Yahya 21

Isa sangita diri lako tau-tau turit Diri pang Lebo Tiberias

1Kasuda nan Isa sangita diri kabali lako tau-tau turit Diri pang sisi Lebo Tiberias.#21:1 Lebo Tiberias: Singin lin umin Lebo Galilea. Ta ka luk riwayat. 2Pang sisi lebo nan ada baremin Simon Petrus, Tomas ade yakelek Didimus, Natanael kalis kota Kana ade ada pang wilaya Galilea, anak-anak Zabdi#21:2 anak-anak Zabdi yanansi tau-tau turit Isa ade basingin Yakobus ke Yahya. Yahya ade baeng tulis kitab ta. ke dua tau turit Isa ade lin.

3Beling Simon Petrus lako taunan, "Ya kulalo bau jangan."

Nyamung taunan, "Ba kami lalo mo ke kau ampo." Teris taunan lalo entek sampan, konang petang nan taunan nonda maong apa-apa.

4Muntu ya roa mo lis mata ano, Isa manang pang sisi lebo, konang tau-tau turit Diri nongka yato luk denan Isa. 5Beling Isa lako taunan, "Sanak-sanak salaki-Ku, kamo ada maong nene jangan ke?"

Nyamung taunan, "Nopoda."

6Teris beling Isa lako taunan, "Samolang mo ramang ko satoe kanan sampan nene, ba ya nene dapat." Teris taunan yasamolang mo ramang ke no bauʼ yatarik kabali apaling peno maong jangan.

7Teris tau turit Isa ade yasayang ling Diri beling lako Petrus, "Junjungan denan." Muntu Petrus yamenong luk denan yanansi Junjungan, karing nya kenang kereʼ lamung, apaling nya nongka kenang kereʼ lamung muntu maramang, teris nyembir ko dalam lebo ke nange ko darat. 8Karing tau-tau turit Diri ade lin nurit ko darat kenang sampan nan, rena tarik ramang ade lempo ke jangan nan, apaling taunan nosoka do ke darat, kira-kira saratis meter bae. 9Muntu taunan kamo dapat darat, taunan yagita barak, ke pang bao ada jangan ke roti.

10Beling Isa lako taunan, "Bawa mo pida-pida jangan ade ka beru nene dapat nan." 11Karing Simon Petrus entek ko bao sampan nan ke yatarik ramang nan ko darat. Ramang nan lempo ke jangan-jangan rea malowe 153 kodeng, ke manaling malowe nan, ramang nan nongka berek. 12Karing beling Isa lako taunan, "Ma mo tubasebo." Nonda sanompo tau-tau turit Diri nan ade baraning bakatoan lako Diri, "Sai Sia?" Apaling taunan to luk Diri nan Junjungan. 13Isa lalo ete roti nan ke yabeang lako taunan. Nan si luk ke jangan nan. 14Denan ade katelu kali mo Isa sangita diri lako tau-tau turit Diri kasuda Diri yasatelas kalis kamate.

Petrus yasadu kabali ling Isa ke yasanadi pemimpin tau-tau turit Isa

15Kasuda basebo Isa bakatoan lako Simon Petrus, "Simon, anak Yahya, musayang-Ku ke lebe kalis tau-tau ta?"

Nyamung Petrus, "Tutu si Junjungan, Sia to luk kaji sayang Sia."

Teris beling Isa, "Jampang mo anak-anak doma-Ku."

16Bakatoan Isa kabali lako Simon Petrus ade kadua kali, "Simon, anak Yahya, musayang-Ku ke?"

Nyamung Petrus, "Tutu si Junjungan, Sia to si luk kaji sayang Sia."

Beling Isa lako nya, "Tati mo doma-doma-Ku."

17Bakatoan Isa kabali lako nya ade katelu kali, "Simon, anak Yahya, musayang-Ku ke?" Petrus dadi ngering ate kalangan rea Isa bakatoan umin ade katelu kali, "Musayang-Ku ke?"

Ke Petrus nyamung lako Diri, "Junjungan, Sia to sarea luk, Sia to luk kaji sayang Sia."

Beling Isa lako nya, "Jampang mo doma-doma-Ku. 18Tutu-tutu Kubeling lako kau, luk muntu masi mumuda, mutali angkekmu diri, ke mulalo me lako muroa. Konang muntu kamo muloka, yatali imamu ling tau lin, ke taunan ya bawamu ko katokal ade no muroa." 19Luk nan yasanapat ling Diri umin yasanyata meluk Petrus ya mate ke samulia Alatala. Kasuda beling nan luk, Diri beling lako Petrus, "Naʼ mo barenang turit Aku."

Isa bakarante luk Yahya, yanansi tau turit Diri ade yasayang ling Diri

20Muntu Petrus balik bungkak, nya yagita luk tau turit Isa ade yasayang ling Diri muntu balangan turit taunan. Nya nan tau turit Isa ade saparak diri ke Isa pang waya taunan mangan barema, ke bakatoan lako Diri, "Junjungan, sai nya ade ya sera Sia?"

21Muntu Petrus yagita tau turit Diri nan, nya bakatoan lako Isa, "Junjungan, apa ade ya dadi lako nya ta?"

22Nyamung Isa lako nya, "Lamin Kusate mabau nya telas jangka Kudatang kabali, denan siong urusanmu. Konang kau, naʼ mo barenang turit Aku."

23Teris kasear mo rungan pang tenga-tenga sanak sawai salaki ade nyadu luk tau turit Diri nan no si ya mate. Konang Isa nongka beling lako Petrus luk tau turit Diri nan no si ya mate, konang Diri beling, "Lamin Kusate mabau nya telas jangka Kudatang kabali, denan siong urusanmu."

24Nya mo tau turit Isa ade dadi saksi ade sanapat luk sarea denan, ke ade baeng tulis sarea luk nan. Tuto luk apa ade ka yasanapat ling nya nan tutu-tutu.

Isa yaboat peno luk ade lin

25Masi peno luk-luk ade lin ampo ade yaboat ling Isa. Konang lamin sarea denan yatulis rena sopo-sopo, kuparasa dunia ta no kawan pang umin yasio sarea kitab ade yatulis nan.

Currently Selected:

Yahya 21: SMW

Highlight

Copy

Compare