Matiu 4
4
Satan ne fa'au'auza Jisas
(Mak 1:12-13; Luk 4:1-13)
1Agnoni Tharunga te Blahi ie batuza Jisas ne tei ka nau nagou ie mala mei Satan fa'au'auza malani sapla magne. 2Ke leghugna te theome ngamu magne phalututu naga'e ni phalututu bongi teure, Jisas ne rofo lui. 3Agnoni Satan mei ne lepo eu'ani ka magne, “Koma, te Thugna God ghoe ie, lepo lao sonighoe ka thina are mala hoho'i ke bereti.”
4Jisas ne lepo eu'ani ka Satan, “U i'ini te blahi ia lepo eu'ani, ‘Nanoni ie theome kahra ka gano lana, ni kahra ka goeghoze te hui te jifla mei ka God re.’#4:4 Diutronomi 8:3. ”
5Agnoni Satan batuza Jisas ne haghe ka u gruru blahi Jerusalem, ne fakegraza magne ka khekelegna Suga Blahi ie. 6Satan ne lepo eu'ani ka Jisas, “Jisas, te Thugna God ghoe ie, lili soru pari! Eigna te lepoza ka u i'ini te blahi ia,
“‘God kaina ie lepora noa engjelre mala koikofigho ghoe.’
Hatimare na takurigho
mala theome thutuge ghoe nenemure ka thina.”#4:6 Sam 91:11,12.
7Ni Jisas ne lepo eu'ani ka Satan, “Ni te lepoza lanauwa ka i'ini te blahi ia, ‘Tovi fariuriuza Lod nou God ie!’#4:7 Diutronomi 6:16. ”
8Ke leghugna igne, Satan udiza Jisas ne haghe ka khekele gna gukhu te avu ie, ne fatakle ka Jisas nau bi'o fate'o te au ka nauthoglu gne, ni nodi goifata fateote'o te keli te au ke hnuadi nau teure. 9Agnoni, magne ne lepo eu'ani ka Jisas: “Gobigna goifata ire, rei na sakre ari ra ka ghoe, eume turununu ni kilo'ulughau rei meu ghoe ie.”
10Jisas ne lepo eu'ani ka Satan, “Teinou maghani, Satan! Eigna te lepoza ka u i'ini te blahi ie, ‘Kilo uluza Lod nou God ie, ni loku hariza eulana Magne.’ #4:10 Diutronomi 6:13. ”
11Agnoni Satan ne tei kokoza Jisas, euwateuwe noa engjel God re mei ne toghoza magne.
Jisas fufunu noa gloku ie Galili
(Mak 1:14-15; Luk 4:14-15)
12Kate rogiza Jisas te mae Jon ne au ka suga sosolo teuwe, magne ne jifla Judia ne pulo Galili. 13Magne ne kulu tei Naesaret, ni magne theome au faraugha ka teuwae. Ni magne jifla neke tei au Kapanam, kahe gruru kehreagna grano Galili, ke hnua nohi Zebuloni ni Naftali. 14Igne ne horoghoto ka hna teke lepo eu'ani mae profet Aesaea tifa ia;
15“Ka nohi vike mae Zebuloni ni ka nohi vike mae Naftali,
ka nabrau te tei dufu ka Kholo,
ka keha phile kho'u Jodan, i Galili naudi nanoni te theome Jiure.
16Nanoni te theome laseza God,
te au kate romo ire kaina kofiza au nabae te bi'o ie.
U nabae gna God ie kaina jateula nadafi te haghe boibongi fufugho ia euwa, takle harira nanoni te the'o nakahragna God tadire.”#4:16 Aesaea 9:1,2.
17Funu ka naga'e teugne, Jisas ne thuturiza u Grorogo te Keli ie ka nanonire, ne lepo eu'ani, “Atha koko puhimi te di'are, eigna u naga'e God nate funei frunira noa nanonire la thatai mei hui.”
Jisas kilora fati mae nugra
(Mak 1:16-20; Luk 5:1-11)
18Kate zaoza'o te tei Jisas ka u graeraghe gna Grano Galili ie, magne ne kofira phalumae tabusigna, mae Saemon te kiloza Pita ni mae Aduru. Phalumare ugra sasa ne au ka nodi jaraha ie. 19Jisas ne lepo eu'ani ka phalumare, “Mei leghughau rei. Rei kaina falalase ka ghopa mala ugra mei nanoni ka rei.” 20Agnoni, phalumare ghoseni ne na'asoru nodi jarahare ne tei leghuza magne.
21Kate zaoza'o teke teini magne ie, magne tei ne kofira phalumae thabusigna, mae Jems ni mae Jon, phalu thugna mae Zebedi re. Phalumare saghe au ka mola ie balugna mae madi ie, ni sikata nodi jarahare. Jisas eulanauwa ne kilora phalumare. 22Phalumare eulanauwa ghoseni ne tei kokoza mola ie ni mae madi ie eu ne tei leghuza Jisas.
Jisas fagriura ni fakahrira eu nanoni te fogra re
(Luk 6:17-19)
23Jisas ne tei fate'oza provens Galili, ne ruma ka nodi suga tharai mae Jiure ne fagriu, ni thuturi fatakleza eu Grorogo te Keli, gna u naga'e God nate funei frunira noa nanonire, ni fakekelira nanoni te hui te fogra ni fogra bi'o teure. 24U thuturigna Jisas gne ne tei fate'o hia te hia ka provens Siria, euwateuwe hatimare u'udi ne mei ka magne nanoni te hui te fogra re. Nanoni ire au tadi soasopa nagleme. Kehare fafufunei, kehare snosnogho, ni kehare blughu. Tutu'ani, Jisas ne kafua fakekelira. 25Chuku nanoni mei funudi ka provens Galili, ka nohi Dikapolis, ka gruru bi'o Jerusalem, ka provens Judia ni ka keha phile kho'u Jodan teure ne tei leghuza Jisas.
© 2025 SIL Solomon Islands