2 Tesolonika 2
2
Puhi di'a kaina takle mei
1Uve kheragura, gheati ngagughami te lepo ka ghotolu gna naga'e meigna noda Lod Jisas Kraes ni noda salofaudu tati balugna magne ie. 2Gheati toreghamu ghotolu mala tovi ghose di'agnagnafami, ba jahna nomi kate rogira ghotolu nafnata goeghoze ire, “Noa naga'e Lod gne la mei hui.” Meula lepo muamugnaghamu hatimare eu'ani, Tharunga te Blahi ie teke lepoza igne, ba ne lepo gheati, ba neke i'ini gheati ka nomi letasi re. 3-4Tovi sakreza kahe nanoni mugnaghamu, eigna naga'e meigna noda Lod Jisas Kraes gne theome tangomana te mei au ghile dufu mei naga'e chuku nanonire nate figri pogruza God ie. Euwateuwe, mae te kiloza hatimare, “Mae mala huhughuza vetula ie” teugne, magne kaina kulu mei lanauwa. Magne kaina ie lepo fadi'ara gobigna puhi te tufru sorura nanonire, balu nodi gobi nafnata god re. Euwateuwe, magne kaina ghatho boheza thaigna jateula kahe mae te ke uludini gobigna goifata te tufru sorura nanonire euwa. Magne eulanauwa kaina ie tei hokro hnua ka noa Suga Blahi God ni lepoza te magne lana God ie. Ni meuba, God kaina ie re'oza mae te di'a teuwae.
5Ba, kela ghatho ihora hui lana ghotolu puhi teke lepora rei ra? Rei neke lepora puhi ire kani au na teke au rei balumi ghotolu ia. 6Mae mala huhughuza vetula gne kaina ie takle mei ka noa tufuni naga'e thaigna. Ni ghotolu laseza hui ka teuwae kahe noilaghi te fotiza magne te theome takle mei gignoa igne. 7Ni Tharungagna mae mala huhughuza vetula gne loku heta hui ka nauthoglu gne gignoa igne. Ni magne polo au ghile dufiza naga'e God nate atha famaghaniza ka nabrau noilaghi te fotiza magne te theome eira puhi ire. 8Ke leghugna igne, mae mala huhughuza vetula ie kaina tufuni takle mei. Noda Lod Jisas kaina falemeza magne ka phapanga te jifla mei ka naflogna ie. Uve, ka naga'e pulo meigna Jisas ie, noa noilaghi magne kaina ie siasigla mei mala re'oza mae teugne. 9Ni mae mala huhughuza vetula gne kaina mei ka noa noilaghi mae Satan, euwateuwe magne kaina ie eira chuku kofunaboboi muamugna, falalase ni puhi bi'o mala vere nanonire. 10Magne kaina ie eira chuku nafnata muamugna te di'a mala mugnaza ihei mala leme ni theome athiza u tufuni nakahra ie. Hatimare kaina leme eigna hatimare ne tho'anodi nahmaza ni leghuza eu goeghoze te tutu'ani gna Lod, mae ihei te tangomana te fakahrira re. 11Eume, God kaina ie sakre laoza ka nafnata nanoni ire kahe noilaghi mala fatutu'anira thuturi te muamugna re. 12Ni God kaina ie fate falemera me hui, eigna hatimare ne tho'anodi fatutu'aniza goeghoze te tutu'ani ie, ni kelitadi te eira fatheve puhi te di'are.
Kegra heta
13Uve kheragura, noda Lod tufuni nahmaghamu lui ghotolu. Uve, gheati thokami lui te lepo fakeliza God koba eimi ghotolu ie, eigna God neke fafateghamu ghotolu ame vuavuhana nauthoglu gne mala fakahrighamu. Ghotolu mala noa nanoni blahi God kate fatutu'aniza ghotolu goeghoze te tutu'ani ie, ka noa noilaghi Tharunga te Blahi. 14Ka Grorogo te Keli te mei ghaghazalaza gheati gne, God neke kiloghamu ghotolu mala noa nanoni blahi. Eulanauwa, God neke kilo meighamu ghotolu mala athiza u tufuni nakahra te mei ka noda Lod Jisas Kraes ie.
15Eume kheragura, kegra heta ka nomi fatutu'ani ni loku famaku ka fagriu teke gu'ari gheati ra. Gheati neke fagriughamu ghotolu ka goeghozemi ni ka letasi.
16-17Gheati tarai ka noda Lod Jisas Kraes thaigna ni God Mada mala fameomego ni fahehetaghamu ka gobigna puhi te keli te eira ba lepora ghotolu re. God nahmaghita, ni ka noa kokofakasa ie, magne ne gumei harighita grouronu te keli ni fameomegoghita koba, tifa e tifa.
© 2025 SIL Solomon Islands