زبُور 106
106
مِهربانی خُدا دَ برابرِ بےوَفایی قَومِ اِسرائیل
1حمد-و-ثنا دَ خُداوند!
خُداوند ره شُکر-و-سِپاس بُگِید، چراکه اُو نیکو یَه
و رَحمت شی اَبَدی اَسته.
2کِی مِیتَنه که کارای بُزُرگِ خُداوند ره بیان کُنه
و حمد-و-ثنای ازُو ره بطَورِ کامِل بُگیه؟
3نیک دَ بَختِ کسای که اِنصاف ره دَ جای میره
و هر وخت عدالت ره عملی مُونه.
4اَی خُداوند، وختِیکه دَ بَلِه قَوم خُو نظرِ لُطف مُونی، مَره دَ یاد خُو بِگِیر
و قد نِجات خُو دَ کومَک مه بیه؛
5تا کامیابی اِنتِخاب شُده های تُو ره بِنگرُم
و دَ خوشی قَوم تُو خوشحال شُنُم
و قد میراث تُو قَتی اِفتخار کنُم.
6مو و بابهکَلونای مو گُناه کدے؛
مو مُرتکِب خطا شُدے و شرارَت کدے.
7بابهکَلونای مو وختِیکه دَ مِصر بُود،
دَ کارای عجِیب تُو اهمیَت نَدَد؛
اُونا رَحمتِ بےاندازِه تُو ره دَ یاد خُو نَوُرد،
بَلکِه دَ لبِ دریا، دَ نزدِیکِ دریای سُرخ شورِش کد.
8ولے اُو بخاطرِ نام خُو اُونا ره نِجات دَد،
تا قُدرتِ بُزُرگ خُو ره معلُومدار کنه.
9اُو دَ بَلِه دریای سُرخ هَیبَت کد و دریا خُشک شُد؛
و اُو اُونا ره از مینکلِ غَوُجی های دریا که رقمِ بیابو خُشک بُود، هِدایت کد.
10اُو اُونا ره از دِستِ مُخالِفِین نِجات دَد
و از چنگِ دُشمو خلاص کد.
11آوها دُشمنای ازوا ره پوشَند،
حتیٰ یکی ازوا ام باقی نَمَند.
12اوخته اُونا دَ کلامِ ازُو ایمان اَوُرد
و بَلدِه سِتایشِ ازُو سرُود خاند.
13 لیکِن اُونا دَ زُودی کارای ازُو ره پُرمُشت کد
و بَلدِه مشوَرِه ازُو اِنتِظار نَکشِید.
14اُونا دَ بیابو از خاهِشاتِ نَفس خُو پَیرَوی کد
و خُدا ره دَ امزُو دَشت آزمایش کد.
15چِیزی ره که اُونا خاهِش کدُد، بَلدِه ازوا دَد،
لیکِن مَرَضِ لاغری ره دَ مینکلِ ازوا رَیی کد.
16اُونا دَ مَنِه خَیمهگاه قد مُوسیٰ حسادت کد
و امچُنان قد ھارُون، تقدِیس شُدِه خُداوند.
17اوخته زمی دان خُو ره واز کده داتان ره قُورت کد
و گروهِ اَبِیرام ره قد خاک پوشَند.
18آتِش ام دَ مینکلِ گروهِ ازوا دَر گِرِفت
و اَلَنگِه آتِش شرِیرو ره سوختَند.
19اُونا دَ کوهِ حوریب#۱۰۶:۱۹ «کوهِ حوریب» نامِ دِیگِه «کوهِ سِینا» اَسته. یگ گوسَلِه طِلّایی جور کد،
و امُو بُتِ ریختَنده شُده ره پرستِش کد.
20اُونا خُدای پُر جلال خُو ره
قد مُجَسمِه گاوِ عَلَفخور تبدِیل کد.
21اُونا خُدا، نِجات دِهِندِه خُو ره پُرمُشت کد،
امُو ره که کارای بُزُرگ دَ مِصر انجام دَده بُود؛
22 امُو ره که کارای عجِیب دَ سرزمِینِ حام#۱۰۶:۲۲ ازی که حام باچِه نوح، بابهکَلونِ مِصریا بُود، سرزمِینِ مِصر دَ نامِ «سرزمِینِ حام» ام یاد مُوشُد. انجام دَدُد
و کارای باهَیبَت دَ دریای سُرخ.
23امزی خاطر خُداوند گُفت که اُونا ره نابُود مُونه؛
لیکِن مُوسیٰ اِنتِخاب شُدِه ازُو
دَ حُضُورِ ازُو دَ بَین ایسته شُد
تا قارِ ازُو ره تاه بِشَندَنه که اُونا ره نابُود نَکنه.
24بعد ازُو اُونا سرزمِینِ حاصِلخیز ره خار حِساب کد،
چراکه دَ وعدِه ازُو باوَر نَدَشت.
25اُونا دَ خَیمه ھای خُو نِق نِق کد
و از اَیدِ خُداوند نَشُد.
26امزی خاطر اُو دِست خُو ره باله کده قَسم خورد
که اُونا ره دَ بیابو سرنِگون مُونه
27و اَولادِه ازوا ره دَ مینکلِ مِلَّت ها پورته کده
دَ پگِ سرزمِین ها تِیت-پَرَک مُونه.
28اوخته اُونا خود ره دَ بُتِ بَعل فِغور چسپَند
و امزُو قُربانی ھا خورد که دَ مُرده ها تقدِیم شُدُد؛
29اُونا قد کارای خُو قارِ خُداوند ره باله اَوُرد
و مَرَضِ وُبا دَ بَینِ ازوا تِیت شُد.
30اوخته فِینحاس ایسته شُد و قضاوَت ره دَ جای اَوُرد
و مَرَضِ وُبا قُوی شُد.
31و اِی کارِ ازُو بَلدِه شی یگ عملِ عادِلانه حِساب شُد
نسل اَندر نسل تا اَبَداُلاباد.
32اُونا دَ نزدِیکِ آوهای مِرِیبا خُداوند ره غَضَبناک کد،
دَ اندازِه که بخاطرِ ازوا دَ مُوسیٰ ضرَر رسِید؛
33چُون اُونا روحِ مُوسیٰ ره دَ شور اَوُرد
و اُو قد لَبای خُو تورای ناسَنجِیده گُفت.
34اُونا قَوم ها ره نابُود نَکد
امُو رقم که خُداوند دَ بَلِه ازوا اَمر کدُد؛
35بَلکِه اُونا قد مِلَّت ها ایل-و-غیل شُد
و راه-و-کارِ ازوا ره یاد گِرِفت.
36اُونا بُت ھای ازوا ره عِبادت کد
که امُو بُت ها بَلدِه ازوا یگ دام جور شُد.
37اُونا باچه ها و دُخترون خو ره
بَلدِه جِنیات قُربانی کد.
38اُونا خُونِ بےگُناه ره ریختَند،
خُونِ باچه ها و دُخترون خُو ره،
که اُونا ره بَلدِه بُت های کِنعان قُربانی کد
و زمی قد خُون ازوا آلُوده شُد.
39دَ امزی رقم اُونا دَ وسِیلِه کارای خُو نَجِس شُد
و اُونا تَوَسُطِ اعمال خُو خود ره زِناکار جور کد.
40امزی خاطر آتِشِ قارِ خُداوند دَ ضِدِ قَوم شی دَر گِرِفت
و اُو از میراث خُو نفرَت کد.
41 خُداوند اُونا ره دَ دِستِ مِلَّت ها تسلِیم کد
و کسای که ازوا نفرَت دَشت دَ بَلِه ازوا حُکمرانی کد.
42دُشمنای ازوا دَ بَلِه ازوا ظُلم کد
و اُونا دَ تَی دِستِ دُشمنا خار-و-ذلِیل شُد.
43چندِین دفعه خُداوند اُونا ره خلاصی دَد،
لیکِن اُونا دَ مشوَرِه یگدِیگه خُو شورِش کد
و دَ وسِیلِه گُناهِ خُو خار-و-ذلِیل شُد.
44 باوجُودِ ازی، وختِیکه ناله-و-فریادِ ازوا ره شِنِید،
اُو دَ مُشکِلات-و-سختی ازوا نظر کد.
45چُون عهدِ خُداوند قد ازوا دَ یاد شی بُود
و دَ مُطابِقِ رَحمتِ بےاندازِه خُو دَ برابرِ ازوا گُذشت کد.
46اُو باعِث شُد تا پگِ کسای که اُونا ره اسِیر کدُد،
دَزوا رَحم-و-دِلسوزی کنه.
47اَی خُداوند، خُدای مو، مو ره نِجات بِدی
و از مینکلِ مِلَّت ها مو ره جم کُو
تا نامِ مُقَدَّس تُو ره شُکر-و-سِپاس بُگی
و دَ سِتایش تُو اِفتخار کنی.
48حمد-و-ثنا دَ خُداوند، خُدای اِسرائیل،
از اَزَل تا اَبَداُلاباد.
بیل که پگِ مردُم بُگیه: ”آمین!“
حمد-و-ثنا دَ خُداوند!
Currently Selected:
زبُور 106: HAZ
Highlight
Copy
Compare
Share
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
