Roma 8
8
mianger za wayway kana Vangesar Lu'em
1a harem, nazu na kazu kana uwavaawan ni Kiristo Yēsu i savakan na trau mu 'azi kipupamelriyan. 2'alrana nantu kuret na Vangesar Lu'em mu, maw izu na parepukasa kanta kani Kiristo Yēsu zi kiveray za uwavaawan, muvakevak #8.2 <<ta>> zuma ulra pidaya awatranan lulun vinavalray za <<inu>>.lra kemay kana pinamelriyan zi na kiyanatrayan kanantu kuret. 3tu kuret ni Mosē 'alrana tu apelran za trau zi 'azi maruwa mudaway, mawmu tu dawayaw lra na Viruwa i itras. pazuwa kanantu Alrak i intaw na Viruwa i itras, tu paresanaw kanta na trau za mipinamelriyan#8.3 <<zi intaw ... mipamelriyan>> karuwa marengay za <<melak lra za kiresan kaniyam na mipamelriyan na zazek parevaawaw>>., muramawan sayvang kana trau tu kakuwayanan i savakan na pinamelriyan, pulakaw na pinamelriyan. 4na Viruwa i itras kemani kemakuda mu maw na pula'esi kana kuret zantu kiniyami na patezelr i kanta na 'azi miyaturus za pauwayan, mawmau miturus kana Vangesar Lu'em na trau i zazek. 5'alrana, na miyaturus kana pauwayan na trau mianger kana pauwayan na lremak; na miturus kana Vangesar Lu'em na trau mu mianger kana Vangesar Lu'em na lremak. 6na mianger kana pauwayan mu maw minatray; na mianger kana Vangesar Lu'em mu ulra a uwavaawan zi na ping-an. 7semeneng, na mianger kana pauwayan na trau mu mawna kima'etrev kana Viruwa i itras; 'alrana 'azi miyaturus zantu kuret kana Viruwa i itras, tematena' mu kemazu 'azi maruwa miturus. 8na miyaturus kana pauwayan na trau mu 'azi maruwa kituluz za saharan kana Viruwa i itras.
9kemata kanmu, nu kemazu tu Vangesar Lu'em na Viruwa i itras kazu kanmu i savakan, nanmu wayway zi 'azi lra kidikes kana pauwayan. mawmau kidikes kana Vangesar Lu'em. na iniyan za Lu'em ni Kiristo na trau mu amelri na muravak kani Kiristo. 10mawmu, nu kazu i Kiristo kanmu i savakan, ara kiyanatray nanmu zazek za pinamelriyan, tu vaawaw mu kana Lu'em na Viruwa i itras#8.10 <<tu vaawaw mu kana Lu'em na Viruwa i itras>> karuwa marengay za <<nanmu 'ulasan vavaawaw>>., 'alrana Viruwa i itras tu pakanu patezelr na trau mu lra. 11nantu Lu'em na Viruwa i itras taw parevaawaw i Yēsu kemay kana minatray; anu ini na Lu'em kazu kanmu i savakan, nu kemazu mu, ini na parevaaw kani Kiristo kemay kana minatray na Viruwa i itras, zi tu i pakalranganay kana kazu i savakan kanmu na Vangesar Lu'em, veray za uwavaawan kananmu zazek na 'azika'azi minatray.
12mawna kemani, wadadiyan a, maw ta na mikiyam, mawmu amelri mikiyam kana pauwayan, kidikedikes kananta pauwayan vaaw. 13nu miturus mu zanmu pauwayan mu, 'azika'azi minatray; nu kuretalrasez mu kana Vangesar Lu'em pinatray kana paelrangan na pinamelriyan mu, 'azika'azi vaaw. 14na kipanadam kinezeng za Lu'em kana Viruwa i itras na trau ziya mu nintaw lralrak na Viruwa i itras mapapiya. 15'alrana, nantu iveray kana Viruwa i itras na Lu'em amelri temukakuli kanmu, zi pikazuwaw mu kana kakaudan i savakan, mawna ulraya mu mingadan za alrak kana Viruwa i itras. pakalrang kana Vangesar Lu'em, venina ta kana Viruwa i itras: <<Ama! i Amalri!>> 16nantu Lu'em na Viruwa i itras zi nanta lu'em mukasa wasay za maw ta tu alrak kana Viruwa i itras. 17anu maw alrak kaza Viruwa i itras, zi ulra ta pa'inava zantu ipadang kanantu zinekalranan na ka'inavayan, zi uwakasa ta kani Kiristo pa'inava kanantu ivilin kantaw na Viruwa i itras; 'alrana, nu sempad ta mikaza zantu ulepan ni Kiristo mu, zi kiyasepad ta pa'inava zantu lihu.
lalihu nu aziyu lra
18kema ku mu, nanta ulepan harem zi na uri pakurena'u kanta nu aziyu lra na lihu ta parepana'uwaw mu 'azi araeman. 19na dinaway ziyan pakasa kiyalrima zantu lihu na Viruwa i itras mupana kurena'u kemay kanantu lralrak. 20'alrana mudaway ziyan muvalis zi iniyan, amelri kemay kanantu kiniyaanger, mawna kemay kana nirangeran na Viruwa i itras. mawmu, na kidaway kemazu talrima. 21ulra a saya wari karuwa mulapus kanizu na kararametr na tra'tra', zi maruwa mukasa kanantu lralrak na Viruwa i itras pa'inava kana muvuwar na milihu. 22malrazam ta, palru harem, zemazema na dinaway ziya, kamawan za makalrang kana miaalrak na nanayan. 23amelri mawmau na kidaway kemani, inta na kiveray kana ngawangaway mavul na vuwa' mu, mawna kiveray kana Vangesar Lu'em na trau, zi kazu i anger zemazema mengaz, mengangara kana Viruwa i itras temu alrak kanta#8.23 ulra pidaya awatranan lulun iniyan za <<mengangara tu i alrakaw ta kana Viruwa i itras temulralrak>>., zi maruwa ku muvuwar peniya i inku. 24'alrana, maw ini na talrimayan, zi muvaaw ta. izu na kurena'u na katalrimayan amelri katalrimayan. i eman na talrima ziya kanantu nina'uwan awa? 25nu talrima ta kanizu na 'azi kurena'u mu, zi maruwa ta semaseker mengangara.
26mararesan, nanta apelran ulra puwaalrang na Vangesar Lu'em. a mawziya 'azi ta malrazam kemudakuda kiyanun; mawmu na Vangesar Lu'em manay kana 'azi ta maruwa marengay kanizu na zemazema mengaz muramawan kanta kiyami kana Viruwa i itras. 27na patulre'ay mena'u kana anger za trau na Viruwa i itras malrazam kanantu nirangeran na Vangesar Lu'em, 'alrana Vangesar Lu'em paturus kanantu nirangeran na Viruwa i itras, venulas kanantu zinekalranan kiyami.
28malrazam ta, na Viruwa i itras tu parepauwauwayaw na eman ziya, na sahar kana Viruwa i itras na trau -- maw intaw tu iturusanay kanantu nirangeran venina demaulr na trau melak za 'inavaya mapiya#8.28 <<na Viruwa i itras tu ... 'inavaya>> karuwa marengay za <<na Viruwa i itras zi na sahar kantaw na trau, maw na iturusanay zantu niranger i intaw penaiz venina na trau, ulra za ka'inavayan mapiya>>.. 29'alrana putralri malrazam na Viruwa i itras kanazu, taw piyanguwayanaw palimi' nazu, paresanaw nazu kanantu Alrak ulra maresan tu pinakamelriyan. nantu alrak maruwaya kazu kana inukasayan na sinziya i savakan mutu ma'izang. 30tu piniyanguwayan pinalimi' na trau kana Viruwa i itras, venina demaulr kanazu i intaw; nantaw vinina dinaulr na trau, intaw pakireveng marengay kanazu za maw patezelr a trau; i intaw pakireveng marengay za patezelr a trau na trau, tu pakurelrangaw pa'inava za lihu nazu.
lramanan na Viruwa i itras kemay kani Yēsu mupana
31anu maw kemani mu, kakuwa ta za eman marengay awa? nu kazu ziya na Viruwa i itras kanta i kani mu, i eman na karuwa kima'etrev kanta ziyamaw? 32arusay za 'azi tu kalramani nantu Alrak, tu verayanay kanta na trau ziya. nu kemani lra mu, intaw 'azi tu i vaverayan kanta temulrikakuwa kana eman ziya ziyamaw? 33i eman na karuwa kokso kanantu pinalimi' na trau kana Viruwa i itras ziyamaw? piya lra marengay pakalrazam na Viruwa i itras za iniyan lra za pinamelriyan nazu! 34nu kemazu mu, i eman na karuwa ziya kemuret zantu pinamelriyan nazu ziyamaw? tatena' za amelri i Kiristo Yēsu! maw minatray lra i intaw, tematena' mu rarengay za marevaaw lra, harem kazu i tarawalran kana Viruwa i itras venulas kanta kiyami kana Viruwa i itras i izu na sasa! 35anu maw kemani lra mu, i eman na karuwa penulret pareput kanantu lramanan ni Kiristo kanta ziyamaw? maw a kuwaatrengan ziyamaw? are'etran ziyamaw? pakakuwatreng ziyamaw? savelawan ziyamaw? kalramalraman ziyamaw? kakaudan ziyamaw? na tazaw zi ilrus ziyamaw? 36kamawan kana nirengay i Sēsiyo:
muramawan zannu nirekudayan, iretra' mi za kiyanatrayan kana wariwari;
na trau tu kamawanaw mi kana tratruwaken na takulris.
37amelri peniya! kanini na lremak ziya, kuretalrasez ta kana lraman kanta na Luzu kiseker ta lra mutulre'ay! 38'alrana pakutatena' ku patulre'ay, na eman ziyan 'azi karuwa penulret pareput kanta kanantu lramanan na Viruwa i itras. nu kiyanatrayan lra, nu vaaw, nu maw na tēnsi, nu maw na demadikes za kezang i ka'ulasan; nu maw harem, nu aziyu lra; 39nu maw i itras i lingatr, maw na asavak iniyan za paalruwan; i kani na dinaway ziyan i savakan kana rukup, iniyan za lremak karuwa penulret pareput kanta zi kanizu na Viruwa i itras tu pinakalrang kananta Luzu i Kiristo Yēsu zantu i veray kanta na lramanan.
Currently Selected:
Roma 8: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023