Sam 17
17
Sam 17
Noa tarai mae ihei te theome ei kahe nasapla
Noa tharai mae Devet.
(Vese lao ka God)
1 LOD, rei la khale ka puhi. Rei toregho mala farogo ka nogu tharaire,
togho meighau eigna rei theome phita.
2Kate fate ghoe ie, ghoe kaina phileghau rei.
Eigna ghoe lana te laseza hna puhi te kohlo ie.
3Ghoe laseza hui gaoghathogu rei ie.
Ghoe neke mei fariuriuza nakahragu rei ie kate thuru rei bongigno.
Ni ghoe kofu falaseza hui nakahragu rei te theome ke ngagughauza kahe puhi te di'a ie.
4Rei theome lepo fadi'a jateula te eira keha nanonire.
Rei tufuni leghura lana nou fagriu ghoe re,
eume rei theome leghura puhidi nanoni te fa'amagra ni ei puhi te di'a teure.
5Leuleghu fata ie rei leghugho ghoe,
ni theome ke tei ka'agho ka nakahragu ie.
6God, rei toregho ghoe, eigna ghoe kaina rogighau.
Rei tufuni toregho mala rogi meira nogu tharaire.
7Falase meiza tagu nou nahma bi'o ie, mala fakahrighau.
Ni nogu naokare kaina theome choghaghau, eigna ghoe barifotighau au rei.
8Koikofi fakelighau, jateula ghoe te koikofi fakelira nathamure.
Ni popholo fakelighau jateula kokorako ga'asegna te tooku frunira thugnare ke parigna baghignare teu ia.
9Teu ghoe ie, nanoni te di'a puhidire kaina theome ke mei choghaghau rei.
Mae naokare la krapu falithughau hui rei mala falemeghau rei,
ni hatimare kaina theome tangomana te ulughau rei ie.
10Hatimare fabiobi'o, ni fahaeghera eu thaidi,
ni theome ke kofu kokhoniza ihei.
11Eume, ahia te tei rei ie, hatimare tapla leuleghura lana minagu rei re.
Hatimare hiroza naga'e te mala tapla sorughau rei ie.
12Hatimare tukighau rei mala saka rekuza thonogu ie,
jateula laeon te rofo lui te tukira keha goifata liu aridi re mala nganira teu ia euwa.
13 LOD, mei magrira nogu mae naokare, ni tapla sorura.
Atha nou naflahi mala magra ie, mei magrifotighau ka khamedi mae te di'a puhidire.
14 LOD, togho meighau,
fakahrighau ka khamedi mae ihei te ghathora lana nakahragna nauthoglu gne.
Fapaapara ra sonighoe, ka papara teke kulu kaikaliti hui ghoe maladi hatimare tekeu ra.
Ghoe na eira paapara teure ghile dufira thudi ni gradi teu hatimare re.
15Ni rei na tangomana kofigho ka dofra haghegu ie, eigna rei theome eiza ki puhi te di'a.
Rei kaina tufuni hneahnegha, eigna rei au balumu au lana ghoe.
Currently Selected:
Sam 17: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
