandera komazogerero gomonzira. Ove ngo zuvha ko noudigu mukumo apa ngava twa moyini ndi marusumo apa ngava ga dimba. Ano rusumo rosidira yiro ngaru ku pindura monompofu. 5Ove ngo tjira mavega gopondundu nonongenda doge ngadi kara dosimpagwa. Nohuki doge ngadi lisitunuka dononzera, kapi ngo vhura kulikokera ko nyamoge, ano maharo goge nagenye ngaga haga po.
Ose kevega lyetu lyokuhulilira lyepwizimuko tuna vyuka, oku ngaku kara nonkali monzira. 6Elyenge lyosisiliveli ngali ndembuka, ano ramba zongorodo ngazi gwa tazi tavauka; ngodi zepetope ngazi ndembuka, ano kavaza komema ngaka haragana po. 7Marutu getu ngaga tengwira kombundu zevhu, ano nomwenyo detu nado ngadi tengwira kwaKarunga ogu ga di tu pere.
8Kutupu sikwafa, kutupu sikwafa yimo ana kuuyunga Munaunongo. Nayinye kutupu sikwafa.
Ekwaterokumwe
9Nye morwa Munaunongo kwa kere munongo, yipo nye nga kovekedere kuronga vantu eyi ga divire. Age nga konakona yisewe nokuheteka nawa‐nawa usili wayo. 10Muudisi nga kambadara kugwana nonkango dehengagwido, nye nonkango edi ga tjanga kwa kere dousili. 11Nonkango dovanongo kwa fana ngwendi nompango doutwe edi ava ruganesa vasita wononzwi mokupitisira komeho nonzwi. Ano yisewe eyi na pongaika ngwendi nomboha edi adi karerere va pampara nawa di kore. Ado kwa di gava Karunga ogu Musita gwetu natuvenye.
12Munwange, koyili yininke yimwe yokuhepa kunomena. Kutjanga nobuke, kapi aku haga, ano kulironga unene kurorwera mo rutu.
13Konyima zeyi nayinye, simwe tupu selike sokuhepa kuuyunga asi: Tjira Karunga, ove o limburukwe koyipango yendi, yeeyi yangesi, yiyo va mu ungira muntu. 14Karunga nga pangura nayinye eyi atu rugana, nsene yoyiwa ndi yoyidona, rambangako neyi atu rugana mehoramo.
Currently Selected:
MUUDISI 12: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
