Yohanē 10

na paruwalruwan kana puwatakulrisan

1marengay ziyan i Yēsu: <<kemapazangala ku marengay kanmu, izu na 'azi makalrang i sulray musavak kana puwatakulrisan, zi kemay saninin muharaharang musavak mu, maw na matrakaw, maw na male'es. 2izu na musavak kemay kana sulray mu, maw na purarikan kana takulris. 3na mailran kana sulray tu trewalranay na 'alrevan kantaw, tu takulris malrazam kanantu lrengaw. i intaw marengay kanantu ngadan melru kana takulris, pilralrangaw pupana. 4tu pilralrangaw pupana nantu takulris peniya, zi kemakawang i ngawayan kanazu; kurelrang nantu takulris kantaw, 'alrana malrazam nazu kanantu lrengaw. 5nazu 'azi kuwarelrang kana kinaliva na trau, muveliyas papusar, 'alrana 'azi malrazam tu lrengaw kana kinaliva na trau.>>

6marengay lra i Yēsu kanini na paruwalruwan kanazu, mawmu 'azi malrazam nazu kanantu nirengay za a eman tu pauwayan.

na 'inava na purarikan i Yēsu

7kemazu zi, masasalr ziyan marengay i Yēsu kanazu: <<penazangala ku marengay kanmu, maw ku na sulray kana takulris. 8na pakangawayan ziya kaninku zuwa mu maw na matrakaw, maw na male'es; na takulris 'azi mukinger kanazu. 9maw ku na sulray; izu na makalrang kaninku musavak mu, 'azika'azi pa'inava, pawnung karuwa musasavak mupapana, zi kaatrevung za tralutralun. 10musavak na male'es, 'azi mamelri maw na tratrakaw, piyanatray, pakakuwatreng; zanku iyazuwa na pauwayan mu maw na paelak za uwavaawan kanazu, pawnung maw na merevaw na uwavaawan.

11<<maw ku a 'inava na purarikan; na 'inava na purarikan muramawan kanantu takulris muwai gisē. 12na muwavales kikarun mu amelri na purarikan, na takulris amelri nintaw. nu mena'u i intaw kana suwan i alalas, zi meretra' kana takulris penusar; na suwan i alalas 'emevang kana takulris, mavuraw penapusar na takulrikulris. 13penusar lra na muwavales kikarun, 'alrana maw na muwavales kikarun i intaw, 'azi milingaw kana takulrikulris. 14-15maw ku na 'inava na purarikan. kamawan kana malrazam i Amalri kaninku, malrazam ku kani Amalri. mararesan, malrazam ku kananku takulris; kemazu nazu malrazam kaninku. muwai ku muramawan kanazu gisē. 16ulra ziya zuma nanku takulris 'azi kazu i kani kana puwatakulrisan i savakan, 'azi ku ka'azi pilralrang kanazu pukuwani; malrazam kinger kananku lrengaw nazu; ini na marekazuwa puwakasayan, mukasa za sasa kana puwarikan.

17<<sahar kaninku i Amalri; 'alrana muwai ku gisē kananku uwavaawan, muramawan za karuwa ziya melak za uwavaawan. 18iniyan za trau maruwa melak kananku uwavaawan, maw i inku na muwai gisē; ulra ku kezang gisē, zi mikezang masasalr melak. i ini maw i Amalri na semeratr pakikarun kaninku.>>

19na Yodaya na trau masasalr ziya mureha kananni na ngay zi maziyakuzikul. 20kanazu i savakan kazuwan na marengay: <<maw na kipalrar i intaw! maaulrang lra i intaw! amanan na kingeray i intaw?>>

21ulra zuma a trau marengay: <<na kipalrar na trau 'azi maruwa marengay kana kemani na ngay! na palrar maruwa pali'atr kanantu matra na mavutri' ziyamaw?>>

ki'atelr kana Yodaya na trau

22kazu i Yērusalem, na sasunan kana vangesar ruma' na semasaharan na wariyan mu meredek lra; vetriliyan a azu. 23i Yēsu kazu kana vangesar ruma' i kana Solomon salripi kemakawang; 24i Yodaya na trau mulitrung kantaw, marenagay kantaw: <<palralrivak u kaniyam palru nu aidan? patezelray mi marengay, maw u i Kiristo?>>

25temuvang i Yēsu: <<marengay ku lra kanmu, mawmu 'azi mu pakutatena'. nanku kinikarun na pinakalrang kanantu ngadan ni Amalri mawna ku uwasay. 26mawmu, amelri mu nanku takulris, semeneng 'azi mu pakutatena'. 27nanku takulris kinger kananku lrengaw, malrazam ku kanazu, zi kuwarelrang kaninku nazu. 28veray ku kanazu za uwavaawan munayun, nazu 'azi kiyanatray; nu i eman lra mu 'azi kararuwa kemay kananku lima 'emaraw kanazu. 29izu na veray kaninku kanazu i Amalri mu maraayawayawan kana eman ziya#10.29 <<izu na veray kaninku kanazu i Amalri mu maraayawayawan kana eman ziya>> zuma ulra pidaya awatranan lulun vinavalray za <<i Amalri tu i veray kaninku mu maraayawayawan kana eman ziya>>., iniyan za trau kararuwa 'emaraw kanazu kemay kanantu lima ni Amalri. 30i Amalri zi inku maw a sasa.>>

31a azu, na Yodaya na trau melak ziya za varasa' tatengez kantaw. 32marengay i Yēsu kanazu: <<kazu ku i ngawayan kanmu kikarun kana ipakarun ni Amalri kaninku a sazu za 'iyanavayan na lremak, muramawan mu kana iyan na lremak zi melak za varasa' temengez kaninku?>>

33temuvang nazu: <<'azi mi muramawan kanannu kinikarun na 'iyanavayan na lremak melak za varasa' temengez kannu, a maw na temariyaeman u lra kana Viruwa i itras! a trau u, maruwaruwa nu kamawanaw kana Viruwa i itras i innu!>>

34marenagay i Yēsu: <<nanmu kuret amelri vinavalrayan za na Viruwa i itras marenagay lra <a Viruwa mu> ziyamaw? 35malrazam mi na ngay i Sēsiyo 'azi muwavalis munayun; nazu na kituluz kana vati na Viruwa i itras na trau, na Viruwa i itras Viruwa kema ziya kanazu. 36nu i inku, maw ku na pinalimi' ni Amalri pazuwa i punapunan. marengay ku za maw ku Alrak na Viruwa i itras, kemuda zi marengay mu za temariyaeman ku kana Viruwa i itras? 37nu amelri ku kikarun kanantu kiyakarunan ni Amalri, zi amanan pakutatena' kaninku i inmu; 38nu maw mu, nu 'azi mu lra pakutatena' kaninku, zi pakutatena'a mu kananku kiyakarunan, maruwaya mu patulre'ay malrazam kani Amalri za ulra kazu kananku uwavaawan i savakan, zi ulra ku kanantu uwavaawan ni Amalri.>>

39kemazu mu nazu maranger ziya 'emevang kantaw, mawmu penusar lra i intaw kanantu lima nazu.

40mareveliyas ziya masalr i Yēsu kana Yorudan zinanuman i makakuwaziyu kana dare', mukuwa kanantu kinazuwan semuwap ni Yohanē a aidan ziya, kaazu i kazu. 41kazuwan na zuwa miya'a kantaw, marengay: <<i Yohanē 'azi ziyan pupana za karepalripalri, mawmu tu nirengay kanini na trau mu tatena' peniya.>> 42i kazu, kazuwan na pakutatena' lra kani Yēsu.

Currently Selected:

Yohanē 10: TPN

Highlight

Copy