Sam 18
18
Sam 18
Koze kilo uluza LOD.
Mae Devet neke kozeza khoze igne ka teke fakahriza LOD magne ka noa mae naokare ni ka mae Sol.
(Vese lao ka God)
1 LOD, rei tufuni nahmagho lui ghoe.
Ghoe lana nogu nahneta ie.
(Vese lao ka mavitu)
2 LOD, lana nogu God rei ie. Ka magne mala pologu ni koikofighau teu koba ie.
LOD, lana nogu glave mala tafrira rei thuna te lisu mei mae naoka tagu re.
LOD au noilaghi bi'o te mala fakahrighau ni koikofighau teu koba rei ie.
3Rei kiloza LOD, ni magne mei toghoghau koba rei, eume mae naokare theome tangomana te mei choghaghau rei ie.
Eigna teuwae, tati fate'o lepo fakeliza LOD.
4U gleme ie, la theome tei fatifaghau hui rei.
U gleme ie, jateula galo bi'o te mei te tooku frunighau ia euwa.
5U gleme ie, la theome tei fatifaghau hui rei,
ni u gleme ie, la tufuni mei fathata hui ka rei.
6Kate fua au paapara ie, rei kiloza LOD mala toghoghau.
Rei tahngi lao ka magne mala toghoghau.
Ni magne au ka noa Suga Blahi ie, au ne rogi meiza naoglagu rei ie.
7 LOD ne tufuni di'atagna ka nogu mae naoka rei re.
Agnoni, magne ne fakheuza glose ie,
ni gukhu te hui re ne kafua hngali fate'o.
8Gagahu ie ne jifla mei ka nehugna magne.
Kha'aghi ni thina ngire teure jifla mei ka naflogna magne ne juru goifata fate'o re.
9Magne ne re'oza manga ie ne soru mei,
balugna kahe gromo te tufuni thuubi ke pari nenegnare.
10Kahe engjel palaza magne,
ne faghose flalo ne mei ka naulafa bi'o ie.
11Magne ne tooku fafruniza thaigna ka u gromo ie,
ni gromo te thutagna nahani ie ne tooku fafruniza lanau magne.
12Naglisa ie ne bae mei funugna ka magne,
nahani thina ni kha'aghi teure ne jifla mei funugna ka gromo te thuta ie ne uthu soru mei pari.
13 LOD au ne au klia, ne vese fabi'o ni naoglagna ie jateula fila eu ka manga ie klia.
Magne vevese ni nanoni fate'o re ne rogiza naoglagna magne ie.
14Magne ne khalera noa mae naokare ka thuna ne pelo tafiri hatimare.
Ni magne ne famei naglisa, euwateuwe hatimare pelo ne sopa thei ne the'o kofira.
15Kate di'atagna te lepo faheta LOD ka noa mae naokare,
hnorara ie ne moja,
ni u nathotoghagna nauthoglu ie ne thakle.
16 LOD ie au klia au ne loku sorughau, ne fakahrighau rei ka u gleme.
Kate plulu rei ka hnorara ie, magne ne loku ka phalu khamegu rei re ne kohro hagheghau.
17Neubane ke fua hnetaguni rei nogu mae naokare,
LOD ne toghoghau rei ne udi famaghanighau ka khamedi hatimare re.
18Kate uthu rei ka puhi ie, mae naokare ne magrighau,
ni LOD ne koikofighau ni toghoghau.
19Magne toghoghau rei ni fakahrighau eu rei,
eigna magne nahmaghau rei.
20 LOD toghoghau ni gumei chuku goifata te keli, eigna rei eira puhi te kohlo re.
Ni magne fablahighau, eigna rei theome ke eiza kahe puhi te di'a.
21Rei leghu fakeliza noa vetula LOD ie.
Rei theome ke figri pogruza nogu God, ni theome ke eiza ki puhi te di'a.
22Rei leghu fatheveza noa vetula LOD ie.
Ni rei theome ke huhughuza noa goeghoze re.
23Magne laseza te rei theome ke eiza kahe nasapla ie.
Ni rei koikofi fakelighau thaigu theome ke eiza kahe nasapla.
24 LOD tabaghau rei, eigna te eiza rei hna puhi te kohlo ie,
ni magne laseza te rei theome ke eiza kahe nasapla.
(Vese lao ka God)
25 LOD, ihei te au balumu fatheve re, ghoe na au baludi fatheve lanau hatimare.
Ni tufuni keli harira ihei te tufuni leghuza puhimu te kelire.
26Ihei te leghuza puhi te kohlo ie, ghoe falalase ka hatimare puhi te kohlo ie.
Ni ihei te leghuza puhi te di'a ie, ghoe fapaapara ra hatimare ka puhidi te di'a.
27Ghoe fakahrira ihei te au faleghura thaidire,
ni na'a faparira ihei te fahaehaghera thaidire.
28 LOD, ghoe lana nogu God ni nogu nabae teu rei ie.
Ghoe lana u nogu nabae rei kate romo ie.
29Ka nou tootogho ghoe ie, rei kaina tangomana tapla sorura nogu mae naokare.
Ni ka nahneta te gumei ghoe God,
rei na eulanauwa tangomana te re'o ra nodi bara thina hatimare ie.
(Vese lao ka mavitu)
30 LOD gne tufuni kohlo puhigna ie, ni goeghozegnare tufuni tutu'ani.
Eume, nanoni fate'o te tei polo ka God re,
ne jateula kahe nodi glave te barifotira ka thunare.
31 LOD God, te tufru soruza tati gne, igne lana kahe God ie.
Magne lana kahe thina maku te mala barifotighita ie.
32Kahe God igne lana te gumei nahneta,
ni batughau rei ka nabrau te kohlo.
33Magne fablahira phalu nenegu rei re, mala maku jateula nenegna dia euwa.
Euwateuwe, mae nogu naoka rei re kaina kofiza te theome ke oha rei kate tei rei ka hnimoto te phegu re.
34Magne fablahira khamegu rei re mala magra.
Eume, rei tangomana te ghaghao nabaghe te maku ie.
(Vese lao ka God)
35 LOD God, ghoe lana te koikofighau rei,
ni fakahrighau ka khamedi mae nogu naokare.
Ni eigna te toghoghau rei ghoe ie, ame duluna rei nahngagu ie.
36 LOD, ghoe neke koikofi fakelighau rei ne theome tangomana te lokighau,
ni huju sorughau teu mae nogu naokare.
37Rei hrubira fatheve hatimare ne tei dufira.
Rei theome ke ghogro ne ghile faleme fahuira hatimare.
38Rei khale fahuira hatimare ne uthu hatimare pari ka glose ke uludi nenegu rei re,
hatimare ne theome tangomana teke kegra haghe ie.
39Ghoe lana teke gumei noilaghi nahneta mala magra ka rei ie.
Ni rei tapla sorura hatimare.
40Ghoe fahmauhmaura nogu mae naoka rei re ne pelo hatimare.
Ni rei ne falemera mae ihei te tho'anodighau re.
41Hatimare ne tahngi mala mei toghora ki nanoni, euni the'o kahe nanoni te mei fakahrira re.
Hatimare tanghi lao ka LOD, ni magne tho'anoa farogo ka hatimare.
42Rei neke daka ghiaghihara, ne brubrusu jateula nafruofruhngo glose te flalo tafiri ka naulafa ia neu hatimare.
Ni tapla ghiaghihara ne jateula gnagnapa ka nabraura neuwa.
43Ghoe neke toghoghau rei, ni athi fajiflaghau ka khamedi nogu mae naokare,
ni eulanauwa sakreghau mala funei frunira rei keha nanonire.
Nanoni teke iho nogura rei tifare, la au hui ke parigna nogu noilaghi rei gignoa igne.
44Hatimare ne tufru sorughau, ni leghura eu nogu khuru rei re.
45Kate laseza tela ari the'o nafudi nodi groghere,
hatimare ne jifla kokora nodi hnimoto mala polo re ne mei balu nahmau ni tetekrira.
46 LOD, gheati lasegho te ghoe God kahra te the'o ka huimu!
Leuleghu fata ie, ghoe koikofi fakelighau koba rei.
Rei lepo fakeligho, eigna ghoe te fakahrighau.
47God, ghoe neke foli fapulo hui puhi di'a teke ei harighau rei nogu mae naokare,
ni ghoe toghoghau mala tangomana rei te tapla sorura hatimare re.
48Ghoe koikofighau mala theome tangomana choghaghau rei mae te lase magra re, ni gignoa igne ghoe la fakahrighau.
Ni ghoe toghoghau rei mala ke mae funei rei ke uludi hatimare.
49 LOD, rei kaina lepo fakeligho ke uludi nathadi hatimare re,
ni rei kaina koze kilo uluza nahngamu.
50 LOD, Ghoe neke fafateghau rei mala mae nafano, ni eulanauwa fatakleza te ghoe tufuni nahmaghau rei.
Ghoe neke toghoghau rei mala tapla sorura rei mae naokare.
Ghoe neke fufunuza igne ka rei mae Devet, ni ghoe kaina eiza koba igne fatheve ka ihei nate kahra mei ka vikegu rei re tifa e tifa.
Currently Selected:
Sam 18: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
