Sito 14
14
kazu i Ikoniyom
1na mararesan na lremak kazu mupana i Ikoniyom. i Pawlo zi Barenaba mukuwa kana uwaazukan ruma' na Yodaya na trau; tu vinavati nazu mu kazuwan na mutu sinziya na Yodaya zi na sizumayan na trau. 2mawmu, nazu na 'azi pakutatena' na Yodaya na trau mu pusuwasuwan kana sizumayan na trau, zi pakarasak kana sinziya kanazu. 3na zazuwa sawariyan i kazu; kerevat venavati kanantu lremak ni Luzu. i Luzu veray kanazu za kezang pupana za karepalripalri, pakalrang kanini uwasay kanazu tu ipalenak na kireemen kanantu ipuwavut na vati maw tatena'. 4na zinekalranan i kazekalran muramawan kanini zi maresenengan, ulra na museneng mukuwa kana Yodaya na trau, mawmu ulra na temukuz puwalrang kana sito.
5mawmu, na Yodaya zi na sizumayan na trau mukasa kanantu yawan kemuret za pakakuwatreng kana sito, melak kana varasa' pinatray kanazu. 6malrazam na sito kanini na lremak, zi muwaliki mukuwa i Lukawniya kana Lustēra zi i Dērebē na zuwaya kazekalran zi i dalrep na pinidare'an. 7kazu kanazu na kinazuwan patrutru palenak kana fukuing.
kazu i Lustēra zi Dērebē
8na kazekalran i Lustēra ulra a sasa 'azi 'iyanavayan tu zazek, pinialrak mu matripu' lra, 'azi ziya kemakawang. 9kemayan i kazu i intaw, kiyanger za venavati i Pawlo. i Pawlo mena'u kantaw za mipakutatena'an, karuwa kipaka'inava, zi tremeketrek mena'u kantaw. 10kematamuni marengay: <<karahan, patezelru na zuwaya na kuy!>> zi menkun izu na trau, mureha kemakawang. 11na zinekalranan mena'u kanantu kinakudayan ni Pawlo, zi temara Lukawniya kematamuni 'emuy'uy marengay: <<ulra a viruwa mutu tratrau tu zazek, mulusu kanta lra!>> 12nazu maw i Zēus kema kani Barenaba, maw i Hērmēs kema kani Pawlo, 'alrana na purakaz marengay mu maw i intaw. 13i panayan kana kazekalran mu ulra a sasa rahan i Zēus na biyo, kemezeng za hung, murung za 'aputr, zuwa i salikiz kana kazekalran, kuwarelrang kana zinekalranan patavang kana sito.
14i Barenaba zi i Pawlo kinger kanantu niranger kemakuda na lremak nazu, zi venilratr za kavang, semerepang kana zinekalranan i savakan, kematamuni marengay: 15<<wadadiyan, kemuda zi kemani mu awa? a trau mi, kamawan kananmu kakuwayanan. zuwa mi i kani palenaka za fukuing, muramawan kanmu za muwadaya kana mavetra' na tinuviruwaruwa, mareveliyas kanizu na parevuwa' demaway kana lingatr, dare', lrevek zi i savakan na eman ziyan na kazu munayun na Viruwa i itras. 16a aziyu ziya, zi na eman ziyan na vaaw munayun tu pakalrawalrawayaw na tratrautrau ziyan kemakuda kurisaesa. 17mawmu, marayas pakalrang kana marekamelrimelri na 'iyanavayan na lremak uwasay kantaw za ulra kazu i intaw, paruwalruwanay za: kemay lingatr 'emudalr veray kanmu, maruwaya mu pakurelrang za wari mare'ani; veray kanmu za aekanen, matemuya za semangalan mu anger.>> 18ara marengay lra na sito kanini na ngay mu, mawmu 'azi maruwa paziyazi kana zinekalranan za patavang kanazu.
19mawmu, ulra papida a Yodaya na trau kemay i Pisitēya kana Antiok zi Ikoniyom zuwa; nazu pusuwasuwan kana zinekalranan melak za varasa' tremapurulr kani Pawlo, minatray lra kema, zi kerusanay pupatraran i kazekalran i intaw. 20a kazu mulitrung na temakesi kantaw mu, marahan matikezir i intaw, maveliyas mukuwa i kazekalran. kazazuwa wari, marelrang kani Barenaba mukuwa i Dērebē.
mareveliyas mukuwa i Antiok
21i Pawlo zi Barenaba kazu i Dērebē palenak za fukuing, kazuwan na trau mutu temakesi. maveliyas mukuwa i Lustēra nazu, zi mukuwa i Ikoniyom, zi mukuwa ziya i Pisitēya kana Antiok. 22nazu mukuwa i iyaiyan ziya pakaarekez tu anger na temakesi, pukezang kanazu kerevata patrutru za singko, zi marengay ziya kanazu: <<'azi ta ka'azi makalrang za sazu za ulepan zi karuwa mutu zinekalranan kanan kanatal na Viruwa i itras.>> 23nazu na zazuwa patikezir ziya za ciyoro kana saya saya na Kiyokay, kiyanun zi 'emiway i likuzan mu, tu tuluzanay nazu kanantu pakutatena' kinatalrimayan i Luzu.
24nazu na zazuwa makalrang i Pisitēya kana pinidare'an, meredek lra i Pamfiliya. 25kazu i Pērega palenak za vati nazu, zi mukuwa i Ataliya. 26kemay kazu muitras za sudang mareveliyas mukuwa i Antiok. a maw ziyan, kazu kanini na kinazuwan, tu tuluzanay nazu kanantu ipuwavut na Viruwa i itras i savakan zuwa kikaruna kana kinipiya lra na kiyakarunan harem.
27mareveliyas i Antiok nazu, zi demaulr puwazuk kana wadadiyan i kiyokay, marengay pakalrazam kanazu na Viruwa i itras kemuda pakalrang kanazu kikarun, kemuda tremuwalr kana sulray na singko kana sizumayan na trau. 28nazu kazu i kazu mukasa kana sinziya kikazu za pidaya wariyan.
© The Bible Society in Taiwan, 2023