Sito 13
13
na Vangesar Lu'em palimi' pakarun kani Barenaba zi Sawlo
1i savakan kana kiyokay i Antiok, ulra a papida patralritralri zi na sinsi, maw i Barenaba, Simēon (ipu'avalr <<'Uzemay>>), Kulinay na trau i Lukius, na mukasa ma'izang kana yawan i Hērodē i Manēng, ulra ziya i Sawlo. 2a semasungal kani Luzu nazu, 'ema'iway mu, marengay na Vangesar Lu'em kanazu: <<i inmu muramawan kaninku pakarun kani Barenaba zi Sawlo, mukuwa kikaruna kananku dinaulr iputrepa kanazu na kiyakarunan.>> 3kemazu zi 'ema'iway kiyanun nazu, 'emaperez kanazu, pakarun kanazu pupatraran.
kazu i Saypurus
4i Barenaba zi Sawlo pinakarunan lra kana Vangesar Lu'em, zi mukuwa i Sēlukiya, kemay kazu muitras za sudang mukuwa i Saypurus. 5a meredek i Salamis nazu, zi kazu kana waazukan ruma' i Yodaya ziya palenak kanantu vati na Viruwa i itras. i Yohanē Maruko kazu i kazu puwalrang kanantu kiyakarunan nazu.
6nazu paketrep kemakawang kana lratar, palru meredek i Pafos, kazu i kazu kiretrevung za sasa mingadan kani Baryēsus na hemandang, maw a sasa na Yodaya na trau, a patralritralri ku kema i intaw. 7i intaw zi kana lratar na sotok i Sergius Pawlo marekalrazam. na sotok sayhu za kakuwayanan; demaulr pazuwa kani Barenaba zi Sawlo i intaw, kingera kanantu vati na Viruwa i itras. 8mawmu, na hemandang i Ēlimas (Ēlimas tu ngadan na Gilisiya) veneliyas; maranger penelret kana sotok kituluz kanini na singko. 9a azu, i Sawlo -- zi maw i Pawlo -- tu katemuyay kana Vangesar Lu'em, zi tremeketrek mena'u kanizu na hemandang, 10marengay kantaw: <<ini na alrak na palrar i inu! nintaw u 'alra kana patezelran ziya, matemuy kana marekamelrimelri na kuwatrengan, mianger za pimamelri kanantu tatena' vati ni Luzu! 11tu pasavung ni Luzu raredek kannu harem; kavavutri' u lra, 'azi u nana'u za senan za pidawariyan.>>
payas, i Ēlimas marulrazam za 'uze'uzem na kutrikutr metrav kanantu matra; mapuwap i iyan ziya i intaw, kiyami kana trau za kemezeng kanantu lima, paruveli kemezeng kantaw i dalan. 12na sotok mena'u kana mureha na lremak, zi mutu sinziya; salaw pakumelri kanantu ipanadam ni Luzu.
na kazu i Pisitēya i Antiok
13i Pawlo zi tu lralrang pakakawang kana sudang kemay i Pafos, meredek lra i Pamfiliya kana Pērega; i Yohanē Maruko kiruwaday kanazu i kazu, muveruk mukuwa i Yērusalem. 14nazu kemay i Pērega patrutru kanantu kakawangan, meredek lra i Pisitēya kana Antiok. kana katalaulepan na wari, nazu mukuwa kanantu waazukan ruma' na Yodaya na trau, kemayana. 15miip lra kanantu kuret ni Mosē zi na valray kana patralritralri, na ma'izang kana waazukan ruma' pakarun za trau mukuwa marengaya kanazu: <<iva, nu ulra mu ngangay pukezang kana mapapiya mu, 'alrazi rengay mu.>> 16zi matikezir i Pawlo, temuwap za lima, marengay:
<<na Iseraēl na trau zi na kemaira kemakaud kana Viruwa i itras na sizumayan na trau ziya, 'alrazi kingeri! 17na Viruwa i itras kana Iseraēl na trau palimi' lra kananta temuwamuwan. nazu a kiyaliyu ziya i Ēzibuto mu, na Viruwa i itras putu 'inalrayan za ayawayawan kanazu, pakalrang kana ma'izang na kezang kemezeng kanazu pupana i Ēzibuto lra. 18kazu i alalas semaseker#13.18 <<semaseker>> zuma ulra pidaya awatranan lulun vinavalray za <<menana'u>>. kanazu kararuwa makapetelr 'ami.>> 19tu trepuwaw lra na pituwa 'inalrayan i Kanan kana pinidare'an, tu dare' nazu tuluzanay kanantu zinekalranan; 20nanni na lremak miinlrangan kararuwa pataleman zi makalruwatr 'ami. <<i likuzan, na Viruwa i itras patikezir za kemakezeng, palru kana patralritralri i Samuēl. 21likuzan lra mu, kiyami nazu za sasa yawan, na Viruwa i itras palimi' kemay kanantu sepi' ni Bēnyamin na alrak ni Kis i Sawlo, patikezir kantaw putu yawan kanazu, makapetelr 'ami. 22kiparetra' lra i Sawlo mu, na Viruwa i itras paruveli ziya kanazu patikezir kani Davidē putu yawan. na kireeman kani Davidē, marengay na Viruwa i itras: <atrevung ku lra kana alrak ni Yēsi i Davidē; maw penauwa kananku anger i intaw, na eman ziya miturus kananku nirangeran na trau.> 23kemay kanantu trungulran i savakan, na Viruwa i itras paturus kanantu iyatuvang muramawan kana Iseraēl patikezir za sasa na venavaaw, maw i Yēsu. 24i Yēsu kemirakaz kikarun a pakanguwayan, i Yohanē palenak za vati kana Iseraēl na zinekalranan, maranger pamuasalr pakavekal kanantu anger nazu, kisuwap. 25a adalrep lra puludus tu rilreng ni Yohanē mu, marengay kana Iseraēl na zinekalranan: <kemianger mu i eman kema kaninku? amelri ku nanmu kiniyalriman izu na sasa. mawmu, izu na pakalikuzan zuwa mu, arusay za paruveli ku melapus kanantu kuse mu 'azi kirepa'uwa.>
26<<na kurisaesa na mawan -- temuwan ni Aburaham zi na kemaira kemakaud kana Viruwa i itras ziya na sizumayan na trau a, ini na venavaaw na vati mu maw na palenak kanta! 27mawmu, na kaazu i Yērusalem na trau zi tu yawan 'azi malrazam kantaw za maw na venavaaw, zi 'azi malrazam kana inaip na valray kana patralritralri nu katalaulepan na wari ziya. kemuret za pinamelriyan kani Yēsu nazu, zi pula'esi kanantu iputralri marengay na patralritralri. 28ara 'aziya atrevung nazu za pa'alangan kanantu pinamelriyan za kiyanatrayan i intaw, zi kemazu kiyami kani Pilato za piyanatrayan kantaw. 29kemakuda lra nazu kana kireeman na lremak ziya kani Yēsu na vinavalrayan kana valray na patralritralri mu, zi pulusu kantaw kemay i ziyuzika i itras, tra'anay i trevelran i savakan. 30mawmu, na Viruwa i itras parevaaw kantaw kemay kana minatray, 31pawnung kazu za pida wariyan, parepidapidan lra kurepana'u kanazu na kurelrang kantaw kemay i Galili palru i Yērusalem na trau. nanni na trau harem kazu kana Iseraēl na zinekalranan mutu uwasay kantaw. 32-33harem palenak mi kanini na fukuing kanmu: pakalrang tu nirevaaw ni Yēsu, na Viruwa i itras muramawan kananta temuwamuwan temuvang pula'esi, mula'esi lra kanta na temuwan. kamawan kana sihēng na nirengay kana pukazuwa valray:
maw u nanku Alrak;
harem kana wari mutu Temama ku kannu.
34na kireeman kantaw marevaaw kemay kana minatray, 'azi kiyanatray munayun na lremak, kema marengay lra na Viruwa i itras:
ku i vaverayanay na iyatuvang kani Davidē,
izu na vangesangesar na katalrimayan na ipuwavut verayanay kanmu.
35ulra i sannin, na venavalray kana sihēng marengay:
zi 'azi u wawai patupa' kananu penakasa na pakarunan.
36<<a kazu ziya i punapunan i Davidē mu pula'esi lra kanantu kiniyanganger na Viruwa i itras, nu minatray lra itrevelr i trapingiran kana temuwamuwan, zi matupa' lra; 37mawmu, na Viruwa i itras parevaaw kantaw kemay kana minatray izu na sasa 'azi matupa'. 38-39na mawan a, kalralrazam mu mapiya, izu na lalapus kana pinamelriyan na vati maw i Yēsu na palenak kanmu. kalrazam i inmu, kuret ni Mosē 'azi kararuwa puelak kana pinamelriyan ziya; mawmu na pakutatena' ziya kani Yēsu na trau karuwa kivakevak kemay kana pinamelriyan. 40semeneng, taranapaw i inmu, mawnu mupana kanmu i zazek tu nirengay na patralritralri:
41na 'azi pakanueman kana Viruwa i itras na trau a,
na'uwi mu, mare'alav mu, kiyanatrayan!
'alrana kazu ku kananmu ziday na kinakudayan ziya,
nu kazu lra a trau marengay pakalrazam kanmu mu,
kemazu mu 'azi pakutatena'!>>
42a muwaaday kana waazukan ruma' i Pawlo zi Barenaba mu, na mapapiya demaulr pazuwa kanazu masalr venavatiya kananni na lremak nu daman kana saya na katalaulepan na wari. 43puludus kana uwaazukan a maruwadaday lra mu, kazuwan na Yodaya na trau zi na pakutatena' kana Yodaya kiyo na sizumayan na trau kurelrang kani Pawlo zi Barenaba. na zazuwa sito pukezang kanazu za patrutru kurinakep kana Viruwa i itras kanantu ipuwavut.
44nu daman kana saya na katalaulepan na wari, na kazekalran na trau tivutivus zuwa mapiya lra, kiyaanger kanantu vati ni Luzu. 45na Yodaya na trau mena'u kanini na salepun na trau, matemuy i anger za sepelran; kimasaki nazu kanantu nirengay ni Pawlo, pawnung semiri kantaw. 46mawmu, i Pawlo zi Barenaba puwapuwa 'uringetr venavati palenak: <<tu vati na Viruwa i itras 'azika'azi iyanguwayan palenak veray kanmu. mawmu, 'azi mu muwai kituluz kantaw, 'azi mi kirepa'uwa kituluz kana uwavaawan munayun kema mu i inmu. semeneng, kiruwaday mi kanmu, mukuwa kana sizumayan na trau; 47'alrana patalru lra kaniyam i Luzu marengay:
kemuret ku lra kanmu za mutu senan kana sizumayan na trau,
na vavaaw muwa urungaw patarisesek.>>
48na sizumayan na trau kinger kanini na ngay kasemangalan mapiya, semenay pulihu kanantu vati ni Luzu; nazu na pinalimi' lra kana Viruwa i itras zuwa kituluza kana uwavaawan munayun na trau mu mutu sinziya lra mapiya.
49tu vati ni Luzu mupalenak lra kazu kana kinazuwan. 50mawmu, na Yodaya na trau pusuwasuwan kana i kazu na mingadan na trau zi na sizumayan na kaitrasan i siyakay nazu na pakutatena' kana Viruwa i itras na vavayan, pureha pakakuwatreng kani Pawlo zi Barenaba, puveruk pupatraran kanazu kana pinidare'an. 51na zazuwa kazu i ngawayan kana trau mapiya temapetap puelak kana trevulr i kuy, zi mukuwa i Ikoniyom lra. 52na temakesi i Antiok matemuy za semangalan i anger zi na Vangesar Lu'em.
Currently Selected:
Sito 13: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023