Sam 21
21
Sam 21
Noa lepo fakeli mae nafano
Noa khoze mae Devet.
(Vese lao ka God)
1 LOD, nomi mae nafano gheati gne tufuni hneahnegha lui, eigna ghoe neke gulao noilaghi hariza magne.
Magne hneahnegha lui, eigna ghoe neke tapla sorura noa mae naoka magne re.
2Goifata fate'o teke tufuni ngaguza magne re, ghoe neke gulao hariza magne.
Ni goifata fate'o teke tore ra magne re, ghoe neke ei hariza magne.
3Ghoe mei ka magne balu noilaghi bi'o mala fablahiza magne,
ni fatoti lao kahe khepi nafano te e'ei ka golu ka pha'ugna magne ie.
4Magne neke toreza nakahra te keli ie ka ghoe, ni ghoe neke gulao hariza magne.
Ni nakahra te keli teke gulao ghoe ka magne igne, kaina au ka magne tifa e tifa.
5Magne fua dulu, eigna ghoe ne toghoza magne ne tapla sorura noa naokare.
Euwateuwe, nanonire lepo fakeliza ni kilo uluza eu magne.
6Goifata te keli te gulao ghoe ka magne re, na au fatheve balugna magne.
Ghoe tufuni fahneahneghaza magne, eigna ghoe ne au balugna.
7 LOD, mae nomi nafano gheati gne tufuni fatutu'anigho ghoe,
ni magne kaina kegra maku fatheve, eigna ghoe tufuni nahmiza ni koikofiza eu koba magne.
(Vese lao ka mae nafano)
8Mae Nafano! Ghoe kaina ulura nou mae naokare.
Ni ghoe kaina athira nanoni te hui te tho'anodigho ni huhughugho teure.
9Kate takle mei ghoe ie, ghoe kaina chogha fahuira jateula kha'aghi bi'o te ngamu fahuira goifata fate'o ra euwa.
LOD, ghoe kaina tufuni choghara ka di'atamu ie, ni kaina fahuira ka kha'aghi bi'o.
10Kaina the'o ki nanoni ka vikedi hatimare re nate kahra ie,
eigna ghoe kaina kafua falemera.
11Hatimare na eira keha gaoghatho te di'a mala choghagho ghoe,
ni kaina theome tangomana ra.
12Ghoe kaina khale ra hatimare ka thuna,
ni hatimare kaina talifigri ni pelo.
(Vese lao ka God)
13 LOD, ghoe lana te au nou noilaghi bi'o ie,
ni gheati kaina koze kilo uluza nahngamu, eigna nou noilaghi ie.
Currently Selected:
Sam 21: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
