Yirugana Yovapositoli 28
28
Paurusa mosirudi saMalita
1Nange twa ka kaurukire, ntani tuna kuzuvha asi edina lyoso sirudi yiso Malita. 2Vantu vamo kwa tu haferere unene. Awo kwa hwamekere mundiro, tava tu zigidire ko, morwa mvhura kwa rokere, azo hena mufu. 3Paurusa makura ta tjavagura yitare, a ture pomundiro. Emupili tali pwaga mo koupyu li mu kakinyine kokuwoko. 4Vantu wopo posirudi apa va mwene emupili kuna kumuzenzerera, tava litantere asi: “Ogu mugara nsene a panga murudipagavantu, karunga gwendi kapi na mu parura, mpili age ngomu ana paruka mefuta.” 5Nye Paurusa ta zupwire ezoka pediko, age ko mwene nokaponga si ga mwene. 6Awo tava tarere asi Paurusa mpamwe na dunda ndi asi a vatuke tupu a fe. Va rorokere kutarera tu, neisi yina kuhoroka po, tava rundurura egazaro lyawo va tante asi: “Age karunga!”
7Ano foromani zoso sirudi gedina Pubeliusi, farama zendi pepi nolyo evega za kere. Age kwa tu tambwire, makura ta tu tekura momuwa mazuva gatatu. 8GuhyaPubeliusi age kuna kuvera yikunkira nezimo lyokupwaga‐pwaga. Paurusa makura ta hwilire a ze monzugo zendi. Ga mene kukanderera, ta mu kambeke mawoko, makura ta mu verura. 9Kutunda opo vaveli navenye woposirudi makura tava wiza, makura tava ya veruka. 10Awo kwa tu fumadekere unene, twa ninka asi tatu zi, tava tu rongerere nayinye eyi twa hepere.
Paurusa ta siki moRoma
11Konyima zomakwedi gatatu, makura tatu zi mosikepa sokoArekisandeliya esi sa rumbire kufu hakufu mosirudi oso. Aso edina lyaso ‘Vakarunga womapange’. 12Ose tatu siki nye mositata saSirakuse, tatu kara mo mazuva gatatu. 13Twa tunda opo tatu gendi tu ya sike koRegiumu. Ano eyi lya sire ko, mpepo zokorwaMuzogo‐zogo tazi pinduka. Mezuva lyauvali makura tatu ka sika koPuteoli, 14oku twa ka gwene vakriste vakwetetu ava va tu ninkire asi tu kare pwawo mazuva gatano‐nagavali. Makura ntani tuna ka sika koRoma. 15Vakriste vakwetetu womo, ava va zuvhire eyi ya tu horokera, tava tundu ko va tu simbagwire dogoro komarandesero gaApiusi nokoNohotera‐ntatu. Ano Paurusa apa ga va mwene, ta pandura Karunga, mutjima gwendi tagu zi mo nye.
Paurusa moRoma
16Apa twa sikire moRoma, Paurusa kwa mu pulisilire a kare mwamwene nomukwayita gwendi gokumutakamesa.
17Pwa pita mazuva gatatu, makura Paurusa ta zigida Vajuda womakuto womo va ponge, ta va tantere asi: “Vakwetu, ame nampili ngomu na dira kurugana yuma komuhoko gwetu ndi konkareso zozinyakurwetu, va gusa nge moJerusarema ame ni nkwate, va gave nge koVaroma. 18Awo apa va purwilire nge, kwa here kusiga nge, morwa kapi va gwene mo mwange yuma yokudipagesa nge. 19Nye apa va tangwisire nge Vajuda, nomu si nkare ni rugane, kutara kwahompa gwaRoma makura. Nye kapisi noyuma na kara, ni pe muhoko gwange nzo. 20Yiyo nye nina mu zigidire, ame ni ya mu sansekere ko, yeeyi ehuguvaro lyaIsraeli yilyo lina paka nge momalyenge aga.” 21Awo tava mu tantere asi: “Ose simpe kapi twa mona nombilive deyi yombinga zoge yokutunda koJudeya. Ano novakriste vakwetetu si ava va wiza oku nawo si kapi va ku sanseka ndi asi va uyunge yuma yoyidona yokukuhamena. 22Nye ose kuna hara tu zuvhe eyi ono kugazara, yeeyi ose kombinga zosimpangu esi wa hamena twa yi diva asi nkenye oku kusipatana.”
23Makura tava lizuvhu nendi ezuva, ano wovanzi ko nye tava wiza moomo monzugo ga kara. Paurusa ta va fwatwire oku ta va sansekere yoUntungi waKarunga. Kwa gusire ngurangura dogoro ngurova a va tundilire koVeta zaMosesa nokovaporofete asi va pure Jesus. 24Vamwe va pulire eyi ga tente, nye ava vamwe nokupura si. 25Ano apa va dilire kulizuvha vene navene, makura tava lihana apa ga mene Paurusa kuuyunga nkango ezi asi: “Mpepo zoKupongoka uhunga za uyungilire oguhyetu mokana komuporofete Jesaya 26asi,
‘Zende kogu muhoko o ka tante asi:
Kuzuvha ngomu zuvha,
nye kuyikwata egano ndangone!
Ano kutara ngomu tara,
nye moneni ko, hawe, tumbu!
27Muhoko ogu mutjima gwago musidopi,
ano matwi gago hena ga sita,
meho gawo hena ga ferera,
neisi mpamwe va mona nomeho,
ano matwi neisi va purakenesa ko,
ano nomutjima neisi di yi kwata egano
va litezurure, ame ni va parure.’
28“Ano opo muna kara, yi diveni asi, eparu lyaKarunga tava li tumu kovapagani, ano awo ngava li purakena!” ( 29Tupu ga mene Paurusa kuyitanta eyi, makura Vajuda tava ka za oku tava lipatana vene navene.)
30Paurusa kwa kere nomumvho mbali dokuzura monzugo zendi ezi nga futire. Age nga tambura navenye ava ngava wiza kwendi. 31Age nga udisa yoUntungi waKarunga oku ta rongo noupampi yombinga zaHompa Jesus Kristusa, nagumwe si hena ogu ga mu silikire.
© Egwanekerobibeli Lyanamibia 1987, 2003
© Bible Society of Namibia 1987, 2003