Sito 28
28
kazu i Malta lratar
1mukaitrasan a kivaaw mi likuzan marulrazam mi izu na lratar maw i Malta. 2na trau i lratar salaw 'eminava kaniyam. 'alrana 'ema'udalr a azu, zi lritek na wari, purevu nazu, temara kaniyam. 3mazuk za kawi savetu' i Pawlo, tu retra'anay kana apuy. ulra a saya unan mipadawak 'azi kiyaseker za vi'asan, mulisek mupana, semaper kanantu lima. 4na trau i lratar mena'u kana unan kurekilrakilr kana lima ni Pawlo, mazayazayar: <<ini na trau 'azika'azi maw na pinatray za trau, ara kivaawa mukaitrasan kemay i lrevek, na viruwa 'azi maranger venaaw kantaw.>> 5mawmu tu palrikelikanay kana apuy na unan ni Pawlo, 'azi mavuli' za makitekiteng i intaw. 6mengangara mapiya menana'u za venare' nantu lima, awlra maherareher za mureve' minatray; mawmu mengangara za sawariyan, 'azi kurena'u i intaw ulra kirekamelri a eman, zi muvalis na anger, marengay: <<i intaw maw a tinuviruwa!>>
7'azi adawilr tu pariyadawilr kanizu na dare', i Pubiliyus ayawan ulra tu 'uma. uvalringay kaniyam i intaw, semangal temara kaniyam teluwa wariyan. 8a azu, i temamataw ni Pubiliyus mu kuwaleng za vi'asan zi venavenin, mi'ezeng i sa'esa', i Pawlo mukuwa kanantu kiya'ezengan, tu kiyanunay, depelanay nantu lima, paka'inavayaw lra i intaw. 9kana kemani, na kuwaaleng ziya na trau i lratar zuwa lra mapiya, zi kipaka'inava mapiya. 10tu verayay mi sazu za kulriyames nazu; masiyakasik na sudang mu tu atezanay ziya i sudang naniyam kinaranger i dalan na eman ziya.
kemay Malta palru i Roma
11melavat lra za teluwa vulan, muitras mi za kemay Alisanta a saya sudang; ini na sudang mingadan za <<Suwangsenhaw>>, maw na maziyazi kanizu na lratar palalavat kana vetriliyan. 12meredek lra i Sirakus na sudang, maziyazi mi i kazu za teluwa wari. 13kemazu zi masalr masikasik na sudang, meredek i Rēgium. kazuwa wari ulra a vali kemay kedet, semeneng zuwaya wariyan meredek mi i Putēoli lra, 14kiretrevung mi za papida kana sinziya i kazu; tu arelrayaw mi venilin za pituwa wari. maw kemani, zi meredek mi i Roma lra. 15kinger na sinziya i Roma za meredek mi lra, zi mukuwa i Apiyus iciva zi i Sankuwan zuwa kiyatrevunga kaniyam. mena'u i Pawlo kanazu payas semungal kana Viruwa i itras, zi mareka'uringetr lra.
i Pawlo kazu i Roma
16meredek mi i Roma lra mu, kipaturus i Pawlo, kurelrang kana ki'alra'alra kantaw kanizu na hitay kikazu za zuma a kazuwan.
17melavat lra za teluwa wari, i Pawlo demaulr kirepana'u kana Yodaya na trau tu ayawan. zuwa lra nazu, marengay i Pawlo kanazu: <<mawan a, ara 'aziya ku kemakuda pamelri kanmu na mawan, zi za semuveli tu i kakuret na lremak kana temuwamuwan, kemuda zi kiimeng ku i Yērusalem, zi tu tuluzanay kana sēfu i Roma. 18kiyumalr kaninku nazu, mawmu 'azi pakaatrevung za ulra a eman ku pinamelriyan za kiyanatrayan, mianger za meretra' kaninku. 19mawmu semuveli na Yodaya na trau, kemazu katemaraemanan, zi mara'inava lra nu pusavak ku za valray kana Hongti, zi amelri ulra a eman kokso ku kana mawan. 20mukaramawan kanini na nirekudayan, kiyami ku za kirepana'u kimazayar kanmu. maw na kemani murung ku za kusali, maw muramawan ku kanantu kiniyalriman kana Iseraēl na trau izu na sasa.>>
21marengay kani Pawlo nazu: <<na kireeman kanannu lremak, 'azi mi kituluz za sayasaya tigami kemay i Yodaya, zi iniyan za lralrang kemay kazu murung za ngay zuwa, 'azi marengay kannu za kuwatreng za ngay. 22mawmu, maranger mi kinger zannu anger, 'alrana malrazam mi, nu kinuwarelrangan ini na kiyoha maw na kiyasipure' za makaiyaiyan ziya na trau.>>
23kemazu zi, kimakuret kani Pawlo za uparazukan za wari nazu. a azu kana wari na zuwa kanantu kinazuwan ni Pawlo na trau kazuwan; kemay semavalr palru za 'aremeng, intaw parevavati zantu vati kana kanatal na Viruwa i itras kanazu. intaw uwasay kana kuret ni Mosē zi tu valray na patralritralri, za pakutatena'an kani Yēsu nazu 24nantu piningayan mu, ulra na pakutatena', ulra na 'azi pakutatena'. 25'azi marepaturuturus i anger nazu, zi maruwadaday lra. 'azi ziyan maruwadaday pakangawayan mu, marengay za saya ngay i Pawlo: <<na Vangesar Lu'em pakalranganay kana patralritralri i Isaya nantu nirengay na ngay kananmu temuwamuwan mu 'azi pamelri! 26marengay i Isaya:
uwa rengayu nanni na zinekalranan:
kinger mu lra zi masasalr mu kinger, kemazu 'azi mu malrazam,
mena'una'u mu lra mu, zi 'azi mu mena'u.
27'alrana tu anger nanni na zinekalranan 'azi mutruwalr;
pututaw lra tu tralinga nazu,
palrupe'aw na matra.
nu 'azi mu, nana'u tu matra nazu,
zi kinger tu tralinga,
marulrazam i anger, mareveliyas tu anger,
zi ku paka'inavayaw nazu.>>
28kemazu zi marengay i Pawlo: <<semeneng, kalralrazam mu, na Viruwa i itras nantu vati na venavaaw palenakanay lra kana sizumayan na trau. maramukinger nazu!>>#28.28 ulra pidaya awatranan lulun puwayay za 29 vatras <<marengay lra kanini na ngay i Pawlo mu, nazu na Yodaya na trau muvaveruk lra; nazu i savak muvasuk za pakirev a pasakisakiyan.>>
30kazu kanantu kinivulas na ruma' za zuwaya 'ami i Pawlo. na zuwa ziya mumalr na trau, tu tarayaw mapiya. 31salaw 'uringetr palenak zantu vati kana kanatal na Viruwa i itras, panadam za kireeman kana lremak ni Luzu Yēsu Kiristo, 'azi mutala' za emaeman.
Currently Selected:
Sito 28: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023