سُخنوَر 10
10
فصلِ دَهُم
1امُو رقم که پاشه های مُرده مَوادِ عَطرساز ره بَدبُوی مُونه،
امُو رقم یگ لَوڈگی ریزه مِیتَنه حِکمت و عِزَت ره بےاَرزِش کنه.
2دِلِ آدمِ دانا اُو ره سُون راهِ راست مُوبره،
لیکِن دِلِ آدمِ لَوڈه اُو ره سُون راهِ کَج.#۱۰:۲ دَ جای «کَج» دَ زِبونِ عِبرانی «چَپ» نوِشته یَه.
3آدمِ لَوڈه حتیٰ دَ غَیتِ راه رفتو بےعقلی مُونه
و بَلدِه پگ نِشو مِیدیه که اُو لَوڈه اَسته.
4اگه حُکمران دَ بَلِه تُو قار شُد،
وظِیفِه خُو ره ایله نَکُو،
چراکه مُلایمَت رَنجِش های کٹه ره برطرف مُونه.
5یگ بَدی ره دَ تَی آفتَو دِیدُم، یگ خطا ره که از حُکمران سر مِیزَنه: 6آدمای لَوڈه دَ مقام های باله مُقرَر مُوشه و آدمای بااَرزِش دَ جای های تاه. 7ما غُلاما ره دِیدُم که دَ بَلِه اَسپ سوار اَسته و کٹهکَلونا مِثلِ غُلاما دَ رُوی زمی پیده موره.
8هر کسی که چاه میکَنه خود شی دَ مَنِه ازُو موفته
و هر کسی که دیوال ره شِکاف مُونه، اُو ره مار مِیگَزه.
9هر کسی که سنگ میکَنه، اِمکان دَره دَ وسِیلِه سنگ اَوگار شُنه
و هر کسی که چیو مَیده مُونه، جان شی دَ وسِیلِه امزُو کار دَ خطر اَسته.
10اگه تَوَر کُند بَشه
و دَم شی تیز نَشُده بَشه،
زورِ کَلو کار دَره،
لیکِن حِکمت باعِثِ کامیابی مُوشه.
11اگه مار پیش از اُوده شُدو یَگو کس ره بِگزه،
اُودِه مارگِیر چی فایده دَره؟
12توره های دانِ آدمِ دانا اُو ره مُحترم جور مُونه،
مگم لَبای آدمِ لَوڈه که شور مُوخوره، اُو ره تَباه مُونه.
13شُروعِ توره های دان شی لَوڈگی اَسته
و آخِرِ گبای شی دیونَگی خالِص؛
14باز ام آدمِ لَوڈه توره های خُو ره کَلو مُونه و دَم نَمِیگِیره.
اِنسان نَمِیدَنه که دَ آینده چی واقِع مُوشه،
و کِی مِیتَنه اُو ره دَ بارِه چِیزی که بعد ازُو رُخ مِیدیه، باخبر کُنه؟
15زَحمتِ آدمای لَوڈه اُونا ره از پای مِیندَزه،
دَ اندازِه که اُونا راهِ شار ره پَیدا نَمِیتنه.
16وای دَ حال تُو اَی سرزمِینی که پادشاهِ تُو مِثلِ بچکِیچه اَسته
و کٹه-کَلونای تُو دَ غَیتِ صُبح عَیش-و-نوش مُونه.
17نیک دَ بَخت تُو اَی سرزمِینی که پادشاهِ تُو آدمِ عالِیشان اَسته
و کٹه-کَلونای تُو دَ وختِ مُناسِب مُوخوره-و-وُچی مُونه،
بَلدِه قُوَت گِرِفتو، نَه بَلدِه نشه کدو.
18از ٹمبلی، بامِ خانه خراب مُوشه
و از سُستی دِستا، خانه چَقَک مُوکُنه.
19مِهمانی بَلدِه خَنده-و-خوشی برگُزار مُوشه
و شرابِ انگُور زِندگی ره خوشحال مُونه،
لیکِن پَیسه مُهَیا کُنِندِه پگِ چِیزا اَسته.
20پادشاه ره حتیٰ دَ فِکر خُو ام نالَت نَکُو،
و نَه ام آدمِ دَولتمَند ره دَ اُتاقِ خاو خُو،
چُون اِمکان دَره که مُرغِ هَوا توره های تُو ره بُبره
یا یَگو مَوجُودِ بالدار مَوضوع ره دَزوا بُگیه.
Currently Selected:
سُخنوَر 10: HAZ
Highlight
Copy
Compare
Share
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 United Bible Societies Association and Pamir Ministries. Used by permission. All rights reserved.
