Sito 4

i Pētēro zi Yohanē kisayvang i gikay

1i Pētēro zi Yohanē a kazu ziya venavati kana trau mapiya mu, ulra papida a rahan#4.1 <<rahan>> zuma ulra pidaya awatranan lulun vinavalray za <<ma'izang na rahan>>., tu ma'izang na ki'alra'ala kana vangesar ruma', zi na Satukay na trau maherareher za zuwa lra. 2'alrana ini na zazuwa na sito pananadam za trau za kireeman kana marevaaw na lremak, venavati palenak kani Yēsu za marevaaw kemay kana minatray, ka'ilremesan nanni na trau, 3semeneng 'emevang kanazu, tu imengaw i imengan nazu palru za dadaman, 'alrana 'aremeng lra a azu. 4mawmu na kinger kana vati na trau mu ulra kazuwan na pakutatena' lra, mawmau na ma'inayan mu, kararuwa za lruwatra kuzulr.

5kazuwa wariyan, tu kemakezeng na Yodaya na trau, ciyoro, zi na sinsi kana Sēsiyo muwazuk i Yērusalem. 6na tinuma'izang na rahan i Anas zi i Kayafa, Yohanē, Alisanta, zi tu niruma'enan na tinuma'izang na rahan kazu kemayan mapapiya. 7nazu katikezir i ngawayan kema kanazu na sito, kiyumalr: <<kuredikes mu za eman kezang, pakalrang za ngadan ni eman kemakuda kanini na lremak ziyamaw?>>

8kitemuy i Pētēro za Vangesar Lu'em, temuvang marengay: <<na kemakezeng kana zinekalranan zi na ciyoro, 9nu kikiyumalr mi harem kana wari kana kireeman kanini na matripu' na trau za kemuda kipaka'inava ini na saya 'iyanavayan na lremak, 10nu kemazu mu, i inmu mapiya zi na Iseraēl na trau ziyan kalrazam: ini na matikezir kanmu i ngawayan na trau maruwa mareveliyas dalikedik, maw 'alrana na Nazalē na trau i Yēsu Kiristo tu ngadan na pinupana na kezang. kitrehetreh kanmu i intaw kana ziyuzika i itras, zi na Viruwa i itras parevaaw lra kantaw kemay kana minatray. 11na kireeman kani Yēsu, marengay lra i Sēsiyo:

nanmu daykusang tu i'atelr ini na varasa'

mutu marapazangazangal na pakaarekezan i makadare' na varasa'.

12na venavaaw mawmau zuwa kemay kantaw; 'alrana i punapunan, na Viruwa i itras 'azi veray za pakazuma za ngadan, zi maruwa ta pakalrang kantaw muvaaw.>>

13na giing mena'u kani Pētēro zi Yohanē kemazu kana 'uringetr, zi malrazam ziya kanazu za 'azi mitinakesiyan za eman a trau, salaw pakumelri, zi patuanger lra kanini na zazuwa a maw ziyan maw a kurelrang lra kani Yēsu. 14mawmu, iniyan za ngangay nazu, 'alrana nazu mena'u kanizu na pinaka'inava lra na trau mukasa matikezir kani Pētēro zi Yohanē. 15na giing kuwazuwaw lra semeratr kanazu na zazuwa pupatraran kemay i gikay, zi mazayazayar, 16marengay: <<ta kudakudayaw nazu awa? na kaazu i Yērusalem na trau malrazam mapiya kanazu za pupana lra za kirekamelri na karepalripalri, zi iniyan ta za kuwadakudayan kitu'a'ulid. 17mawmu, muramawan za 'aziya marekamu'ivat pakirev ini na lremak kana zinekalranan, pataranapawa ta kanazu, amanan masasalr pakalrang kana ngadan ni Yēsu venavati za eman kani emaeman.>>

18kemazu zi, tu pazuwayaw na zazuwa nazu, pataranapaw puanger kanazu nu kemuda lra mu amanan masalr lra pakalrang za ngadan ni Yēsu venavati zi za panadam kana trau. 19mawmu, i Pētēro zi Yohanē temuvang kanazu: <<kazu i ngawayan kana Viruwa i itras, pamaw nu kinger kanmu, nu 'azi mu pamaw nu kinger kana Viruwa i itras? kuretu i inmu mu! 20naniyam nina'uwan, kiningeran, 'azi karuwa 'azi marengay pupana.>> 21kemazu zi na gikay masalr ziya pakirev pataranapaw puanger, zi meretra' puveruk lra kanazu, 'alrana 'azi pakaatrevung tu nirehayan za pasavung kanazu. na zinekalranan mapiya muramawan kana mupana na lremak semenay pulihu kana Viruwa i itras. 22i kanini na karepalripalri na pinaka'inava izu na trau mu makapetelr lra tu 'ami.

mukasa za anger kiyanun na sinziya

23i Pētēro zi Yohanē a kiretra', payas mareveliyas mukuwa kanantu trau i kazu, marengay pakalrazam kana mapapiya kanantu nirengay na ma'izang na rahan zi na ciyoro. 24a kinger lra nazu, zi mukasa za anger kematamuni kiyanun kana Viruwa i itras marengay: <<na parevuwa' demaway kana lingatr, dare', lrevek, zi i savakan na eman ziyan na demadikes a! 25pakalrang u lra kana Vangesar Lu'em, pakarun kanannu pakarunan -- niyam temuwamuwan i Davidē marengay:

kemuda zi zema'ung na sizumayan?

na tratrautrau ziyan kemuda zi meranganger kana 'azi tatena' na lremak?

26na yawan i dare' penadang mukuwa kimatengeza mapiya;

na demadikes za kezang mukasakasa muwazuk mapiya,

auwa kimatengeza kani Luzu zi kanantu dina'us i Kiristo.

27tena' kemani, i Hērodē zi Pontiyo Pilato kazu kani kazekalran kurelrang kana sizumayan na trau zi na Iseraēl na trau muelrek marepuwakasa, tatengez kanannu vangesar na pakarunan i Yēsu, mawna nannu pinalimi' patikezir i Kiristo. 28muelrek marepukasa nazu, maranger kemakuda kanannu kezang zi nirangeran na kinuret lra a aziyu ziyan pula'esien na lremak ziya. 29Luzu a, tu tariyakaud nazu, kiyami kannu na'uwi harem, pawnung maruwaya mi, mawna nu pakarunan, 'uringetra palenak kanannu vati. 30kiyami kannu pupana za lima paka'inava za kuwalengan, zi maruwaya mi ziya pakalrang kanannu vangesangesar na pakarunan i Yēsu tu ngadan pupana za karepalripalri kirekamelri na lremak.>>

31piya lra kiyanun nazu mu, mungunin i inuwazukan. katemuyay za Vangesar Lu'em mapiya nazu, 'uringetr kemirakaz palenak kanantu vati na Viruwa i itras.

pinukasa na pinieman ziyan

32nanni na salepun na sinziya mukasa za anger, iniyan za sasa za marengay kanantu pinieman mu ninku kema; na ulra ziya na eman mu pinukasa peniya. 33na sito mikezang za ma'izang uwasay tu nirevaaw ni Yēsu; na Viruwa i itras veray za ma'izang a ka'inavayan kanazu kurisaesa. 34i savak kanazu, iniyan za trau parainiyan za eman. nazu na mi'a'uma miruma' mu, tratrima'anay lra peniya, 35na trima' kana pinieman tuluzanay kana sito, paturusanay kanantu kinaranger panini veray kana kurisaesa.

36ulra a sasa pinialrak i Saypurus i Lēvi na trau, mingadan kani Yosēf, i Barenaba kema na sito kantaw (puwakezang kema tu pauwayan i Barenaba); 37tu trima'anay lra tu 'uma na saya, melak kana paisu, tuluzanay kana sito.

Currently Selected:

Sito 4: TPN

Highlight

Copy