Roma 14
14
iparevativati kemuret za trau
1na trau na apelr tu pakutatena'an, muwa kituluzaw i intaw, nu ulra lra a kirekamelri za nina'uwan i intaw mu, amanan na kimasaki kantaw. 2na trau na mipakutatena'an maekan za eman ziya; na trau na apelr tu pakutena'an mawmau maekan za kulang. 3na maekan za eman ziya na trau mu iauwa kemakiteng mena'u kana 'azi maekan; na mawmau maekan kana kulang na trau mu amanan na parevativati kemuret kana maekan za eman ziya, 'alrana kituluz lra na Viruwa i itras kantaw. 4i eman u, maruwaruwa u parevativati kemuret kanantu pakarunan za trau? nantaw tawki 'azi maruwa parekuret zantu kinasayhuwan zi kina'ulid ziyamaw? arusay za, maruwa puwalrang i Luzu kantaw, tu karuwayaw mudaway i intaw.
5ulra a trau mianger za ini na saya wari marapazangal kana zuma na saya wari; zi ulra a trau mianger za na ulra ziyan na wari mararesan pazangal peniya. pauwayanay mu na kurisaesa mapiya ulra nantu nina'uwan nilrazaman. 6ulra a trau pakamelri kemapazangal mena'u za zuma a saya wari, temara semungal kani Luzu i intaw; ulra a trau maekan za eman ziyan, kemazu temara semungal kani Luzu, 'alrana muramawan zantu inekan na aekanan lrayuwan kana Viruwa i itras i intaw. ulra a trau 'azi maekan za zuma na aekanen, mararesan temara semungal kani Luzu, zi lrayuwan kana Viruwa i itras. 7kanta i savak iniyan za trau mawmau muramawan vaaw kantaw i intaw, zi iniyan za trau mawmau muramawan minatray kantaw i intaw; 8vaaw ta, maw muramawan kani Luzu zi vaaw; minatray lra, maw muramawan kani Luzu zi minatray. semeneng, nu vaaw lra, minatray lra, maw ta muravakan kani Luzu na trau. 9mukuwa kanini, minatray i Kiristo zi marevaaw ziya, nantaw pauwayan mu mutu Luzu kana vaaw na trau zi na minatray na trau. 10nu kemazu mu, i inu, kemuda zi parevativati kemuret u kanannu wadiyan ziyamaw? kemuda zi demulu u mena'u kanannu wadiyan? katiyakezir ta mapiya kana Viruwa i itras i ngawayan kisayvang kantaw; 11'alrana marengay na Sēsiyo:
marengay i Luzu: temuzu' ku kananku kavaaw putani za ngay,
na trau ziyan kalrituzu semungal kaninku;
na trau ziyan rarengay pakanu maw kaninku za maw na Viruwa i itras.
12marengay kemani mu, inta na kurisaesa auwa ta kana Viruwa i itras pakalrazam kananta pinakalrangan.
ipalralradu' za trau kana singko
13semeneng, 'aziya ta lra masasalr mareparevavati kemuret; kemazuwa ta kemuret za anger, amanan kemakuda za eman palradu' papamelri kana trau. 14ku pakalranganay kani Luzu i Yēsu niyam kireeman za maredalrep zi patulre'ay malrazam, mukirungetr na aekanan peniya; nu ulra a trau 'azi mukirungetr i izu kema mu, nu kemazu mu, pauwayanay kanini na trau marengay, i izu mu maw na 'azi mukirungetr lra. 15nu muramawan za aekanan zi venuli' u tu anger za wadadiyan, nannu kinakuda mu amelri mupana za lramanan i anger. amanan muramawan zannu aekanan zi kemuwatreng za sasa kana pinaruveliyan minatray ni Kiristo na trau! 16nannu pinaka'inava na lremak amanan na kipungadan za kuwatreng. 17'alrana na pinitrepa tu kezang na Viruwa i itras 'azi ulra kana aekanen, maw na kazu kana Vangesar Lu'em tu iveray na paresaresan, mareka'inavanava, semangalan. 18na kemani kikarun kani Kiristo na trau mu 'azika'azi kiveray za kasaharan kana Viruwa i itras zi kipakasemangal kana trau.
19semeneng, pakirungetra ta miya' kanizu na pareka'iyanava, mareparaharahan za inulepunan na lremak i wayway. 20amanan muramawan kana aekanen zi kemuwatreng kanantu kiyakarunan na Viruwa i itras. na aekanan peniya karuwa ta mekan, mawmu nannu inekan nu palradu' tu singko za trau mu, pamelri lra i izu. 21semeneng, mara'inavanava na 'azi mekan kana 'alum, 'azi tremkel za kutra, 'azi kemakuda za palralradu' kananu wadadiyan na lremak. 22kemuda nannu iyana'u kanini na kiyaumalran, maw nannu kireeman kana Viruwa i itras na lremak. na trau maruwa kema kazu za pamaw na lremak 'azi maselru kantaw i intaw mu kemuda kana mika'inavayan awa! 23mawmu, nu malrivak kanantu inaekan, nu kemazu mu, nu maekan i intaw mu, na Viruwa i itras kakuret kanantu pinamelriyan, 'alrana intaw 'azi pakalrang za pakutatena'an mekan. na 'azi pinakalrang kana pakutatena'an zi kinakuda na lremak mu maw a pinamelriyan peniya.
Currently Selected:
Roma 14: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023