Riwayat Rasul-Rasul Isa 2

Tau-tau nyadu yasalempo ke Ruh Alatala

1Muntu kamo dapat Ano Pentakosta#2:1 Ano Pentakosta yanansi hari raya agama Yahudi ade biasa yasepan ampo Hari Raya Pitu Jemat atawa Hari Raya Pataʼ Gandum. Pang saman Isa, Ano Pentakosta yarayakan dadi Hari Raya Pataʼ Gandum, ke baribu tau Yahudi datang lako Yerusalem mabau yarayakan ano nan barema-rema. Tegas Pentakosta yanansi lima pulu. Ano Pentakosta nan yarayakan lima pulu ano kasuda Ano Saliwat, yanansi perayaan tau Israil yasabebas kalis Mesir. To ta tau-tau turit Isa yarayakan ano Pentakosta dadi ano Ruh Alatala turin., sarea tau nyadu lako Isa baremin pang sopo katokal. 2Embang-embang baseda kalis bao awan, sopo seda ma seda angin keras ade baterepa. Seda nan baseda sasir bale pang taunan tokal. 3Karing yagita ling taunan sopo luk ade marua ela-ela api, kasear ke nyampe pang taunan masing-masing. 4Karing sarea tau nyadu nan yasalempo ke Ruh Alatala, ke taunan mulai mo bakarante kenang basa-basa lin. Taunan bauʼ bakarante kenang basa-basa nan ling ada kawasa Ruh Alatala pang dalam taunan.

5Waya nan pang Yerusalem tedu tau-tau Yahudi ade saleh kalis sarea negara pang bao dunia. 6Muntu seda nan baseda kalis bao awan, baremin mo tau peno. Tau peno kalis sarea suku bangsa nan kamelas ling yamenong basa nya diri yakenang ling tau-tau nyadu nan. 7Sarea taunan ngangan ke manang gaok, teris beling, "Ba siong si ke tau-tau ade bakarante nan tau Galilea? 8Ba me luk bua tubau menong taunan bakarante kenang basa-basa kita diri ade tukenang pang negeri kita masing-masing? 9Kita ta tau Partia, tau Media, tau Elam, tau ade tedu pang Mesopotamia, Yudea ke Kapadokia, Pontus ke Asia, 10Frigia ke Pamfilia, Mesir ke daera-daera Libia ade parak ke Kirene. Ke tau-tau ade datang kalis Roma yanansi tau Yahudi ke tau-tau lin ade kamo tama agama Yahudi, 11tau Kreta ke tau Arab. Konang mana ling nan luk, tumenong taunan bakarante kenang basa-basa kita diri luk boat-boat ade rea ade yaboat ling Alatala." 12Sarea taunan ngangan ke bingung benar, nan bua bakatoan sakatan nya, "Apa ke rua tegas deta?"

13Konang tau-tau lin yaejek tau-tau nyadu nan, ke beling, "Taunan muntu mabuk ling ka peno lalo' inum anggur manis."

Hotba Petrus

14Karing manang mo Petrus ke saolas rasul nan, teris beling kenang seda ade akas lako tau peno nan, "O sarea nene tau Yahudi ke sarea tau tedu pang Yerusalem, ma sanenge balong-balong pangkelingku ta, ling sate kusategas ade ka dadi nan lako nene. 15Tau-tau ta nongka mabuk mara ade nene sampina nan, apaling beru po jam siwa jaga. 16Konang sarea ade kamo dadi nan, nan nya ade ka yafirman ling Alatala dunung ola Nabi Yoʼel, ta seda,

17'Ta Firman Alatala, ta ade yadadi pang ahir saman,

Ya Kutumpak Ruh-Ku lako bao sarea tau.

Anak-anak nene sawai salaki, ya sanapat pangkeling-pangkeling-Ku ade ka Kubada lako taunan,

tau-tau taruna nene ya dapat pangita,

ke tau-tau loka ya dapat ipi.

18Nan si luk ampo lako hamba-hamba-Ku sawai salaki,

ya Kutumpak Ruh-Ku pang ano-ano nan,

ke taunan yasanapat pangkeling-pangkeling-Ku ade ya-Kubada lako taunan.

19Ke ya Kusangada luk-luk ade ajaib pang bao, yanansi pang awan,

ke tanda-tanda ade ajaib pang bawa, yanansi pang bao dunia.

Ya ada geti ke api ke penat ade bakompal-kompal.

20Mata ano ya baroba dadi ungkap batangkap,

ke bulan dadi mira mara geti,

sanopoka datang Ano Alatala, ano ade rea ke mulia nan.

21Ke sai-sai tau ade ngeneng kewa tutu-tutu lako Alatala, taunan yasalamat.'

22O sarea nene tau-tau Israil, menong pangkeling ta! Isa tau Nazaret nan, ka yautus ling Alatala. Luk nan yasanyata ola mujizat-mujizat, ke tanda-tanda ajaib ade ka yaboat ling Alatala ola Isa pang tenga-tenga nene, ke nene diri to si luk nan. 23Isa nan yasera lako nene. Ke muntu Diri yasera, nene samate kewa nene beang Diri lako tau-tau ade nongka matiʼ lako Alatala mabau samate Diri kewa yapaku pang kayu palang. Sarea luk nan dadi maluk rencana ade ka yasatentu ling Alatala kalis samula. 24Konang Alatala yasatelas Diri kabali ke yasalepas Diri kalis kasakit kamate nan, apaling Diri no si mungkin teris ada pang dalam kawasa kamate nan. 25Tuto luk Isa yasatelas kabali apaling Nabi Daud kamo sanapat luk Diri, ta ling:

'Kaji ingo Alatala teris-teris ada pang angkang kaji.

Apaling Diri ada manang ola satoe kanan kaji, dadi no si bauʼ kaji kangien.

26Ling luk nan ate kaji kameri kamore, ke boa ela kaji sentek pamuji,

parana kaji tutu-tutu kaji sadu luk yasalamat.

27Apaling nongka Sia beang kaji tetap ada pang katokal tau mate,

ke nongka Sia beang parana Tau Suci Sia ta ancir.

28Kamo Sia sangita kaji ola katelas ade nonda kasuda#2:28 ola katelas ade nonda kasuda: Naskah asli kenang 'ola katelas'..

Ya Sia salempo ate kaji ke kameri kamore ling Sia ada ke kaji.'

29Sanak sawai salaki, beang mo kubada nene kewa tutu-tutu luk Nabi Daud balo tolotu. Diri kamo mate ke yakubir, ke kubir masi ada pang tenga-tenga kita jangka ano ta. 30Konang diri sopo nabi, ke diri to luk Alatala ka bajangi ke basumpa lako diri luk Alatala yasatokal sopo rowe beka kalis Nabi Daud pang bao tahta diri. 31Nabi Daud kamo yato apa ade yaboat ling Alatala pang ano mudi. Ling luk nan, Nabi Daud bakarante luk Alatala ya satelas kabali Raja Basalamat, yanansi luk Raja Basalamat nongka yabeang patis pang dalam katokal tau mate, ke parana nongka yabeang ancir. 32Isa ta ade ka yasatelas kabali ling Alatala ke sarea kami ta dadi saksi luk nan. 33Diri yasatingi pang katokal satoe kanan Alatala yanansi katokal ade paling tingi ke bakawasa, ke yatarima Ruh Alatala ade kamo yajangiʼ ling Bapak. Karing Diri yatumpak Ruh nan lako kami mara ade beru ka nene menong ke nene gita. 34Nabi Daud nongka entek lako surga, konang Nabi Daud beling,

'Alatala kamo bafirman lako Junjunganku:

35Tokal mo pang satoe kanan-Ku

jangka Kupina musu-musu-Mu tunduk lako Kau.'

36Ling luk nan sarea tau Israil mesti to kewa tutu-tutu, luk Isa ade ka nene samate pang kayu palang nan, kamo yasanadi ling Alatala, Junjungan ke Raja Basalamat Ade Yajangiʼ Ling Alatala."

37Muntu tau peno yamenong sarea luk nan taunan dadi ngering ate, teris taunan bakatoan lako Petrus ke rasul-rasul ade lin, "O sanak-sanak salaki apa ade mesti kami boat?"

38Nyamung Petrus lako taunan, "Saruntung nene mesti tobat ke yapaning dalam singin Isa Al Masih Raja Basalamat dadi tanda turit Diri, mabau yaampin dosa nene, ke nene tarima pameang kalis Alatala yanansi Ruh Alatala. 39Apaling jangi nan tawa nene ke tawa anak dadi nene ke tawa tau-tau lin ade masi do, yanansi sarea tau ade yakelek ling Alatala, Tuhan kita, umin datang lako Diri."

40Ke kewa peno pangkeling ade lin ampo Petrus yabada taunan kewa tutu-tutu, ke yasatotang taunan, ta ling, "Beang mo Alatala salamat nene ba no mo nene kena hukum ling Alatala barema-rema ke tau-tau ade jahat pang dunia to ta."

41Tau-tau ade yatarima pangkeling nan yapaning dadi tanda turit Isa, ke pang ano nan tau nyadu lako Isa batamba lowe kira-kira telu ribu tau. 42Taunan sarea rajin balajar kalis rasul-rasul ke tetap baremin sopo ate. Ke taunan rajin baremin polak-polak roti#2:42 Kata-kata polak-polak roti bauʼ bategas muntu tau nyadu yatotang luk Isa polak roti barema ke tau-tau turit Diri. Luk nan dadi pang waya petang sanopoka Isa yasamate pang kayu palang. Kata-kata ta ampo bauʼ bategas taunan batompok umin mangan barema-rema. ke eneng doa.

Luk katelas tau-tau nyadu

43Peno mujizat ke tanda-tanda ajaib yaboat ling Alatala ola rasul-rasul, nan bua sarea tau pang Yerusalem dadi manang gaok. 44Sarea tau nyadu tetap basaiʼ ke sopo ate, ke sarea ade yakamaeng ling taunan yakenang barema-rema. 45Ke ada bae kalis taunan ade jual harta nani ade yakamaeng, ke yabagi lako saruntung tau ade ada perlu. 46Saruntung ano taunan teris-teris batompok barema pang Balaʼ Alatala. Ke taunan polak-polak roti ke mangan barema saruntung ano pang bale-bale kewa kameri-kamore ke reda ate, rena puji Alatala. 47Sarea tau beri lako taunan. Ke saruntung ano Alatala yatamba lowe tau ade yasalamat.

Currently Selected:

Riwayat Rasul-Rasul Isa 2: SMW

Highlight

Copy

Compare