Sam 22
22
Sam 22
Noa tharai mae ihei te paapara hariza nanoni.
Noa khoze mae Devet.
(Vese lao ka God)
1Nogu God, nogu God ne fahneuwa ghoe te tei ka'aghau rei gnea?
Ne fahneuwa ghoe te au fatifaghau rei te theome rogira nogu tharai rei re gnea?
2Nogu God, naga'egno ie rei theome ke gnafa ka kilogho ie, ni ghoe theome ke rogighau,
ni bongigno ie, rei theome ke gnafa ka kilogho ie.
3Ni neubanauwa, ghoe God te tufuni blahi, ni ghoe hokro ka nou sape nafano,
ni gheati ka vikegna Israel re lepo fakeligho.
4Mae ku'emi gheati tifare neke fatutu'anigho,
eigna te fatutu'anigho hatimare re, ghoe neke fakahrira ka puhi fateote'o re.
5Hatimare neke tufuni tahngi ka ghoe, euwateuwe ghoe neke fakahrira ka khamedi nodi mae naokare.
Hatimare neke fatutu'anigho, euwateuwe theome ke mamaza.
6Nanonire kofighau rei jateula phoipoli,
rei theome nanoni ka nathadi hatimare re, ni hatimare tho'anodighau lanau rei.
7Nanoni te kofighau rei re, lepo choghaghau rei.
Hatimare ma'eghau ni faviuviru pha'udire kate kofighau rei ie.
8Hatimare lepo eu'ani, “Magne fatutu'aniza LOD, ni ne fahneuwa te theome fakahriza LOD magne ie?
Te ngaguza LOD magne ie, ne fahneuwa LOD te theome mei te toghoza magne ie?”
9Kate kahra mei ka dogu ie, ghoe teke koikofi fakelighau ie.
Ni kate sua ichoni na teke au rei ie, ghoe neke gumei nakahra ie ka rei.
10God, funu ka naga'e teke kahra meigu te ghile dufu gignoa igne, leuleghu fata ie rei fatutu'anigho lana ghoe,
ni ghoe lana nogu God rei ie.
11Tovi tei famaghanighau,
eigna nakahra paapara ie la thata hui ka rei gignoa igne,
ni the'o iheina te mala toghoghau rei ie.
12Chuku mae naokare la mei falithughau, jateula buluka te di'a puhidira.
Hatimare la falithughau rei, jateula buluka te hnetadi Basan ra euwa.
13Hatimare bunganga fabi'o naflodire, jateula laeon te ngaguza ngamu nanoni,
ni aku fabi'o jateula laeon te tufuni rofo ia euwa.
14Rei la the'o hui kahe nogu nahneta, jateula kho'u te tofa soru ka glose te blahlo ia euwa.
Nahuligure la theome jongi hui, ni gaoghathogu ie glape soru.
15Naflogu ie la moja jateula naprafu,
ni glapigu ie la luti ka doadohagu ie,
ni ghoe la lisa laoghau hui rei mala leme ka glamagna naprafu ie.
16Mae te di'a puhidi ire mei au falithughau rei, jateula thotoghei khau te fakaukatura euwa.
Hatimare mei kakatu khamegu ni nenegu teu rei re.
17Rei tangomana kofira hui la nahuligu re,
mae nogu naoka rei re kofu mei ne ma'eghau rei.
18Hatimare ne tufa nogu pohe rei re farithaidi,
ni nanaeru khale mala atha nogu pohe theve rei ie.
19Ni LOD, tovi tei ka'aghau.
Chadi mei phileghau, eigna ghoe lana nogu nahneta rei ie.
20Fakahrighau ka khamedi mae te ngagura falemeghau rei re,
fakahrighau ni athi fajiflaghau ka nodi noilaghi mae te jateula khau nasi teu ire.
21Fakahrighau ka mae te jateula laeon teu ire,
ni barifotighau ka nodi noilaghi mae te jateula buluka te nasi teu ire. Rei lasegho te ghoe rogira nogu tharai rei re!
22Gignoa igne, rei kaina thuturigho ghoe ka mae kheragure, gnadi puhi teke eira ghoe harighau rei re.
Rei kaina lepo fakeligho ke uludi hatimare fate'o.
23Rei kaina lepo eu'ani, “Ghotolu nanonimi Israel vikegna mae Jekop re, ghotolu lepo fakeliza LOD,
ghotolu mala ghatho boheza ni mala tufru soruza eu LOD.
Ghotolu mala lepo fakeliza magne.”
24Magne theome ke gatho ihora nanoni te kuma re, ba ghatho ihora paapara te eira hatimare re.
Ni kate tahngi lao hatimare ka magne ie, magne toghora ni ho'ilepora eu hatimare.
25Rei kaina lepo fakeligho ghoe gnadi hna teke eira ghoe re ke uludi mae ihei te krapu mei mala tufru sorugho re.
Ni ke uludi ihei te mei mala tufru sorugho re, rei kaina eira hna teke na'alepora re.
26Nanoni te kumare kaina ngamu gedi ni boho.
Ni nanoni te hiroza LOD re, kaina ie kilo uluza magne.
Ni sakrera mala tei fa'ulu hatimare ka goifata te eira tifa e tifa.
27LOD, nanoni te hui ni vike fate'o teu ka nauthoglu gne, kaina ke pulo mei ka ghoe mala tufru sorugho.
28Eigna ghoe lana mae Nafano ie,
ni ghoe lana te funei frunira nanoni te hui re.
29Nanoni te fahaehaghe re, kaina mei tufru sorugho ghoe.
Tutu'ani, nanoni fate'o ka nauthoglu gne kaina kafua mei tufru sorugho ghoe.
30Nanoni te theome kahra na te au re kaina loku harigho Lod.
Hatimare kaina thuturi eimu ghoe, harira ihei nanoni nate kahra mei ka pagusu ke leghure.
31Hatimare kaina lepo eu'ani ka nanoni te kahra mei ke leghu re,
“LOD ie fakahrira hui noa nanonire.”
Currently Selected:
Sam 22: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
