Rom 15
15
Leghuza puhigna Kraes
1Te keli ie, tati ihei te heta noda fatutu'ani re mala toghora keha nanoni te theome hneta nodi fatutu'ani re. Tati theome mala eira lana hna te ngagughitara thaida re. 2Eume, tati te hui ie mala ghathora kherada fafaudu ka khilo'au re, ni mala eira puhi te keli re harira. Kate eiza tati igne, nodi fatutu'ani hatimare re kaina heta lui. 3Eigna Kraes neke theome eira hna te ngaguza thaigna re. Jateula te lepoza ka i'ini te blahi ie, “U goeghoze te lepo fadi'agho ghoera, lepo fadi'aghau lanau rei.”#15:3 Sam 69:9. 4Goifata fate'o teke i'ini hatimare ka buka blahi tifa ire, neke i'ini mala fagriughita tati, mala hneta noda fatutu'ani ni mala sasa'a eu tati kate tukura te au hna te na'alepora God harighita re.
5God tangomana te faheheta gaoghathomi ghotolu re, ni toghoghamu mala tuku fatheve au lana. Eume, rei toreza magne mala toghoghamu mala au kahe gaoghatho lana ghotolu farihotenimi thaimi kate leghuza ghotolu puhigna Jisas Kraes ie. 6Ka puhi igne, ghotolu te hui kaina mala kahe gnagnafa lana mala kilo uluza God Magna noda Lod Jisas Kraes.
Grorogo te Keli ie maladi mae Jiu ni ihei te theome Jiu
7Fari tootoghoi farithaimi jateula Kraes teke toghoghamu ghotolu ia euwa. Kate kofiza puhi igne ka ghotolu ie, nanonire kaina kilo uluza God. 8Te lepoza rei ka ghotolu ie, Kraes neke eiza noa gloku ie mala toghora mae Jiure, mala faheheta noa na'alepo God teke eiza magne ka mae ku'edi mae Jiure ne tutu'ani. 9Eulanauwa, magne neke eiza igne mala tangomana nanoni te theome Jiure te kilo uluza God, eigna God neke kokhonira hatimare. Jateula te lepoza hatimare ka i'ini te blahi ie,
“Eume rei kaina lepo fakeligho God ke hnuadi ihei te theome Jiure,
rei kaina koze kilo uluza nahngamu ghoe.”#15:9 2 Samuel 22:50; Sam 18:49.
10Ni eulanauwa te lepoza ka i'ini te blahi ie,
“Ghotolu nanoni te theome Jiura,
au hneahnegha baludi noa nanoni God re.”#15:10 Diutronomi 32:43.
11Eulanauwa, ka i'ini te blahi lepo eu'ani,
“Ghotolu nanoni fate'o te theome Jiura,
mala lepo fakeliza Lod.
Ghotolu nanoni ka nau te hui ra,
mala kilo uluza magne ka khoze.”#15:11 Sam 117:1.
12Ni mae profet Aesaea ne lepo eu'ani lanauwa,
“Kahe mae ka vikegna Jesi kaina mei.
Magne kaina mei mala funei frunira ihei te theome Jiure,
euwateuwe hatimare kaina au nodi grouronu ka magne mala toghora re.”#15:12 Aesaea 11:10.
13God tufuni toghoghita mala fatutu'aniza tati hna teke na'alepo magne harighita ie. Rei toreza God mala hneahnegha ni au ka keliphari eu ghotolu kate fatutu'aniza magne ie. Euwateuwe, noa noilaghi Tharunga te Blahi ie kaina fahetaghamu mala rouronuza God fatheve ghotolu te mala eiza hna teke na'alepoza ie.
Noa gloku mae Pol
14Kheragura, rei tufuni laseghamu ghotolu te eira koba ghotolu puhi te keli re, eigna ghotolu laseza hui puhigna God ie, ni tangomana te fagriura nanonire tufuni goeghozegna magne ie. 15-16Ni meuba nauwa, rei theome hmau te mala i'ini ari ka ghotolu keha puhi ka letasi igne, mala ke ghatho fapulo ra ghotolu hna teke lasera hui ra. Eigna God neke gumei kokofakasa ie ka rei, mala kahe noa mae gloku Jisas Kraes, mala toghora nanoni te theome Jiure. Rei loku hariza God jateula kahe mae te kegra farihotenidi God ni nanoni kate thuturiza goeghozegna magne ie. Rei eiza igne mala tangomana ihei te theome Jiure mei ka God, euwateuwe magne kaina athira hatimare jateula kahe faafara, ni hatimare tangomana te blahi ka noa noilaghi Tharunga te Blahi.
17Eigna rei mei kaheni balugna Jisas Kraes, rei tangomana te fahaehagheza nogu gloku hariza God ie. 18Ni rei kaina lepo fatakleza lana hna te eiza Kraes ka rei, kate batura rei ihei te theome Jiure te mala leghuza God ie. Hatimare leghuza God ka hna te lepoza ni ei harira teu rei re. 19Hatimare leghuza God eigna hatimare kofira u falalase ni kofunaboboi balu noa noilaghi Tharunga te Blahi ie. Eume, rei tufuni ghaghazalaza noa Grorogo te Keli Jisas Kraes ie funu Jerusalem ghile tei dufu Ilirikam. 20Rei ngagughau lui te thuturiza koba u Grorogo te Keli igne ka nau hia nanonire te theome rogiza na te au Kraes ie. Rei ngagughau eiza igne, eigna rei theome ngagughau te loku hariza God ka nau ahia te kela kulu loku hui keha mae khilo'au re. 21Eigna te lepoza ka i'ini blahi ie eu'ani,
“Ihei te the'o kahe nanoni te thuturi neigna magne harira re,
hatimare kaina kofira noa gloku magne re.
Ni ihei te theome rogiza na te au u Grorogo te Keli ie,
hatimare kaina tufuni laseza.”#15:21 Aesaea 52:15.
22Eigna rei ngagughau te thuturiza Grorogo te Keli ie ka nau ahia te the'o khilo'au ie, ni chuku fata ie gloku ire fotighau rei te mala ari kofighamu ie.
Mae Pol ghaoghatho mala tei Rom
23-24Ni gignoa igne ie, gloku te eira rei ka nohi ire la huihui. Rei ghaoghatho mala tei ka nau bi'o Spen, ka teuwae ame ari na rei me sighoghamu euwa, eigna chuku finogha rei neke ngagughau lui te mala ari kofighamu ie. Euwateuwe, kate ari te au fakeli rei khata hnimoto hmo'eni balumi ghotolu ie, rei ngagughaughamu ghotolu te toghoghau ka nogu thei re. 25Ni neubane fua ngagughau lui te mala ari kofighamu ie, rei kaina kulu tei Jerusalem mala atha tei keha nanugra mala toghora nanoni khilo'au ka teuwae re. 26Nanoni khilo'au ka provens Masidonia ni Akaia teure hneahnegha lui ne gumei keha nanugra mala toghora nanoni khilo'au te kuma te au ka nau Jerusalem re. 27Tutu'ani, hatimare tufuni hneahnegha lui kate eiza igne ie, ni hatimare tufuni kaoni ra lui nanonidi Jerusalem re euwa. Eigna hatimare neke athiza lanauwa fablahi teke na'alepoza God ka mae Jiure. Eume hatimare mae te theome Jiure, mala gulao goifata te keli malagna fei thono harira mae Jiure. 28Rei kaina tei Jerusalem mala gulao nanugra teke saosalo maladi hatimare teure. Ke leghugna teugne, rei na tei Spen, ka thei teugne ame ari na rei me sighoghamu euwa. 29Rei laseza, kate ari rei ka ghotolu ie, Kraes kaina fablahighita tati hui.
30Kheragura, eigna tati te kaheni balugna noda Lod Jisas Kraes, ni Tharunga te Blahi ie togho ghita te mala fari nahmai teugne, rei tufuni tore ghamu mala kaheni balugu ka tharai ni toreza God mala toghoghau rei. 31Ghotolu mala tarai ra ihei te theome fatutu'ani ka nau Judia re, mala theome choghaghau rei hatimare. Euwateuwe, ghotolu mala tarai ra lanauwa noa nanoni God te au Jerusalem re, mala tangomana hatimare te hneahnegha ka nanugra te atha te tei rei mala toghora hatimare teugne. 32Ni jame ngaguza God ie, rei kaina ari kofighamu au. Tutu'ani lui, rei kaina hneahnegha lui te kofighamu ni kaina gnafa nogu fakeli balumi ghotolu. 33Rei toreza God mae te gumei harighita keliphari ie, mala au balumi ghotolu fate'o. Amen.
© 2025 SIL Solomon Islands