Matiu 2
2
Mae glalase mei funudi ke maghati
1Jisas ne kahra ka gruru Betlehem, ka provens Judia ka miolo teke kegra Nafano mae Herod ie. Ke leghugna te kahra Jisas ie, keha mae glalase te lasera gaoghathodi nathunure ne mei dufu Jerusalem funudi ke maghati. 2Hatimare ne ghuhna eu'ani, “Ahia nate kahra mei ie mae sua ma'ane te mala nomi Nafano ghotolu mae Jiu rea? Gheati kofiza noa nathunu magne ie ne haghe ke maghati. Eume, gheati gne mei mala tufru soruza magne.”
3Kate rogiza igne, mae Nafano Herod ne nanga noa lui, ni eulanauwa ihei te hui te au ka gruru Jerusalem re ne nanga nodi lanauwa. 4Eume, mae Herod ne kiloza kahe faudu maladi mae pirisi ulu ni mae velepuhigna vetula noa mae Moses teure. Magne ne ghuhna eu'ani ka hatimare, “Ahia nate kahra meigna Mae Kraes gnea?” 5Hatimare ne ho'ilepo eu'ani, “Ka gruru Betlehem, ka provens Judia, igne au hna teke i'iniza mae profet Maeka tifa ie:
6“ ‘Betlehem ka provens Judia, ghoe kahe gruru ulu lui i Judia,
eigna kahe mae nafano kaina jifla mei ka ghoe,
ni magne kaina ie kahe mae mala batura nogu nanoni rei Israel re.’#2:6 Maeka 5:2,4.”
7Ke leghugna igne, mae Herod ne kilo faudura mae posa teke mei funudi ke maghati re ne faudu polo baludi hatimare, mala lase fakeliza ka hatimare u tufuni naga'e teke taklegna nathunu ie. 8Agnoni, magne ne kuri tei ra hatimare Betlehem ne lepo eu'ani, “Ghotolu tei hiro fakeliza sua ma'ane teuwae. Euwateuwe, ne kofizana ghotoluni, ke mei farogighau rei euwa, mala tei lanauwa rei tufru soruza magne.”
9Ke leghugna te rogiza hatimare noa goeghoze mae Nafano ie, hatimare jifla ne tei. Euwateuwe, u nathunu teke kofiza hatimare gne ne tei ke uludi ghile noto ke kliagna suga te thuru te au sua ie. 10Kate kofiza hatimare nathunu gne, hatimare ne kafua kelitadi lui balu hneahnegha. 11Hatimare tei ne ruma ka suga ahia te au sua ie ne kofiza magne balugna Mere, dogna ie. Hatimare turununu ne tufru soru hariza magne. Agnoni, hatimare ne thotora nodi vauvaghure, ne gulao hariza magne nodi nahma te fua haghe lui fofolidi re, u golu, u insens, ni u mo. 12Ni God ne lepo faheta lui ka hatimare ka u mifi, mala tovi ke pulo leghuza hatimare nabrau te tei dufu ka mae Nafano Herod ie. Eume, hatimare neke leghuza keha nabrau ie ne pulo ka nodi nau ie.
Thabutua mae Josep ie pelo ne tei Ijip
13Agnoni, ke leghugna te ghae jifla te tei hatimare ie, mae Josep thuru au ne mifi. Kahe engjel noa Lod ne takle mei ne lepo eu'ani ka magne, “Josep, dofra haghe! Udiza sua ie ni dogna ie ni pelo tei Ijip, au ka teuwae au ghile ke lepogho rei teke mala pulo ie. Mae Nafano Herod gne hiroza sua igne, eigna magne ngaguza te falemeza sua ie.”
14Agnoni mae Josep kegra haghe ne tei Ijip farihotei bongigno baludi Mere ni thugna ma'ane ie. 15Mae Josep au ka teuwae au ne ghile leme mae Nafano Herod. Igne ne tufuni horoghoto lui ka goeghozegna Lod teke lepo eu'ani mae profet Hosea tifa ia, “Rei neke kilo fajiflaza mae Thugu ie ka gruru Ijip.”#2:15 Hosea 11:1.
Mae Nafano Herod ne lepo mala falemera sua ma'ane te hui re
16Kate laseza mae Herod te maedi ke maghati re mugnaza magne teuwe, magne ne di'atagna lui. Agnoni, magne ne lepora noa mae soldiare mala tei faleleme hui goro sua ma'ane te au ka gruru Betlehem, ni ka gruru te au falithuza Jerusalem teure. Magne lepora hatimare mala kafua faleme fahuira goro sua ma'ane te phalu finoghadi te soru kate agno kahrana are. Mae Herod eiza igne, eigna leghuza hna teke lepoza maedi ke maghati re ka naga'e teke takle gna u nathunu ie. 17Igne ne tufuni horoghoto lui ka hna teke lepoza mae profet Jeremia tifa ia.
18“Nanoni te au ka gruru Rama re,
ne rogiza kahe naogla, u naogla tahngi ghoghoina ni paopado.
Reseli ne tahngi ghoghoinara thugnare,
ne theome ke muu,
eigna thugnare ne kafua leme.”#2:18 Jeremaea 31:15.
Thabutua mae Josep neke pulo Israel
19Ke leghugna te leme mae Herod ie, kahe engjel noa Lod neke takleni ka mae Josep ka u mifi ka gruru bi'o Ijip, 20ne lepo eu'ani ka magne, “Josep, dofra haghe! Udiza sua ma'ane ie ni dogna ie ke pulo Israel, eigna nanoni teke ngagu ra falemeza sua ie la kafua leme hui.”
21Mae Josep kegra haghe, ne udiza sua ie ni dogna ie neke pulo Israel. 22-23Kate rogiza Josep te mae Akelaus teke mae nafano gna Judia, hno'igna mae magna ie Herod te leme ie, mae Josep ne hmau teke pulo au ka teuwae ie. Agnoni, God ne lepo hariza Josep ka u mifi mala tei retolu au Naesaret, kahe gruru ke hnuagna provens Galili. Igne ne horoghoto lui ka hna teke lepo eu'ani mae profet tifa gna mae Kraes gne, “Hatimare na kiloza magne mae gna Naesaret.”
© 2025 SIL Solomon Islands