Rom 16
16
Noa lepo fakeli Pol
1Rei ngagughau te lepoza ka ghotolu gna greghada Foebi gne, eigna gne'e kahe nani keli lui. Gne'e loku mala toghora nanoni khilo'au ka nau Senkria re. 2Rei toreghamu ghotolu mala toghoza gne'e ka nahngagna Lod ni ka puhigna khilo'au. Ni kate hmoneza gne'e ka keha goifatare, ghotolu mala toghoza gne'e, eigna gne'e toghora chuku nanoni ni eulanauwa toghoghau rei.
3Nogu nahma ka Prisila ni mae Akuila, eigna repa neke loku balugu rei ka nogu gloku hariza Jisas Kraes. 4Repa theome ke hmauza gleme ie kate loku heta mala toghoghau rei ie, eume rei lepo fakelira repa. Ni nodi khilo'au mae te theome Jiure eulanauwa lepo fakelira repa.
5Nogu nahma ka nanoni khilo'au te krapu lao ka sugadi repa re.
Ni nogu nahma lanauwa ka tufuni mae kheragu Epaenetas, magne mae ulu lahu te leghuza Kraes ka provens Esia.
6Nogu nahma lanauwa ka Mere, gne'e teke loku heta te toghoghamu ghotolu ie.
7Eulanauwa, nogu nahma ka mae Andronikas ni mae Jiunias, eigna phalumare mae Jiu jateula rei euwa, ni phalumare neke au balugu rei ka suga sosolo ie. Phalumare teke kulu fatutu'aniza Kraes ame reina euwa. Ni mae khurure ghatho bohera lui phalumare.
8Nogu nahma ka mae Ampliatas, mae tufuni kheragu keli te fatutu'aniza lanauwa Lod.
9Eulanauwa, nogu nahma ka mae Abanas, magne kahe mae teke loku baluda hariza Kraes ie. Eulanauwa, nogu nahma ka tufuni mae kheragu keli mae Stakis.
10Nogu nahma ka mae Apeles, mae te fua hneta noa fatutu'ani ie ka Kraes kate fariuriuza magne hatimare ie.
Ni eulanauwa nogu nahma ka thabutuagna mae Aristobulas.
11Eulanauwa, nogu nahma ka mae Herodion, magne kahe mae Jiu jateula rei euwa.
Ni nogu nahma lanauwa ka nanoni khilo'au ka thabutuagna mae Nasisas re.
12Nogu nahma ka Traefina ni Traefosa, repa nani teke loku heta hariza Lod.
Eulanauwa, nogu nahma ka kheragu rei Pesis, gne'e kahe ga'ase te loku heta lui hariza Lod.
13Nogu nahma ka mae Rufus, mae khilo'au te tufuni keli lui ka noa gloku hariza Lod ie. Nogu nahma lanauwa ka dogna magne, eigna gne'e teke kalitighau fakeli rei jateulanauwa mae tufuni thugna euwa.
14Nogu nahma ka mae Asinkritas ni mae Fligon, Hemes, Patrobas, Hemasi ni keha nanoni khilo'au te au baludire.
15Nogu nahma ka mae Filologas ni Julia, mae Nerias ni greghagna ie, ni ka mae Olimpas ni noa nanoni fate'o God te au baludire.
16Nahmara kherada te au Rom ka puhigna khilo'au.
Nanoni khilo'au te hui noa Kraes re nahmaghamu ghotolu.
Noa fagriu leghu lahu mae Pol
17Kheragura ka khilo'au, rei lepo heta ka ghotolu mala koikofighamu fakeli ka ihei te ngagura faphiepileza khilo'au gne, ni choghara nomi fatutu'ani ghotolure ka nodi fagriu te hno'i ka fagriu teke kulu lasera hui ghotolu ra. Tovi ke farogo ka hatimare. 18Nafnata nanoni ire theome loku hariza Kraes noda Lod, ni hatimare leghura lana hna te ngagura thaidire. Hatimare lase lepo famaemahe ni lase muamugnara eu ihei te theome ra'e kofu falasera te au puhidi te di'are. 19Nanoni te hui re rogiza te ghotolu kegra heta lui ka nomi fatutu'ani re. Rei hneahnegha lui ka ghotolu gna igne. Ni rei ngagughaughamu ghotolu te mala tufuni lase fakelira puhi te kelire, ni rei ngagughaughamu ghotolu te mala tovi ghathora ni leghura eu puhi te di'are.
20Kaina theome raugha, God mae ihei te gulao keliphari ka noa nanonire kaina toghoghamu mala daka soruza ghotolu mae Satan.
Ni noa kokofakasa noda Lod Jisas Kraes te au balumi ghotolu tifa e tifa.
21Timoti mae ihei te loku balugu rei gne, noa nahma ka ghotolu. Euwateuwe, mae Lusias, ni mae Jason, ni mae Sosipata teure mae Jiu jateula rei euwa, hatimare eulanauwa nodi nahma ka ghotolu.
22Rei mae Tetias te i'ini soru hariza mae Pol letasi igne, rei nahmighamu lanau ghotolu ka nahngagna Lod.
23Mae Gaeas eulanauwa noa nahma ka ghotolu. Rei au ka sugagna magne gignoa igne ie. Nanoni khilo'au re salofaudu koba ka sugagna magne.
Erastas mae mala koukofu nanugra gna gruru bi'o igne, ni mae tabusignada Kuotas, phalumare nodi nahma lanauwa ka ghotolu.
Lepo fakeli ka God
24-25Tati lepo fakeliza God! Mae ihei teke toghoghamu te kegra heta ghotolu ka nomi fatutu'ani ie, leghuza u Grorogo te Keli te ghaghazala rei gna Jisas Kraes ie.
Ka u Grorogo te Keli igne, God fatakle harighita fakeli gaoghathogna goeghoze teke au polo funu tifa igne. 26Tutu'ani, God mae ihei te kahra te tifa ie, ne falalase harighita u Grorogo te Keli igne ka hna teke i'inira hui mae profetre. Euwateuwe, God neke lepo harighita mala thuturiza tati u Grorogo te Keli igne, malani nanoni ka nau te hui ka nauthoglu gne tangomana te fatutu'aniza God ni leghuza magne. 27God thaigna lana te fua lalase lui ie, ni tati mala lepo fakeliza magne ka nahngagna Jisas Kraes, te the'o ka huigna. Amen.
© 2025 SIL Solomon Islands