Sito 26
26
i Pawlo kazu kani yawan Akilipa i ngawayan marengay melriput za ngay
1marengay kani Pawlo i Akilipa: <<paturusay u muramawan kannu melriput za ngay.>>
zi pupana za lima muramawan kantaw melriput parevavati i Pawlo:
2<<Akilipa yawan a, maruwa ku kazu i ngawayan kannu harem, muramawan kana Yodaya na trau tu i kokso kaninku na lremak peniya melriput parevavati, tatena' za semangalan! 3mara kasemangalan za patulre'ay u malrazam kana tu ikakuret zi na pinasakisakiyan na kiyaumalran kana Yodaya na trau. mawna kemani, kiyami ku kannu za semaseker kinger zanku pinarevavati.
4<<kinalrakan palru harem maw ku a kemudakuda a trau, na Yodaya na trau iniyan za 'azi malrazam. a kinavaawan ku mu kazu muwayway i zinekalranan kananta kanatal, kikazu i Yērusalem. 5nu wawai wasay kaninku nazu, malrazam nazu kemay melrivak ku mu muwaravakan kananta siwkiyo za mara'azi'azi tematelak a sevang na Palisay. 6kazu ku i kani kisayvang harem, 'alrana mitalrimayan ku kana Viruwa i itras zantu iyatuvang kananta temuwamuwan. 7ini na iyatuvang maw inta na muketrep zi zuwaya sepi' 'atayan na mawan mapiya nu 'uninan lra nu 'aremeng lra mu semungal kana Viruwa i itras zi kiyalriman za kituluz. yawan a, maw kemani muramawan kanini na talrimayan, zi tu koksowaw ku kana Yodaya na trau! 8mawmu, inmu na Yodaya na trau, kemuda zi 'azi mu pakutatena' kana Viruwa i itras kararuwa parevaaw kana minatray na lremak ziyamaw?
9<<a aziyu ziyan maw pakutatena' ku za merukezang semuveli kana Nazalē na trau i Yēsu. 10a kazu ku i Yērusalem maw kemani lra. kiveray ku za kezang kemay kana ma'izang na rahan, 'evangaw na sinziya a kazuwan mimeng; 'azi mawmau kemani, tu kuretanay za piyanatrayan nazu, mu paturus ku. 11pakazuma kanini, kazu ku i waazukan ruma' parepidan meranak kanazu, pa'iselay nazu paretra' kanantu singko. pasalaw ku awiles kanazu, arusay mukuwa kana kazekalran na zuma kanatal pakakuwatreng kanazu.>>
venavati tu i pakutatena' kani Luzu i Pawlo
(Sito 9.1-19; 22.6-16)
12<<ulra parasan, murung ku kanantu i veray na kezang zi seratr kana ma'izang na rahan mukuwa i Damaseku. 13yawan a, kararuwa lra kare'alriyan, kazu ku i dalan mena'u za senan, marakerevat kana kadaw, kemay i itras pasenan paliyus kaninku zi nanku lralrang. 14mureve' mi mapiya i dare'. kinger ku ulra saya lrengaw, temara Hēburu za ngay marengay kaninku: <Sawlo, Sawlo! kemuda zi pakakuwaatreng u kaninku? kamawan u za hung tremapi'i za kuy kanantu lralepit na tawki, muveliyas kikuwaatren lra i intaw.> 15zi kiyumalr ku: <Luzu a, i eman u?> marengay i Luzu: <maw ku nannu pinakakuwaatreng i Yēsu. 16karahan, katikezir! kurena'u ku kannu, maw temuzu' ku kannu mutu pakarunan. wawasay u zannu nina'uwan harem kana wari zi na kireeman nanku pakalrazam kannu na lremak nu aziyu lra. 17kanu vaawaw pupana kana lima kemay kana Iseraēl zi sizumayan na trau, pakarun kannu mukuwa kanazu i savak. 18pali'atru nantu matra nazu, maruwaya kemay kana 'aremeng mareveliyas tremepa kana senan nazu, kemay kanantu kezang na satang pakutatena' kana Viruwa i itras, maruwaya pakutatena' kaninku zi kilapus za pinamelriyan, pawnung kazu kana zinekalranan na Viruwa i itras mu ulra tu kakayanan nazu.> >>
parevavati zantu kinikarunan i Pawlo
19<<mawna kemani, yawan Akilipa a, 'azi ku semuveli kana kemay itras na kirekamelri na nirekudayan. 20i yanguwayan ku kazu i Damaseku zi Yērusalem, kemazu zi kazu i Yodaya zi sizumayan na trau peniya pukezang kanazu, 'azika'azi uwaasalr pakavekal pakutatena' kana Viruwa i itras, na kinakudayan ziya marepauwaya muwaasalr pakavekal i anger. 21muramawan kanini na nirekudayan, a kazu ku kana vangesar ruma', 'emevang kaninku na Yodaya na trau, maranger pinatray kaninku. 22mawmu, palru harem kana wari, kipuwalrang ku kana Viruwa i itras, maruwa ku matikezir i kani, tremepa kana salaw mingadan zi na alusu tu ngadan na trau wasay. nanku nirengay mu maw na patralritralri zi ni Mosē tu nirengay uri wapana na lremak, 23maw i Kiristo 'azika'azi kipakakuwatreng, pawnung iyanguwayan marevaaw kemay kana minatray, tremepa kana Yodaya na trau zi na sizumayan na trau pakalrazam za senan na venavaaw ulra meredek lra.>>
24kemani muramawan kantaw melriput parevavati i Pawlo; pakirev zema'ung i Fēsetu kantaw: <<Pawlo, maaulrang u lra; nannu tinakesiyan na ma'izang tu pakaulrangaw u lra!>>
25marengay i Pawlo: <<Fēsetu tayhin! 'azi ku maulrang; nanku nirengay na ngay tatena' 'azi mavetra'. 26malrazam na yawan kanini na lremak, semeneng 'uringetr ku kema marengay kana yawan; pakutatena' na lremak ziya temarana'u lra na yawan, 'alrana nanni na lremak mu malrazam lra na trau mapiya. 27yawan Akilipa a, pakutatena' u kana patralritralri ziyamaw? malrazam ku za pakutatena' u!>>
28i Akilipa marengay kani Pawlo: <<maranger u marengay za pidaya za ngay zi karuwa kure'unus mutu Kiristo sinziya kema u kaninku?>>
29temuvang i Pawlo: <<nu saema lra sazu lra na ngay mu, nanku kiniyaami kana Viruwa i itras mu, maw inu zi na trau ziya na kazu i kani kiyangkinger kaninku za marengay harem kana wari mu kamawan kaninku mapiya, mawmu amanan kamawan kaninku kemani kidadikus za kusali!>>
30kemazu zi na yawan, sotok, Bērenikē, zi na zuma na trau matikezir mapapiya. 31a muveruk nazu mu, mazayazayar: <<ini na trau 'azi pamelri za kakiyanatrayan zi za kaimengan.>> 32i Akilipa marengay kani Fēsetu: <<nu 'azi parevavati kana Hongti ini na trau, kiretra' lra aidan ziya i intaw.>>
Currently Selected:
Sito 26: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023