مَرقَس 15

فصلِ پوزدَهُم

محکُوم شُدونِ عیسیٰ

1امی که صُبح شُد، پیشوایونِ عالی مقام قد رِیش سفیدا، عالِمای دِین و تمامِ اعضای شورا مشوَره کد. بعد از مشوَره اُونا عیسیٰ ره بسته کده بُرد و دَ پیلاتُس تسلِیم کد.

2پیلاتُس ازُو پُرسان کد: ”آیا تُو پادشاهِ یهُودیا اَستی؟“ عیسیٰ دَ جوابِ ازُو گُفت: ”خود تُو مُوگی.“ 3اوخته پیشوایونِ عالی مقام دَ بَلِه ازُو تُهمَت های کَلو کد. 4پیلاتُس بسم ازُو پُرسان کد: ”آیا تُو هیچ جواب نَمِیدی؟ توخ کُو که دَ بَلِه تُو چِیقَس تُهمَت های کَلو مُونه.“ 5مگم عیسیٰ بسم هیچ جواب نَدَد، بطَوری که پیلاتُس حَیرو مَند.

حُکمِ کُشتونِ عیسیٰ دَ صلِیب

6والی دَ هر عِید یگ بَندی ره بَلدِه مردُم ایله مُوکد، هر کسی ره که اُونا میخاست. 7دَ امزُو غَیت یگ آدم دَ نامِ باراباس قد دِیگه یاغی های که دَ دَورونِ شورِش مُرتکِب قتل شُدُد، دَ بَندی‌خانه بُود. 8مردُم دَ پیشِ پیلاتُس اَمَد و ازُو خاهِش کد که مُطابِقِ رَسمِ همیشَگی بَلدِه ازوا امُو کار ره انجام بِدیه. 9اوخته پیلاتُس دَ جوابِ ازوا گُفت: ”آیا میخاهِید که پادشاهِ یهُودیا ره بَلدِه شُمو ایله کنُم؟“ 10چُون اُو پَی بُرد که پیشوایونِ عالی مقام عیسیٰ ره از رُوی همچِشمی تسلِیم کده. 11مگم پیشوایونِ عالی مقام مردُم ره دَ شور اَوُرد تا پیلاتُس ره وادار کُنه که دَ جای عیسیٰ باراباس ره بَلدِه ازوا ایله کُنه. 12پیلاتُس بسم ازوا پُرسان کده گُفت: ”پس قد کسی که شُمو اُو ره پادشاهِ یهُودیا مُوگِید، چِیز کار کنُم؟“ 13اُونا چِیغ زَده گُفت: ”اُو ره دَ صلِیب میخکوب کُو!“ 14پیلاتُس ازوا پُرسان کد: ”چرا؟ چی بَدی کده؟“ ولے اُونا کَلوتر چِیغ زَده گُفت: ”اُو ره دَ صلِیب میخکوب کُو!“

15ازی که پیلاتُس میخاست مردُم ره راضی کُنه، باراباس ره بَلدِه ازوا ایله کد و عیسیٰ ره بعد از قَمچی زَدو تسلِیم کد تا دَ صلِیب میخکوب شُنه.

عسکرا قد عیسیٰ رِیشخَندی مُونه

16عسکرا عیسیٰ ره دَ داخِل حَولی قصرِ والی بُرد و تمامِ عسکرای یگ قِشله ره جم کد. 17اوخته اُونا یگ چَپَنِ اَرغَوانی دَ جان شی دَد و از خار یگ تاج بافته دَ سر شی ایشت 18و دَزُو سلامی زَدو ره شُروع کد و گُفت: ”درُود دَ پادشاهِ یهُودیا!“ 19اُونا قد نَی دَ سر شی مِیزَد و دَ بَلِه شی تُف اَندخته دَ برابر شی زانُو مِیزَد و اُو ره اِحترام مُوکد. 20بعد ازی که اُو ره رِیشخَند کد، اُونا چَپَنِ اَرغَوانی ره از جان شی بُر کده کالای خود شی ره دَ جان شی دَد.

میخکوب شُدونِ عیسیٰ دَ صلِیب

اوخته اُو ره بُرو بُرد تا دَ صلِیب میخکوب کُنه. 21اُونا یگ راه‌گُذرِ قیروانی ره که شِمعون نام دَشت و آتِه سِکَندر و رُوفُس بُود و از اطراف میمَد، مجبُور کد که صلِیبِ عیسیٰ ره دَ شانِه خُو بُبره.

22پس اُونا عیسیٰ ره دَ یگ جای دَ نامِ گُلگُتا بُرد که ترجمِه شی «کاسِه سر» اَسته. 23اوخته اُونا شرابِ انگُور ره که قد مَوادِ مُر#۱۵‏:۲۳ «مُر» یگ مَوادِ خوشبُوی اَسته که مَزِه تَلخ دَره. گٹ شُدُد دَزُو دَد، مگم اُو قبُول نَکد. 24بعد ازُو اُونا عیسیٰ ره دَ صلِیب میخکوب کد و کالای شی ره تقسِیم کده دَ بَین خُو پِشک اَندخت تا بِنگره که دَ هر کُدَم شی چِیزخیل مِیرَسه. 25ساعتِ سِوّم#۱۵‏:۲۵ یعنی ساعتِ نو بَجِه صُبح. بُود که اُو ره دَ صلِیب میخکوب کد. 26جُرم شی اینی رقم نوِشته بُود: «پادشاهِ یهُودیا.»

27اُونا دُو راهزَن ره ام قد ازُو دَ صلِیب میخکوب کد، یکی ازوا ره دَ دِستِ راست شی و دِیگِه شی ره دَ دِستِ چَپِ ازُو. 28[دَ امزی رقم نوِشتِه کلامِ مُقَدَّس پُوره شُد که مُوگیه: ”اُو از جُملِه خطاکارا حِساب شُد.“]#۱۵‏:۲۸ بعضی نُسخه ها نوِشتِه داخِلِ قَوس ره نَدره.

29کسای که ازُونجی تیر مُوشُد اُو ره تَوهِین-و-تحقِیر کده سر خُو ره شور مِیدَد و مُوگُفت: ”تُو که خانِه خُدا ره خراب مُوکدی و اُو ره دَ مُدَتِ سِه روز آباد مُوکدی، 30خود ره نِجات بِدی و از صلِیب تاه بیه!“ 31دَ عَینِ رقم پیشوایونِ عالی مقام و عالِمای دِین ام قد یگدِیگِه خُو رِیشخَندی کده مُوگُفت: ”اُو دِیگرو ره نِجات دَد، مگم خود خُو ره نِجات دَده نَمِیتنه. 32بیل که امی مسیح، پادشاهِ اِسرائیل امی‌آلی از صلِیب تاه بییه تا مو بِنگری و ایمان بیری.“ امُو کسای که قد ازُو دَ صلِیب میخکوب شُدُد ام اُو ره دَو-و-دشنام مِیدَد.

مَرگِ عیسیٰ

33از ساعتِ شَشُم تا ساعتِ نُهم#۱۵‏:۳۳ یعنی از ساعتِ دوازدِه چاشت تا ساعتِ سِه بعد از چاشت. ترِیکی تمامِ زمی ره گِرِفت. 34دَ ساعتِ نُهم عیسیٰ قد آوازِ بِلند چِیغ زَده گُفت:

”ایلوئی، ایلوئی، لَمّا سَبَقتَنی؟“

که ترجمِه شی اینی اَسته: «خُدای مه، خُدای مه، چرا مَره ایله کدی؟» 35بعضی کسای که دَ اُونجی ایسته بُود وختی اِی ره شِنِید، گُفت: ”اونه، اُو اِلیاس ره کُوی مُونه.“ 36اوخته یگ نفر دَوِیده یگ اِسفنج ره پُر از سِرکِه انگُور کد و دَ سرِ یگ نَی بند کده دَزُو پیش کد که وُچی کُنه و گُفت: ”بیل که بِنگری که اِلیاس مییه تا اُو ره تاه بیره، یا نَه؟“ 37دَ امزُو غَیت عیسیٰ قد آوازِ بِلند چِیغ زَده جان دَد.

38و پردِه خانِه خُدا از باله تا زیر دُو پاره شُد. 39قومَندانی که پیشِ رُوی عیسیٰ ایسته بُود، وختی دِید که عیسیٰ چی رقم جان دَد، اُو گُفت: ”راستی که اِی آدم باچِه خُدا بُود.“

40چند خاتُو ام دَ اُونجی بُود که از دُور توخ مُوکد؛ دَ مینکلِ ازوا مریَمِ مَجدَلیه و مریَم آبِه یعقُوبِ ریزه و یوشا بُود و امچُنان سالومه. 41اَمیا وختِیکه عیسیٰ دَ جلِیلیه بُود، ازُو پَیرَوی مُوکد و اُو ره خِدمت مُوکد. غَدر خاتُونوی دِیگه ام دَ اُونجی بُود که قد ازُو دَ اورُشَلیم اَمدُد.

دَفن کدونِ عیسیٰ

42شام شُدُد و ازی که امُو روز، روزِ تَیاری یعنی یگ روز پیش از روزِ آرام بُود، 43یوسُف باشِندِه رامه که یکی از اعضای مُحترمِ شورای یهُود بُود و ام دَ اِنتِظارِ پادشاهی خُدا بُود، دَ دلیری دَ پیشِ پیلاتُس رفت و جَسَدِ عیسیٰ ره ازُو طلب کد. 44پیلاتُس تعجُب کد که عیسیٰ اِیقَس زُود مُرده. اوخته اُو قومَندان ره کُوی کده ازُو پُرسان کد که آیا اُو گاه مُرده؟ 45وختی پیلاتُس از قومَندان شِنِید که اُو مُرده، جَسَد ره دَ یوسُف تحوِیل کد. 46اوخته یوسُف رَختِ کتانی خرِید و جَسَد ره از صلِیب تا اَوُرده دَ رَختِ کتانی پیچَند و دَ قبری که دَ قاده کَنده شُدُد، ایشت و یگ سنگ ره دَ دانِ قبر لول دَد. 47مریَمِ مَجدَلیه و مریَم آبِه یوشا دِید که جَسَد دَ کُجا ایشته شُد.

Currently Selected:

مَرقَس 15: HAZ

Highlight

Compare

Copy

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible