Sito 27
27
muitras za sudang piya Roma i Pawlo
1nu kemazu kemuret kanta makalrang kana zanum mukuwa i Italiya, nazu tu verayanay i Pawlo zi na zuma na inimeng na trau kana <<yawan hēsiya>> na ma'izang kana Roma hitay i Yulius. 2muitras mi za zuwa kemay Aderamitim na sudang; ini na sudang uri kasiyakasik, kemidikidir makalrang i Asiya siyo za pidaya kana minato. ulra sasa na Makidoniya i Tēsalonikē a trau, mingadan kani Arisetako, salrangan mi. 3kazuwa wari meredek lra i Siton, i Yulius tu ka'inavayaw i Pawlo, paturusay i intaw mukuwa miya'a za 'ali'an, tu tarayaw kana 'ali'an. 4zi masikasik mi ziya kemay kazu, 'alrana muelep za semungsung na vali, zi mudalredalrep i Saypurus zi miyalikuz za vali kemakawang. 5melavat mi i Kilikiya, Pamfiliya kana lrevelrevek, meredek lra i Lukiya kana Mira. 6kazu i kazu, atrevung za saya kemay Alisanta za sudang i Yulius, uri auwa i Italiya, zi uitras kana sudang kema kaniyam.
7patrutru pida wariyan, mahatra kemakawang na sudang, 'azi kalre'ayan meredek a adalrep i Konitos. 'alrana temala' na vali, 'azi mi maruwa patrutru kemakawang paturus zaniyam tratrepain a maw ziyan, zi mudalrep i Kerēto lratar miyalikuz kana vali kemakawang, makalrang i Salemonē kana puyung melavat. 8makangaydiran mi kana lrevek mungawayan, mukipiya a kezang maruwaruwa meredek i Lasēa kana kazekalran a 'azi adawilr i 'Inava Minato.
9muringiz mi pida wariyan, melavat lra kana ka'iwayan na wariyan, zi 'azi kirepa'uwa nu patrutru kemakawang. kemazu zi papuanger za ngay kanazu mapiya i Pawlo. 10marengay: <<na mapapiya, nu kemay kani patrutru kemakawang mu kakaukaud kema ku; 'azi mawmau na maeman zi na sudang uri kakuwaatreng, arusay zanta uwavaawan mu 'azi karuwa ki'elaw.>> 11mawmu, na ma'izang kana hitay maramuwai pakutatena' kanantu ngay na ma'izang kana sudang zi na misasudang na tawki, zi 'azi pakutatena' kani Pawlo. 12ini na minato amelri za 'inava na kaazuwan palavat kana vetriliyan; mawna kemani zi marakazuwan na trau paturus pakakawang kana sudang, dikadikaya meredek i Finiki zi palavat kana vetriliyan. i Finiki mu maw i Kerēto lratar a saya na minato, tremepa makazaya kedet zi makazaya 'ami#27.12 <<makazaya kezet zi makazaya 'ami>> karuwa marengay za <<makalauz 'ami zi makalauz kezet>>..
pakirev na vali i lrevek
13a azu mu, ulra vali a alremek kemay kedet, kararuwa ta miturus zanta anger a mawziya kemakawang kema, zi puitras kana vanu' pakawang, makangaydiran i Kerēto lratar mungawayan. 14'azi sawariyan, ulra saya nirengay za <<vali kemay lauz i ki'amiyan>> na ma'izang variw kemay lratar semelrepad. 15semeretrap kana sudang na vali, 'azi pakatala', iniyan mi za kuwadakudayan, zi kalrawalrawayay na variw semukun kana sudang. 16a mudalrep i Kauta na makiteng lratar i makakedet kemakawang mu, 'azi mi kalre'ayan melriput kana kavaawan na makiteng tamina. 17tu puitras kana ma'izang na sudang kana kiyakarun, tu rekepanay za tuwaso. makakaud ziya za semeretrap kana vutrevutrek i Serutēs, zi tu pulusuwaw na ma'izang na vayang, tu paturusanay kana vali makaiyaiyan. 18patrutru na variw semeretraretrap, kazuwa wari, puteha 'ema'atelr kana maeman piyalrevek nazu, 19katelu wari, arusay na kisi i sudang mu tu vavulru'anay 'ematelr. 20pidawariyan 'azi mi mena'u za kadaw zi vitu'en; na vali zi kelun patrutru semuzesuz, tivus mi meretra' kiyalriman za kiyavaawan.
21na trau i sudang mu pidaya wariyan 'azi mekan za emaeman, matikezir i ngawayan kanazu i Pawlo marengay: <<inmu mapiya, auwa mu kinger kananku ngay, 'azi makalrang i Kerēto lratar na sudang mu, zi 'azi ta waelep sakuwaniyani za muranak. 22harem pukezanga ku kanmu ikavangavang, kanmu i savak iniyan za kalralremes nantu uwavaawan, mawmau kalremes ini na sudang. 23a karauv, nanku pinitrepa, ku sinasungal na Viruwa i itras pakarun za tēnsi marengay kaninku: 24<Pawlo, ikakaud! 'azi u ka'azi matikezir i ngawayan kana Hongti. pawnung, maw nantu i kalraman na Viruwa i itras, zi kemuret lra za 'ematrip zantu uwavaawan kana kurelrang ziya kannu i sudang na trau.> 25semeneng, inmu telaku nanmu anger; pakutatena' ku kana Viruwa i itras 'azika'azi pula'esi zantu nirengay kaninku na ngay. 26mawmu u'alinavaw ta mukuwa za saya lratar.>>
27meredek lra za muketrep zi pata wari za 'aremeng, naniyam sudang kemazu kazu ziya kana lrevek i Ateliya mu'alinavaw makaiyaiyan. palru za parekazuwa 'esungnan, na kiyakarun i sudang kaulra adalrep lra i daredare' kema. 28zi venulru' kana tatilu', venakesiyu tu kaasavak, zi makapetelr mēta tu kaasavak; masalr mungawayan venakesiyu mu, makatelun mēta tu kaasavak. 29makaud za semeretrap za varasa' na sudang, zi kemay i likuzan kana sudang pulusu pata za vanu', kiyalriman za 'idenan. 30na kiyakarun i sudang maranger penusar, tu pulusuwaw na kavaawan na makiteng tamina i lrevek, kituuwauwa i tranguru' kana sudang pulusu kana vanu'. 31marengay i Pawlo kana ma'izang kana hitay zi tu hitay: <<nanni na trau 'azi muvilin kana sudang mu, 'azi mu kararuwa kivaaw.>> 32na hitay semelretev mereput kana tatilu' na kavaawan na makiteng tamina, zi mu'alinavaw i lrevek.
33a adalrep 'idenan mu, pukezang i Pawlo kana mapiya ekan za saema za aekanen. marengay intaw: <<sipelengan mu mavangavang kemianger, 'azi mu mekan 'emaw, muketrep zi pata wari lra. 34semeneng pukezang ku kanmu, ekan za saema za aekanen maruwaya mu patrutru temukuz, 'alrana inmu kurisaesa na trau arusay nanmu 'arevu a sasaya 'azi kalralremes.>> 35marengay kanini na ngay, melak za pang i Pawlo, kazu i ngawayan kanazu semungal kana Viruwa i itras, zi penetris mekan. 36mutelak lra tu anger mapiya, zi mekan lra. 37mukasakasa mi kana sudang mu zuwaya leman mikatelu za makapitulr zi aanem na trau.#27.37 <<zuwaya leman mikatelu za makapitulr zi aanem na trau>> ulra pidaya awatranan lulun vinavalray za <<zuwaya leman mikatelu za makapitulr zi laluwatr na trau>>; zuma ulra ziyan awatranan lulun vinavalray za <<karuwa makapitulr zi aanem na trau>>. 38vetratrekeran lra mapiya mu, muramawan za atra'alra tu kaaluzun na sudang, zi na emi i sudang tu 'a'atelranay kana lrevek.
sema'iz na sudang
39'idenan lra, na kiyakarun i sudang 'azi malrazam i kazu na dare', mawmu mena'u za patrelikuwan na lrevek, pawnung ulra vutrevutrek, zi kemuret kemianger za kuwadakuda marenganger za pungaydiran kana sudang. 40tu piyanguwayanaw mereput na tuwaso, pulusuwaw na vanu' i lrevek, zi tu vuwaraw na itilu' kana handor, tu kezengaw venakar na vayang i ngawayan na sudang, pasukunaw na vali tremepa kana dare'. 41mawmu, na sudang semaruk kana vutrek kuresa'iz, tranguru' na sudang maziyazi, 'azi maruwa muliyus, likuzan na sudang tu pakirevay semeretrap kana ma'izang na kelun, zi murivas pakirev.
42na hitay maranger pinatray kana inaimeng mapiya, 'aziya kazu a mutenep kana zanum mulranguy penusar. 43mawmu na ma'izang kana hitay maranger venaaw kani Pawlo, 'azi muwai pakudakuda kanazu, kemazu zi semeratr kana sayhu mulranguy na trau mu kiyanguwayan menkun piyalrevek, mulranguy mukaitrasan; 44na zuma na trau melak kana vanin zi na muraritru' kana sudang na kawi mukaitrasan. kemani mu, kivaaw lra mapapiya.
© The Bible Society in Taiwan, 2023