زبُور 109
109
شِکایتِ مَردِ رَنج دِیده
بَلدِه سردِستِه خانِنده ها. زبُورِ داوُود.
1اَی خُدای که تُو ره حمد-و-ثنا مُوگیُم،
چُپ نَشی،
2چراکه دانِ آدمِ شرِیر و آدمِ فِریبکار دَ ضِد مه واز شُده
و قد زِبونِ دروغگوی دَ خِلاف مه توره مُوگیه.
3قد تورای پُر کِینه مَره گِردگِیره کده
و بےدلِیل قد مه جنگ مُونه.
4دَ عِوَضِ دوستی مه، اُونا قد ازمه مُخالِفَت مُونه،
لیکِن ما دَ حقِ ازوا دُعا مُونُم.
5اُونا اَجرِ نیکی مَره قد بَدی مِیدیه
و جوابِ مُحَبَت مَره قد نفرَت.
6 اُونا مُوگیه: ”آدمِ شرِیر ره دَ ضِدِ ازُو باله کُو
و بیل که آدمِ تُهمَتگر دَ دِستِ راست شی ایسته شُنه.
7وختِیکه محاکِمه مُوشه، مُجرِم شِنَخته شُنه
و دُعای شی گُناه حِساب شُنه.
8روزای عُمر شی کوتاه بَشه
و مسئُولیَت شی ره دِیگه نفر بِگِیره؛
9بچکِیچای شی یَتِیم شُنه
و خاتُون شی بیوه.
10بیل که بچکِیچای شی آواره شُده گدایی کُنه
و از خرابه های خُو بُر شُده نان بِطَلبه.
11کسی که قرض دَده، تمامِ دارایی شی ره بِگِیره
و مردُمای بیگَنه حاصِلِ زَحمت شی ره غارَت کُنه.
12هیچ کس دَ حقِ ازُو مِهربانی نَکُنه
و هیچ کس دَ یَتِیمای شی دِلسوز نَبَشه.
13بیل که سِلسلِه خانَوار شی قَطع شُنه
و نام-و-نشان شی دَ نسلِ آینده نَبَشه.
14بیل که شرارَتِ بابه-کَلونای شی دَ حُضُورِ خُداوند دَ یاد اَوُرده شُنه
و گُناهِ آبِه شی هرگِز پاک نَشُنه.
15بیل که امُو گُناهها دایم دَ پیشِ نظرِ خُداوند بَشه
تا یاد-و-بُودِ ازوا ره از زمی رِیشه-کَن کُنه،
16چراکه رَحم کدو ره دَ یاد خُو نَوُرد،
بَلکِه آدمای غرِیب و مُحتاج و دِلمَیده ره
تا دَمِ مرگِ ازوا دُمبال کد.
17ازی که نالَت کدو ره خوش دَشت،
بیل که نالَت دَ بَلِه خود شی بییه؛
و ازی که دَ بَرکت دَدو دِلچسپی نَدَشت،
بیل که بَرکت، ازُو دُور بَشه.
18اُو نالَت ره رقمِ کالا دَ جان خُو کد،
پس بیل که نالَت رقمِ آو دَ وجُود شی داخِل شُنه
و رقمِ روغو دَ استُغونای ازُو.
19بیل که نالَت رقمِ چَپَنی بَشه که دَ گِرد خُو مِیپیچَنه
و مِثلِ کمربَندی که همیشه دَ کمر خُو بسته مُونه.“
20بیل که امی چِیزا جَزای مُخالِفای مه از طرفِ خُداوند بَشه،
جَزای امزُو کسا که دَ ضِدِ جان مه تورای بَد مُوگیه.
21لیکِن تُو اَی خُداوند، خُدای مه،
بخاطرِ نام خُو دَ خُوبی مه عمل کُو؛
و ازی که رَحمت تُو نیکو اَسته، مَره خلاصی بِدی،
22چراکه ما غرِیب و مُحتاج اَستُم
و دِل مه دَ وجُود مه پاره پاره یَه.
23ما رقمِ سایِه دَمِ بیگاه دَ حالِ تیر شُدو اَستُم
و مِثلِ مَلَخ، رانده شُدیم.
24زانُو های مه از خاطرِ روزه گِرِفتو مِیلَرزه
و جِسم مه لاغر-و-بَدحال شُده.
25ما رِیشخندِ مُخالِفای خُو شُدیم؛
اُونا وختِیکه مَره مِینگره، سر خُو ره شور مِیدیه.
26اَی خُداوند، خُدای مه، مَره کومَک-و-یاری کُو؛
دَ مُطابِقِ رَحمت خُو مَره نِجات بِدی
27تا اُونا بِدَنه که اِی کارِ دِستِ ازتُو یَه
و تُو اَی خُداوند، اِی کار ره انجام دَدے.
28بیل که اُونا نالَت کُنه، لیکِن تُو بَرکت بِدی؛
وختِیکه اُونا دَ ضِد مه باله مُوشه، بیل که شرمِنده شُنه،
مگم خِدمتگار تُو خوشحال بَشه.
29بیل که مُدَعیای مه قد رَسوایی پوشَنده شُنه
و شرمِندَگی خُو ره رقم چَپَن اَلّی بُپوشه.
30ما قد دان خُو از خُداوند کَلو شُکرگُزاری مُونُم؛
ما دَ مینکلِ جماعتِ کٹه اُو ره حمد-و-ثنا مُوگیُم،
31چراکه اُو دَ دِستِ راستِ آدمِ مُحتاج ایسته مُوشه
تا اُو ره از چنگِ کسای نِجات بِدیه که بَلدِه گِرِفتونِ جانِ ازُو فِتوا مِیدیه.
Currently Selected:
زبُور 109: HAZ
Highlight
Copy
Compare
Share
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
