اوّلِ پِترُس 3

فصلِ سِوّم

رابِطِه خاتُونو و شُویو

1امی رقم اَی خاتُونو، تابِع شُویون خُو بَشِید تا اگه یَگونِ ازوا از کلام اِطاعَت نَکُنه، دَ وسِیلِه رفتارِ ازشُمو خاتُونو بِدُونِ که توره بُگِید دَ مسیح جذب شُنه، 2یعنی دَ وسِیلِه دِیدونِ خُداتَرسی و زِندگی پاک شُمو. 3نُوربَندی شُمو دَ آرایشِ ظاهِری نَبَشه که چوٹی کدونِ مُوی و پوشِیدونِ طِلّا و کالای خُوب اَسته، 4بَلکِه دَ اِنسانِ باطِن یعنی دَ قَلب شُمو بَشه که دَ وسِیلِه نُوربَندی از بَین نَرفتَنی روحِ آرام و مُلایم آرایش شُده که دَ نظرِ خُدا بااَرزِش اَسته. 5چُون دَ زمانِ سابِق ام خاتُونوی مُقَدَّسِ که دَ خُدا تَوَکُل دَشت، دَ امزی رقم خودون ره آرایش مُوکد و تابِع شُویون خُو بُود. 6رقمِ ساره که از اِبراهِیم اِطاعَت مُوکد و اُو ره بادار گُفته کُوی مُوکد. شُمو ام دُخترونِ ازُو کُوی مُوشِید، دَ شرطی که کارِ نیک کُنِید و از هیچ چِیزی که شُمو ره وَحشَت زَده مُونه ترس نَخورِید. 7امی رقم اَی شُویو، شُمو ام قد خاتُونوی خُو عاقِلانه زِندگی کده اُونا ره بحَیثِ ظرفِ ظرِیف اِحترام کنِید، چُون اُونا ام قد شُمو وارِثِ تُحفِه پُرفَیضِ زِندگی اَسته، تا هیچ چِیز مانِع قبُولِ دُعاهای شُمو نَشُنه.

رَنج کشِیدو بَلدِه کارِ نیک

8خُلاصه، پگ شُمو یگدِل و همدَم بَشِید، مُحَبَتِ بِرادرانه دَشته بَشِید و دِلسوز و فروتن بَشِید. 9دَ عِوَضِ بَدی، بَدی نَکُنِید و دَ عِوَضِ دَو-و-دشنام، دَو-و-دشنام نَدِید، بَلکِه دَ عِوَض شی خَیر-و-بَرکت طلب کنِید، چُون بَلدِه امزی شُمو کُوی شُدید تا وارِثِ بَرکت شُنِید. 10چُون نوِشته شُده:

”هر کسی که زِندگی ره دوست دَره

و میخایه روزای خُوب ره بِنگره،

باید زِبون خُو ره از بَدی نِگاه کُنه

و لَبای خُو ره از گُفتونِ تورِه پُرفِریب.

11از بَدی پرهیز کده نیکی کُنه؛

دَ طلبِ صُلح بَشه و پُشت شی بِگرده.

12چراکه چِیمای خُداوند دَ بَلِه آدمای عادِل اَسته

و گوشای شی سُونِ دُعاهای ازوا،

لیکِن رُوی خُداوند دَ ضِدِ آدمای بَدکار اَسته.“#زبُور ۳۴‏:۱۲‏-۱۶.

13اگه شُمو بَلدِه کارِ نیک شَوق دَرِید، کِی اَسته که دَز شُمو ضرَر بِرسَنه؟ 14ولے حتیٰ اگه بخاطرِ انجام دَدونِ کارای نیک از مردُم رَنج مِینگرِید، نیک دَ بَخت شُمو. از ترسِ ازوا وَحشَت زَده نَشُنِید و پَریشان نَبَشِید، 15بَلکِه مسیح ره بحَیثِ مَولا دَ دِلهای خُو مُقَدَّس بِدَنِید. همیشه آماده بَشِید تا اگه کُدَم کس دلِیلِ اُمِیدی ره که دَز شُمو اَسته پُرسان مُونه، بَلدِه شی جواب بِدِید، لیکِن دَ نَرمی و اِحترام. 16وِجدان خُو ره پاک نِگاه کُنِید تا کسای که شُمو ره بَدنام مُونه، از بَد گُفتون خُو بخاطرِ رفتارِ نیک شُمو دَ خِدمتِ مسیح، شرمِنده شُنه. 17اگه خاست-و-اِرادِه خُدا امی اَسته که رَنج بِنگری، بِهتَر اَسته که بخاطرِ کارِ نیک رَنج بِنگری، نَه بخاطرِ کارِ بَد. 18چراکه مسیح ام یگ دَفعه بخاطرِ گُناه های اِنسان رَنج کشِید، یعنی شخصِ عادِل بَلدِه گُناهکارا رَنج کشِید، تا شُمو#۳‏:۱۸ دَ جای «شُمو» دَ بعضی نُسخه ها «مو» نوِشته یَه. ره پیشِ خُدا بیره. اگرچِه اُو دَ جِسمِ کُشته شُد، لیکِن دَ روح زِنده بُود 19و دَ وسِیلِه روح رفته بَلدِه اَرواحی که بَندی بُود موعِظه کد، 20بَلدِه اَرواحی که دَ زمانِ سابِق اِطاعَت نَکد، غَیتِیکه خُدا قد صبر-و-حَوصِله دَ روزای زِندگی نوح، دَ دَورونِ جور شُدونِ کِشتی اِنتِظار مِیکشِید. دَ امزُو کِشتی تِعدادِ کم، یعنی هشت نفر دَ وسِیلِه آو نِجات پَیدا کد.#پَیدایش ۶‏:۵‏-۸‏:۱۹. 21امی آو نَمُونِه غُسلِ تعمِید اَسته که فِعلاً شُمو#۳‏:۲۱ دَ جای «شُمو» دَ بعضی نُسخه ها «مو» نوِشته یَه. ره نِجات مِیدیه؛ اِی غُسل نَه بَلدِه دُور کدونِ چِرگ-و-چتلی از جِسم، بَلکِه یگ درخاست بَلدِه وِجدانِ پاک از خُدا اَسته و دَ وسِیلِه دُوباره زِنده شُدونِ عیسیٰ مسیح دَ دِست مییه 22که مسیح دَ عالمِ باله رفته و دَ دِستِ راستِ خُدا یَه و ملایکه ها، قُدرت ها و قُوَت ها تابِع ازُو شُده.

Currently Selected:

اوّلِ پِترُس 3: HAZ

Highlight

Copy

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible