Yirugana Yovapositoli 27
27
Paurusa ta zi koRoma nosikepa
1Ano apa va tokwere asi tu ze koItaliya, makura tava gava Paurusa nononkwate dimwe komupitisili gumwe gefere govakwayita gwahompa gwaRoma, edina lyendi Juliusa. 2Makura tatu perama mosikepa kumwe naAresitarekusi Mumakedoniya, mugara gokoTesaronika, mosikepa ezi za tundire koAdaramiti zi vyuke koyitata yomazenga yokonontere daAsiya. 3Eyi lya sa ko, makura tatu hegeke poSidoni, Juliusa naPaurusa mbili zelike. Makura ta mu sigi a ka tarere po vakwawo, va ka mu kwafe. 4Twa tunda opo, tatu lisindaike tu lihamesere koKipurusi, morwa mpepo za tu konderere. 5Makura tatu wawagana nye mefuta konontere daKilikiya naPamufiliya tu wize moMira somoLisiya. 6Oko yiko ga ka gwene ogo mupitisili gefere sikepa sokutunda koArekisandiliya si ze koItaliya. Makura age ta tu ninki tu rundurukire mo.
7Mazuva gomanzi twa lisindangeda kugenda dogoro tu ka tjayame naKinidusa. Morwa mpepo kapi za tu pere ruveze, makura tatu kurangeda koKereta, tu kunduruke nzumungu zaSalimoni. 8Ngorooro yimo twa lisininika kugenda, dogoro tatu wiza pevega ava tumbura asi Mazenga gomawa pepi nositata saLiseya.
9Twa zumbanesa ruveze, rugendo taru digopa nye. Ano siruwo somadiliro gonondya naso sina pu. Paurusa makura ta va rondora, 10ta tanta asi: “One vagara, omu nina kutara morugendo oru, namu kara sipo mo. Nye kapisi sipo sofuraha zelike nosikepa, nesi sonomwenyo detu hena.” 11Nye mupitisili gefere kwa huguvarere po unene musingi namwenyasikepa kupita nonkango daPaurusa. 12Ano olyo ezenga kapi lya wapera kurumba mo kufu, makura sinzi sawo kwa here kutunda po, va ze dogoro koFenikiya, yiko nava ka rumba kufu, mezenga lyomoKereta lya zahamena korwaMbindakano‐tokero nokorwaMuzogo‐zogo‐tokero.
Emukundungu
13Ano mpepo zokoMbindakano apa za pepere nakauke, vagara tava gazara asi kuvhura tupu kutwikira moomu va here. Awo makura tava koko mo sisikameso va kurangede dogoro tava pitakana Kereta. 14Kapi pwa pita siruwo, emukundungu ava tumbura asi lyokoMuzogo‐zogo‐pumezuva, nare lina pinduka li tunde kevhu. 15Sikepa makura tasi pupu nompepo, morwa kapi sa vhulire kuvyuka mompepo. Ose makura tatu si sigi si pupe. 16Tuna kuwiza mesinya korwaMuzogo‐zogo kokarudi kedina Kerauda, kwa kondja po kumanga kawatogona kokulipoperera. 17Va mana kuukoka mo, makura tava mangerere sikepa nomamungodi asi zi korerere. Eyi ya va tjilisire hena yeyi asi, neisi nava ka hega komarukwa gaSireti. Nosaira makura tava di kuragura ko va pupagere ngorooro. 18Emukundungu kwa tu kihilikire unene, ano lya sire ko, makura tava zugumine murongero gumwe mefuta. 19Mezuva lyautatu yiruganeso yosikepa yene yiyo nye va zugumina mo. 20Mazuva gomanzi ga pitire po twa hana kumona ezuva nonombungururu yi minikire. Ano emukundungu hena halya manga, makura nehuguvaro leyparu tali tu zumbana.
21Va kara mazuva va hana kulya yuma, Paurusa ta sikama mokatji kawo a tante asi: “One vagara, ngano asi kwa zuvhire lyange mu dire kutunda mo moKereta, ngano udigu ou nosiponga ngano patupu. 22Ano ntaantani ame tani mu korangeda mu likorerere, morwa kutupu ogu na zumbana, ntudi sikepa selike makura. 23Yeeyi masiku aga ganaina muengeli gwaKarunga ogu na hama ani ruganene, ka monekere nge. 24Age kuna tanta asi: ‘Neisi no tjilira, Paurusa. Kosipara sahompa gwaRoma yiko tupu ngo ka sikama. Ano navenye ava muna kugenda nawo, Karunga nyove ana va pe.’ 25Ano likorerereni vagara, yeeyi ame kuna huguvara Karunga asi, yimo ngayi kara moomu ana tantere nge. 26Nye natu ka hega tupu kosirudi simwe.”
27Ano masiku gomurongo nagane, ose simpe kuna kupupagera mefuta lyoPokatji, vanasikepa tava zuvhu pokatji komasiku asi pepi nosirongo tuna kara. 28Va zuguminine mo sihetekeso, tava gwana nometa nomurongo ne. Va genda ko nakauke, tava zugumine mo hena sihetekeso, makura tava gwana nometa nomurongo ntatu. 29Awo kwa tjilire asi sikepa zawo mpamwe nazi hegama komamanya. Yiyo nye va zugumine mo yikwateso yine kekadi va ndindire tanko li se. 30Vanasikepa kwa here va livake mo, makura tava gusa siwatogona va si hegumwisire mefuta ngwendi vava asi kuna hara va ka zugumine yikwateso kerume lyosikepa. 31Paurusa makura ta tantere mupitisili gefere novakwayita asi: “Nsene va pira mo owo vagara mosikepa, one nokuvhura si kumupopera.” 32Vakwayita makura tava tete nongodi dokawato, tava ka sigi ka pupe.
33Poyiha yonongurasa, Paurusa ta korangenda navenye va lye, ta tanta asi: “Naina ezuva lyomurongo nagane muna dilire mwa hana kulya yuma. 34Ame kuna mu harere mu lye nondya asi mu gwane nonkondo, ntani mu wapa kuparuka. Yeeyi nagumwe si pokatji keni naru gwa ruhuki rokomutwe.” 35Paurusa eyi ga mana kuyitanta, makura ta gusa mungome, ta pandura Karunga, awo navenye kuna kutara, ta bamuna a tameke kulya. 36Navenye nomutjima dawo tadi zi mo, makura nawo tava li. 37Mosikepa kwa kere mo vantu mafere gavali nonomurongo ntano‐nambali novantu vatano‐nagumwe. 38Va mana kulya nondya vana kuta, tava rerupike sikepa va zugume mo rukokotwa.
Ezonauko lyosikepa
39Ano kwa sa, oso sirongo nokusidiva si. Nye nkoro nonontere va yi mwene, makura tava gazara asi va tware mo sikepa nsene kuvhura. 40Nongodi doyikwateso tava di ndembura, makura yikwateso tava yi tupike mefuta. Siruwo tupu sooso nongodi dosirere tava di gomona. Saira zekerume tava zi zerura zi vyuke mompepo, makura tava singi va ze konontere. 41Va sika kosituntu sokonhi zomema, makura sikepa tasi litu mo, erume lyosikepa tali patamene nzi. Ano ekadi tali tavauka komankumpi. 42Va yi mona ngoso vakwayita, makura tava panga kudipaga nonkwate neisi di livaka mo, di zoge. 43Nye mupitisili govakwayita efere kwa here kupopera Paurusa, makura ta va zonesere eyi va here kurugana. Age ta panga asi, nkenye ogu ga yi diva kuzoga, a vatukire mo muhowo a zogere konontere. 44Ano vakwawo va gendere poyipirangi, vamwe poyintau yosikepa. Yimo ngesi twa ka sikire natuvenye konontere vandjewa‐ndjewa.
© Egwanekerobibeli Lyanamibia 1987, 2003
© Bible Society of Namibia 1987, 2003