2 Tesolonika 3
3
Pol tore ra nanoni khilo'au re mala tarai ra
1Uve kheragura, taraighami gheati mala tangomana noa goeghoze Lod gne te ghose te tei ka nau fate'o hia te hia, malani nanonire kaina tangomana te rogiza ni ghatho boheza eu fagriu teugne, jateula teke eiza ka ghotolu ia euwa. 2Ghotolu eulanauwa tarai ghami gheati malani bara fotighami gheati God ka puhidi nanoni te di'are, eigna nanonire theome kafua fatutu'aniza Grorogo te Keli gne. 3Ni ghotolu fatutu'aniza Lod, eigna magne kaina fahehetaghamu ni barafotighamu ka noa noilaghi mae Satan. 4Gheati farouronu ka Lod eimi ghotolu te mala eira hna teke lepora gheati ka ghotolu ra. Ni eulanauwa gheati laseza te ghotolu kaina eira koba puhi ire. 5Gheati toreza noda Lod mala batura gnagnafami ghotolu re laseza God te nahmaghamu. Gheati eulanauwa taraighamu mala au heta ghotolu jateula Kraes te hneta.
Gnadi ihei te tho'a loku
6Uve kheragura, ka nahngagna Jisas Kraes noda Lod, gheati ngagughami te lepo faheta ka ghotolu. Tovi fafaudu ka nanoni khilo'au te khoitho'a lui ka gloku re. Nanoni te khoitho'a loku are theome leghura fagriu teke gu'ari gheati ka ghotolu ra. 7Ghotolu thaimi laseza hui igne, ghotolu mala leghura puhimi gheati re. Eigna ka teke au gheati balumi ghotolu ra, gheati neke theome tho'a loku. 8Ni gheati eulanauwa neke theome fite atha kahe gano ka nanonire. Gheati thaimi fofoli gobigna goifatare. Leuleghu fata ie, gheati loku heta bongi naga'e, eigna gheati theome ngagughami kahe nanoni ka ghotolu te rugusi gnami gheati ie. 9Gheati eiza igne, neuba gheati ne au nomi noilaghi te mala toreghamu ghotolu mala toghoghami ie. Ni gheati loku mala toghoghami thaimi eigna gheati ngagughami te fagriughamu puhi te keli mala leghuza ghotolu ie. 10Kate au balumi ghotolu ia, gheati neke lepo eu'ani, “Ihei te khoitho'a ie, ghotolu tovi feigea.”
11Gheati lepoza igne, eigna gheati rogiza keha nanoni ka ghotolu re khoitho'a lui. Hatimare theome ke eiza kahe hnana, ni farugusira lana thaidi ka nakahradi keha nanonire. 12Eume, ka nahngagna Jisas Kraes noda Lod, gheati lepo faheta ka hatimare mala au fakeli ni loku heta mala au gedi gano thaidi. 13Ni ghotolu kheragura, tovi baba'o kate eiza gloku te keli ie.
14Jame ihei ka ghotolu te tho'anoa leghuza goeghoze te i'ini ari gheati ka ghotolu ire, ghotolu kaina tangomana kofu falaseza au lana mae teuwae. Tovi fafaudu ka magne malani mamaza magne ka puhigna thaigna re. 15Ni tovi kofu fapariza jateula nomi naoka euwa. Te keli ie, ghotolu lepo faheta lana ka magne, eigna magne kherada tati ka khilo'au.
Noa goeghoze leghu lahu mae Pol
16Rei toreza Lod, mae funeigna keliphari ie mala gu'ari harighamu keliphari leuleghu naga'e ka puhi te hui re. Lod te au balumi ghotolu.
17Rei mae Pol te i'iniza letasi igne ka khamegu thaigu ni gu'ari nogu nahma harighamu. Ka letasi te hui re, rei i'ini nahngagu ie mala laseza ghotolu te funu ka rei teuwe. Igne puhi te eiza koba rei ie.
18Rei toreza noa kokofakasai Jisas Kraes noda Lod mala au balumi ghotolu. Me hui. Rei, mae Pol.
© 2025 SIL Solomon Islands