Sam 16
16
Sam 16
Tufuni hneahnegha te keli
Noa khoze mae Devet.
(Vese lao ka God)
1God, rei tufuni toregho mala koikofighau,
eigna rei fatutu'anigho te mala barifotighau ie.
2Rei ne lepo eu'ani ka LOD, “LOD, ghoe lana nogu funei rei ie.
Gobigna goifata keli te tufugu rei re neke mei funudi ka ghoe.”
3Nanoni fate'o ka nauthoglu te leghugho ghoe re tufuni keli lui.
Ni rei tufuni keli tagu lui te au baludi hatimare re.
4Ihei te tufru sorura keha godre, kaina deira chuku hoholo.
Rei kaina theome baludi hatimare ka faafara te eira hatimare re,
ni eulanauwa theome lepora nahngadi nodi god hatimare re.
5 LOD, ghoe lana te gumei nakahra ka rei ie, ni gumei harighau goifata fate'o re.
Rei kaina gu'ari nakahragu fate'o ka khamemu ghoe.
6Tutu'ani lui, gobigna goifata te gumei ghoe ka rei ire tufuni keli lui.
(Vese lao ka mavitu)
7Rei kaina lepo fakeliza LOD, eigna leuleghu fata ie magne batughau koba.
Ka bongidire magne gumei harighau gaoghatho te keli.
8Leuleghu fata ie rei laseza te LOD au balugu koba,
eigna the'o ki hnana te mei choghaghau ka nakahragu ie.
9Eume, gignoa igne rei tufuni hneahnegha nogu ni nakahragu ie tufuni keli,
ni la tufuni au nogu ka keliphari.
(Vese lao ka God)
10Ghoe theome sakre laoghau rei ka noa noilaghi gleme.
Ni ghoe eulanauwa theome sakre laoghau rei mala bose ke hnuagna gluma beku, eigna rei tufuni nahmagho lui ghoe.
11Ghoe falalase ka rei puhi te mala deiza rei nakahra te keli ie.
Ni kate au rei balumu ghoe ie, rei hneahnegha lui,
ni gaoghathogu ie fodu ka hneahnegha fatheve e the'o ka huigna.
Currently Selected:
Sam 16: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
