اوّلِ قُرِنتیا 12

فصلِ دوازدَهُم

یگ روح قد تُحفه های کَلو

1آلی دَ بارِه تُحفه های روحانی: اَی بِرارو، ما نَمیخایُم که شُمو دَزی باره بےخبر بَشِید. 2شُمو مِیدَنِید، زمانی که شُمو بُت‌پرَست#۱۲‏:۲ دَ جای «بُت‌پرَست» دَ زِبونِ یونانی «مِلَّت ها» نوِشته یَه. بُودِید، از هر طرِیق سُون بُت های گُنگه-و-بےزِبو بُرده شُده از راه بُر مُوشُدِید. 3پس ما میخایُم شُمو بُفامِید که هر کسی که دَ وسِیلِه روحِ خُدا توره بُگیه، هرگِز نَمُوگیه، ”نالَت دَ عیسیٰ!“ و هیچ کس ام نَمِیتنه بُگیه، ”عیسیٰ مَولا اَسته،“ جُز دَ وسِیلِه روح اُلقُدس.

4تُحفه های مُختلِفِ روحانی وجُود دَره، مگم روح امُو یگ اَسته. 5خِدمَتای مُختلِف وجُود دَره، مگم مَولا امُو یگ اَسته. 6عمل های مُختلِف وجُود دَره، مگم امُو یگ خُدا اَسته که تمامِ ازوا ره دَ وجُودِ پگ دَ کار مِیندَزه. 7ظهُورِ روح اُلقُدس دَ هر کس بَلدِه فایده پگ دَده مُوشه. 8دَ یگ نفر دَ وسِیلِه روح اُلقُدس کلامِ پُر از حِکمت دَده مُوشه و دَ دِیگه نفر دَ وسِیلِه امزُو روح، کلامِ پُر از عِلم؛ 9دَ یگِ دِیگه دَ وسِیلِه امزُو روح، ایمان و دَ شخصِ دِیگه دَ وسِیلِه امزُو روح، تُحفه ها بَلدِه شفا دَدو؛ 10دَ دِیگه نفر قُدرتِ انجام دَدونِ مُعجزه ها، دَ دِیگه کس قُدرتِ پیشگویی، دَ دِیگه کس قُدرتِ تشخِیصِ روح های مُختلِف، دَ دِیگه نفر قُدرتِ توره گُفتو دَ زِبونای رقم رقم و دَ نفرِ دِیگه قُدرتِ ترجُمِه امزی زِبونا. 11تمامِ امزیا دَ وسِیلِه امزُو یگ روح فعال اَسته که اُو امی تُحفه ها ره دَ مُطابِقِ خاست-و-اِرادِه خُو دَ هر کس تقسِیم مُونه.

یگ جِسم قد اعضای کَلو

12چُون امُو رقم که جِسم یگ اَسته و اعضای کَلو دَره و تمامِ اعضای جِسم، باوجُودِ که کَلو اَسته، یگ جِسم ره تشکِیل مِیدیه، دَ بارِه مسیح ام امی رقم اَسته. 13چراکه پگ مو دَ یگ روح بَلدِه یگ جِسم تعمِید دَده شُدی، چی یهُود و چی یونانی،#۱۲‏:۱۳ مقصد «یونانی» دَ اِینجی اِمکان دَره «غَیرِ یهُود» بَشه. چی غُلام و چی آزاد؛ اَرے، دَ پگ مو از یگ روح دَده شُد.#۱۲‏:۱۳ دَ جای «دَده شُد» دَ زِبونِ یونانی «وُچِیدَلجی شُد» نوِشته یَه. 14چُون جِسم از یگ عُضو نِییه، بَلکِه از اعضای کَلو تشکِیل شُده. 15اگه پای بُگیه: ”بخاطری که دِست نِیَستُم، ما دَ جِسم تعلُق نَدرُم.“ اِی دلِیل نَمُوشه که اُو دِیگه عُضوِ جِسم نِیَسته. 16یا اگه گوش بُگیه: ”بخاطری که چِیم نِیَستُم، دَ جِسم تعلُق نَدرُم.“ اِی دلِیل نَمُوشه که اُو دِیگه عُضوِ جِسم نِیَسته؟ 17اگه تمامِ جِسم چِیم مُوبُود، جای شِنِیدو دَ کُجا مُوبُود؟ اگه تمامِ جِسم گوش مُوبُود، جای بُوی کدو دَ کُجا مُوبُود؟ 18لیکِن رقمی که فِعلاً اَسته خُدا هر کُدَمِ اَعضا ره دَ مُطابِقِ خاست-و-اِرادِه خُو دَ جِسم قرار دَده. 19اگه تمامِ جِسم یگ عُضو مُوبُود، جِسم کُجا وجُود مِیدَشت؟ 20مگم آلی اَعضا کَلو اَسته، ولے جِسم یگ. 21چِیم نَمِیتنه دَ دِست بُگیه: ”ما دَز تُو ضرُورَت نَدرُم.“ نَه ام سر مِیتنه دَ پای ها بُگیه: ”ما دَز شُمو ضرُورَت نَدرُم.“ 22برعکس، اعضای جِسم که ضعِیفتَر معلُوم مُوشه، ضرُوری‌تَر اَسته. 23و اعضای جِسم که دَ نظرِ ازمو کم اَرزِشتَر حِساب مُوشه، اُونا ره قد اِحترامِ خاص مُوپوشَنی و قد اعضای که قابِلِ نِشو دَدو نِییه، قد حُرمَتِ خاص رفتار مُوکُنی، 24دَ حالی که اعضای نُوربَند مو دَزی کارا ضرُورَت نَدره. لیکِن خُدا جِسم ره دَ شکلی ترتِیب دَده که بَلدِه اعضای کم اَرزِشتَرِ جِسم اِحترامِ کَلوتر دَده شُده 25تا دَ بَینِ اعضای جِسم جدایی دَ وجُود نَیه، بَلکِه اعضای جِسم مَساویانه دَ فِکر یگدِیگِه خُو بَشه. 26و اگه یگ عُضو دَ دَرد بییه، تمامِ اَعضا قد ازُو قتی دَرد بِکشه و اگه یگ عُضو عِزَت-و-اِحترام پَیدا کُنه، تمامِ اَعضا قد ازُو خوشی کُنه.

27شُمو جِسمِ مسیح اَستِید و هر کُدَم شُمو یگ عُضوِ ازُو: 28خُدا دَ جماعتِ ایماندارا اوّل رسُولا، دوّم پَیغمبرا، سِوّم معلِما ره قرار دَد؛ بعد ازُو مُعجزه ها، بعد ازُو تُحفه ها بَلدِه شفا دَدو، کومَک کدو، رهبری کدو و توره گُفتو دَ زِبونای رقم رقم. 29آیا پگ رسُول اَسته؟ آیا پگ پَیغمبر اَسته؟ آیا پگ معلِم اَسته؟ آیا پگ صاحِبِ مُعجزه اَسته؟ 30آیا پگ تُحفه ها بَلدِه شفا دَدو دَره؟ آیا پگ دَ زِبونای مُختلِف توره مُوگیه؟ آیا پگ ترجُمه مُوکُنه؟ 31پس دَ شَوقِ کَلو دَ طلبِ تُحفه های بُزُرگتَر بَشِید. و ما بَلدِه شُمو ازیا کده ام یگ راهِ بِهتر ره نِشو مِیدیُم.

Currently Selected:

اوّلِ قُرِنتیا 12: HAZ

Highlight

Copy

Compare

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible