Yohanē 11

na kiyanatrayan ni Lazaru

1ulra a sasa na kuwaaleng mingadan kani Lazaru, kaazu i Bētaniya, i Maliya zi i vautaw i Maruta kaazu i kanini na zekalr. (2ini i Maliya maw izu na melak kana ulringulr na lrawlraw mitrul kanantu kuy ni Luzu, melak kanantu 'arevu mitrul pakatrarangtrang. na kuwaaleng i Lazaru maw i waditaw na ma'inayan.) 3izu na zazuwa marewadi pakarun za trau mukuwa kirepana'uwa kani Yēsu, marenagay: <<Luzu a, nannu kinalraman na 'ali'an kuwaleng lra.>>

4a kinger i Yēsu kanini na lremak mu marengay: <<tu kuwalengan ni Lazaru mu 'azi kiyanatray, maw na puwalihu kana Viruwa i itras, pawnung mawna kemani zi kipulihu tu Alrak na Viruwa i itras.>>

5i Yēsu taw kemazuwan lraman kani Maruta zi kani waditaw na vavayan, zi lraman kani Lazaru. 6a kinger i intaw za kuwaaleng i Lazaru na lremak mu, patrutru kazu ziya muvilin kanantu kinazuwan za zuwaya wariyan. 7zi marengay i intaw kana temakesi: <<arelra kaya ta ziya i Yodaya mu.>>

8marengay nantu temakesi: <<sinsi, a pakangawayan, na Yodaya na trau maelak za varasa' temengez kannu, maranger u ziyan mukuwa i kazu ziyamaw?>>

9marengay i Yēsu: <<nu 'uninan amelri ulra muketrep zi zuwaya tuki ziyamaw? makawang nu 'uninan na trau, 'aziya malradu', 'alrana mena'u kana senan i punapunan. 10na trau makawang i 'aremengan, zi kalradu', 'alrana iniyan za senan i intaw.>> 11i Yēsu a marengay lra kananni na ngay mu, masalr ziya marengay: <<niyam 'ali'an i Lazaru turin alrup'e lra, auwa ku venalruka kantaw.>>

12marengay na temakesi: <<Luzu wa, nu maw alrupe' lra i intaw, ka'inava i intaw.>>

13tatena' mu, tu pauwayan ni Yēsu mu marengay kani Lazaru za minatray lra; mawmu nazu kaulra mu mararengay i intaw za tatena' za alrupe'. 14kemazu ziyanay i Yēsu patulre'ay marengay kanazu: <<i Lazaru minatray lra, 15muramawan za maruwaya mu pakutatena', mara'inava nu 'azi ku kazu i kazu. harem mukuwaya ta mena'uwa kantaw mu.>>

16i Tomas (na ipu'avalr kani 'idar) kema marengay kana zuma na temakesi: <<kurelranga ta kani sinsi mukuwa, mukasa kantaw minatray lra mu!>>

na marevaaw zi na uwavaawan i Luzu

17i Yēsu meredek lra i Bētaniya, malrazam za i Lazaru trinevelr lra a pakangawayan za pata wariyan. 18i Bētaniya zi i Yērusalem maretralri za 'azi teluwa kiro; 19ulra papida i Yodaya na trau zuwa mena'uwa kani Maruta zi i Maliya, muramawan kani waditaw nazu za minatray zuwa demele'usa kanazu.

20i Maruta kinger kani Yēsu za 'aulray lra, zi mupatraran zuwa kiyatrevunga kantaw; mawmu i Maliya kazu muvilin i ruma'. 21i Maruta marengay kani Yēsu: <<Luzu a, nu kazu u i kani, zi i wadilri na ma'inayan 'azi kiyanatray! 22mawmu malrazam ku, arusay nu harem, nu kiyami u lra za eman kana Viruwa i itras mu, i intaw 'azika'azi veray kannu.>>

23marengay i Yēsu kantaw: <<i wadiyu 'azika'azi marevaaw.>>

24marengay i Maruta: <<malrazam ku kazu kana uwaludusan na wari mu 'azika'azi marevaaw i intaw.>>

25marengay i Yēsu: <<maw ku na marevaaw, mawna uwavaawan. na pakutatena' kaninku na trau mu, ara minatray lra mu, kuwaazu kavaaw; 26na vaaw zi pakutatena' kaninku na trau mu 'azi kiyanatray munayun. pakutatena' u kanini peniya ziyamaw?>>

27temuvang i Maruta: <<Luzu a, ai! pakutatena' ku za maw u izu na zazuwa i punapunan i Kiristo, maw na Alrak na Viruwa i itras.>>

matrangis lra i Yēsu

28marenagay i Maruta kanini na ngay zi muruma' lra, masiyas marengay kani waditaw i Maliya: <<'aulray lra i sinsi, venavina kannu i intaw.>> 29i Maliya kinger kanini na ngay, payas marahan, mukuwa kirepana'uwa kani Yēsu. (30a azu i Yēsu 'azi ziyan musavak i zekalr, kazu ziyan kanantu kiniyatrevungan ni Maruta na kinazuwan.) 31nazu na mukuwa i ruma' demele'usa kani Maliya na Yodaya na trau mena'u kantaw za mahelrahelr marahan mupatraran, zi kurelrang kantaw, kaulra makuwa i trevelran trematrangisa kema.

32i Maliya zuwa kani Yēsu i kazu, a mena'u kantaw, zi mihelrupu i kakuyan kantaw, marengay: <<Luzu a, nu kazu u i kani mu, i wadilri 'azi kiyanatray!>>

33i Yēsu mena'u kani Maliya za matrangis, zi mena'u kana kurelrang mukasa kantaw na Yodaya na trau kazu trematrangis, salaw nana i anger, pasalaw mavangavang, 34zi kiyumalr kanazu: <<mu trevelraw i iyan i intaw?>>

temuvang nazu: <<Luzu a, 'alrazi alamu na'u.>>

35matrangis lra i Yēsu. 36mawna kemani zi na Yodaya na trau marengay: <<na'uwi, kemudakuda kana lraman kanini na trau i intaw!>>

37mawmu ulra papida a trau marengay: <<pali'atr lra kanantu matra na mavutri' na trau i intaw, kamelriya lra 'azi maruwa paka'azi minatray kani Lazaru ziyamaw?>>

parevaaw kani Lazaru

38i Yēsu salaw mavangavang i anger. i intaw zuwa kana trevelran i ngawayan; izu na trevelran maw a saya vuwang, kana uwasavakan ulra inetrav za saya varasa'. 39patalru i Yēsu: <<sanininu na varasa'!>>

i vautaw na minatray i Maruta marengay: <<Luzu a, i intaw trinvelr lra za pata wariyan, 'angtrul lra na inulid!>>

40marengay i Yēsu kantaw: <<'azi ku marengay kannu lra, nu pakutatena' u mu nana'u u kanantu lihu na Viruwa i itras ziyamaw?>> 41kemazu zi nazu tu pusanininaw na varasa'. i Yēsu teme'ang piyaitras, marengay: <<Ama a, lrayuwan ku kannu, 'alrana kinger u lra kaninku. 42malrazam ku za marayas u kinger kaninku; mawmu marengay ku kanini na ngay maw muramawan kananni i paliyus na trau, muramawan kanazu za pakutatena'a za maw i inu na pazuwa kaninku.>> 43a piya marengay kanini na ngay, kematamuni zema'ung i intaw: <<Lazaru, upana!>> 44zi izu na minatray lra na trau mu mupana, tu lima zi na kuy niliputr za inuwan, i mudingan kemazu niliputr za himpu. i Yēsu patalru kanazu marengay: <<vakevaki i intaw, puveruku i intaw!>> mianger mulrek pinatray kani Yēsu

mianger mulrek pinatray kani Yēsu

(Matay 26.1-5; Maruko 14.1-2; Luka 22.1-2)

45kazuwan na zuwa mena'uwa kani Maliya na Yodaya na trau mena'u kanantu kinakuda ni Yēsu, zi pakutatena' lra kantaw. 46mawmu ulra papida a trau muveruk mukuwa kirepana'uwa kana Palisay na trau, pakalrazam kanazu kanantu kinakuda ni Yēsu. 47mawna kemani, kaygi na Palisay na trau zi na ma'izang na rahan, kazu kana kaygiyan marengay: <<ini na trau pupana za sazu a karepalripalri, kuwadakuda ta awa? 48nu ta paturusay i intaw kemani parekuda mu, pakutatena' lra mapapiya kantaw, na Roma na trau zazuwa 'emarawa kananta vangesar ruma' zi na 'inalrayan!>>

49kanazu i savakan ulra a sasa mingadan kani Kayafa, a maw na tinuma'izang na rahan azu na 'ami. pupana za ngay i intaw: <<ma'ulid mu za eman ziyan! 50na sasa paruveli minatray kana 'inalrayan mapapiya, munu kipalremes na 'inalrayan mapapiya. kamelriya lra 'azi ta maruwa mena'u mara'inava kanmu ini na saya na lremak?>> 51tatena' mu, ini na ngay amelri kemay kantaw mupana, a 'alrana a azu kana 'ami i intaw maw na tinuma'izang na rahan, putralri marengay i intaw za i Yēsu paruveli minatray kana Yodaya na trau; 52'azi mawmau paruveli kanazu minatray, zi puwazukaw na mutepi' kaazu i makaiyaiyan ziya na lralrak kana Viruwa i itras, mukasa musalepun.

53kemay a azu, maranganger za piyanatray kani Yēsu tu yawan i Yodaya na trau. 54mawna kemani zi i Yēsu 'azi lra kazu i Yodaya na pinidare'an kemakuda kana trau i ngawayan. mukuwa i intaw a saya adalrep kana alalas. a Ēvuraim kinuwa na kazekalran, mukasa kana temakesi kaazu i kazu.

55adalrep lra tu palalavat na wariyan i Yodaya na trau. pakangawayan kana wariyan, kazuwan na kemay i zazekazekalr mukuwa i Yērusalem, kaazu i kazu kurelrang kana kiyarungetran na kakuwayanan. 56makaiyaiyan maaya' kani Yēsu nazu; a muwaazuk i vangesar ruma' nazu mu, marekiumaumalr: <<kemuda kema u, 'azi zazuwa kurelranga kana wariyan i intaw nay?>> 57nazu na ma'izang na rahan zi na Palisay na trau piya lra semeratr a aidan ziya: nu ulra a trau za malrazam kani Yēsu za kazu i iyan mu, 'azika'azi pakalrazam, maruwaya mukuwa 'emevanga kantaw nazu.

Currently Selected:

Yohanē 11: TPN

Highlight

Copy