Roma 7
7
paruwalru kana nire'azinan
1wadadiyan a, mawmu na malrazam za kuret mapiya, semeneng 'azi mu ka'azi malrazam kananku rarengayan: nantu iyadikes na kuret kana trau nu vaaw ziya mu ulra tu pauwayan. 2paruwalruwanay marengay, na mi'azin lra na vavayan mu, nu vaaw ziyan nantu 'azin ma'inayan, zi kazu kana kuret i savak kidikes; nu minatray lra nantu 'azin, zi 'azi lra kidikes kanini na kuret i intaw. 3mawna kemani, nu vaaw ziyan nantu 'azin na ma'inayan mu, nu kire'avalr intaw kana zuma na ma'inayan mu pinakasemiya' na vavayan; anu minatray lra na 'azin na ma'inayan mu, i intaw kazu kana kuret mu maw a muvuwar lra na trau, nu masalr mi'azin kana zuma na ma'inayan mu, 'azi semiya' kema. 4wadadiyan a, nanmu nirekudayan mu maw kemani. marengay kazu kana kuret, minatray mu lra, 'alrana nintaw mu ulra zazek ni Kiristo a saya; harem muravak mu lra kanizu na marevaaw kemay kana minatray i Luzu, maruwa ta lra pakirungetr kikarun kana Viruwa i itras. 5a miyaturus ta ziya zanta pauwayan na trau i wayway mu, nantu kuret ni Mosē kemakezeng zanta alengatran pamelri, kazu ta zazek muvasuk, i likuzan lra mu maw minatray. 6mawmu, harem na kuret 'azi lra maruwa demikedikes kanta; 'alrana kemay kana demikes kanta na kuret marengay mu, minatray ta lra. 'azi ta lra miyaturus kana awatranan na kudayan kana valray na kuret, maw iturusanay kana Vangesar Lu'em nantu pakalrazam na vekalan kikaruna kana Viruwa i itras.
na kuret zi na pinamelriyan
7nu kemazu mu, karuwa ta marengay za na kuret maw a pinamelriyan ziyamaw? tatena' za 'azi! mawmu, pakalranganay kana kurut, zi malrazam ku lra na pinamelriyan kema za eman. anu amelri marengay na kuret za <<ikaalengatr>>, zi 'azi ku kalrazam za a eman na alengatr. 8na pinamelriyan pakalrang tu seratr na kuret, maaya' za penauwa na wari, kemakezeng zanku anger mupana na marekudakuda na alengatran. iniyan na kuret mu, a pinamelriyan mu iniyan za kapauwa na wari mupana. 9aziyuziyan vaaw ku kana kuret i panayan; likuzan lra ulra lra tu seratr na kuret, marekakerarevat lra na pinamelriyan, 10i likuzan lra mu minatray ku lra i pinamelriyan. mawna kemani seratr na kuret maw paelak za uwavaawan kana trau; mawmu, kema ta kaninku marengay mu, muveliyas murung za kiyanatrayan i intaw. 11'alrana pinamelriyan pakalrang tu seratr na kuret miya' za penauwa na wari venavetra' kaninku, zi pakalrang kanantu seratr na kuret zi puwayanay ku kana kiyanatrayan.
12na kuret ni Mosē maw na vulay; tu seratr na kuret maw na vulay, paresaresan, zi 'iyanavayan. 13kuwaniyaw marengay mu, maw izu na 'iyanavayan piyanatray kaninku ziyamaw? tatena' za amelri! mawmau na pinamelriyan pakalrang kana 'iyanavayan, murung kana kiyanatrayan, muramawan za puwapuwa kurena'uwa na tatena' tu nirekudayan za pinamelriyan. pakalranganay tu seratr na kuret, nantu kuwatrengan na pinamelriyan mu mareka kerevat lra.
penungaw na trau
14malrazam ta, tu kuret ni Mosē mu kazu i ka'ulasan; mawmu maw ku muravak kana zazek na trau, trima'anay lra kana pinamelriyan putu kuli. 15kemuda zi 'azi ku malrazam zanku kinakudayan; 'alrana nanku kinawai, 'azi ku mukuwa kemakudaya; nanku kinaawiles mu, muveliyas mukuwa ku kemakudaya. 16anu mukuwa ku kemakudaya za 'azi ku muwai kemakuda na lremak mu, 'azi ku ka'azi pakanumau kana kuret za maw a pamaw. 17anu maw kemani, nanku kinakuda amelri tatena' za i inku na kemakuda, mawna ulra i savakan kaninku na pinamelriyan na kemakuda. 18zi malrazam ku, i savakan kaninku mu, mawna kazu kananku pauwayan i savakan, iniyan za 'iyanavayan. 'alrana, ulra ku anger muwai kemakuda za 'inava. mawmu iniyan ku za kezang kemakuda za 'inava. 19nanku kinawai na 'iyanavayan, 'azi ku makuwa kemakudaya, nanku kina'aziyan muwai na kuwatrengan, muveliyas mukuwa ku kemakudaya. 20anu kemakuda ku kananku kina'aziyan muwai kemakuda mu, zi temaranu i ini mu amelri inku na kemakuda, maw izu na ulra i savakan kaninku na pinamelriyan na kemakuda.
21mawna kemani, marulrazam ku ulra a saya kuret na parekakuda; a maranger ku mukuwa kemakuda za 'iyanavayan mu, marayas venutivut na kuwatrengan kaninku. 22nanku anger misaharan kanantu kuret na Viruwa i itras. 23ku zazek kiringiz za zuma a saya za kuret -- ini na pinauwayan matatengez kananku kinasahar na kuret i anger, tu paka'aziyaw ku kiruwaday kanizu na demadikus kaninku na pinamelriyan tu kuret; ini na kuret kazu kananku zazek tremiyur parekakuda. 24tatena' ku lra za maulep a! i eman na karuwa venaaw kaninku puwaday kanini na piyanatray kaninku na zazek nay? 25lrayuwan kana Viruwa i itras, pakalrang kananta Luzu i Yēsu Kiristo, maruwa venaaw kaninku i intaw.
nanku nirekudayan mawna kemani: inku mawmau maruwa kazu i anger miturus kanantu kuret na Viruwa i itras, mawmu nanku zazek miyaturus kanantu kuret na pinamelriyan.
Currently Selected:
Roma 7: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023