Maruku 7
7
Taburuanata Ku sarkikéta
(Matai 15.1-9)
1Hualrisai ico si salɨké Yérusalrim mukné itabiya na ubrubru Sésio na singsi ngeresɨ mukuné kucɨngɨlɨ Yésu na. 2Iku cɨnglɨdra sétodra ki Yése ka iké na sarké ikbula na rimé kuenɨ tédra tumé Hualrisai ico ptolé mɨtorima.
3Lékatulunedra na Hualrisai ico si druma na Yudai ico ka rɨsaliya kingiaro sarkikédra ku taburuanadra ku sakikédra, ina ningitulru ku tumiayiadra palalé mutorima ka nukaniya; 4ina alangradra salɨké lɨdreke na makainunga nipalaléla bothɨbathɨ ka ikanɨdria#7.4 <<Ina alangadra salɨké lɨdreke na makainunga nipalaléla bothɨbathɨ ka ikanɨdria>> si tuméné <<Ina salɨké lɨdreke, ina nipalaléla bothɨbathɨ rima, ikanɨ ku makainunga>>.. Ikéla madro druma taburuanata ku sakiké, tuména bothɨbathɨni na songungla, lingso plongo, bothɨbathɨ na do si tbingcɨngɨya#7.4 Iké burenɨ na sulatɨ tédra <<tbingcɨngɨya>>..
5Sukédranga ku Hualrisai ico si ubrubru Sésio na singsi kbuburu Yésu na, <<Nakuni séto su isingiaro taburuanata ku sakiké, palalé sarké na ikbula rima kuenɨ?>>
6Ki Yésu masobka, <<Ku Isaiya pokémuakné angméméyanɨ na ico spasobkéni tmémaniayani ka matɨkadrɨngé; tumékné msobka:
Ku Ticomtia tumékné msobaka:
Kné ico ka wasarké thimitu rɨdamɨ ni pkilvu kwa,
iku kdrɨdrɨmɨdra ka lasvagé kwa.
7Iku mutumiadria yani na ico ka amara pangiaro tumia yali na bka;
iku asuksukbadrakua ka tédra tlunedranga!>>
8Ki Yésu lapsobaka, <<Angtuluru mumu ku taburuanata ku sakiké na ico, labongu mumu ku tumiayiadra ki Ticomtia.>>
9Lapsobakalaa, <<Margigili mumu iyara tormana ku tumiayiadra Ticomtia, kiarké mumu tangtuluru taburuanata ku sakikémia. 10Ki Mosi mutumia yadramua, <Muklivka ku tévlakmua>; lakɨtɨlaa, <Iku tilɨgɨsɨ mgaucu tévlakɨdria, nu ptémudu madria.> 11Latumé mumu kɨné msobaka, ina iké ico mra ku slapudra ku tévlakɨdria makainunga lara patumé na <krepan> (tlunedra ka nusabarata Ticomtia yiadra na makakuanga), 12si nulopianga ku tévlakɨdria. 13Ina tumémudria depɨ, tumé na amara buburu bwi ico ku taburuanata ku sakiké yani ptatédranga bkéni Ticomtia. Ladepɨmu na madro tumainia na depɨ.>>
Ku ipitibula na ico ku makainunga
(Matai 15.10-20)
14Ki Yésu ka lakulalaa sorubudria ku makaiconga mua tlucubungadra, lapsobakadria, <<Mubcringa ngurubuanɨnga bkéli, si ptabɨdrɨngɨ rigu. 15Salɨké bɨlatɨ mdanɨmwa adringi na ico ka nuduria ptikdruru na ico; ptalirkuanɨdra, salɨké adring mbuelɨ na ico ka nu ptikdruru mana ico.>>#7.15 Iké burenɨ na sulatɨ 16 pabɨki, <<Iké cigiraka, bicringa!>> (Cɨngɨla ku Maruku 4.23.)
17Ki Yésu sɨvagédria ku icico mdanɨdranga, sétodra ka kiburuburudria kɨné paiku tulunedra. 18Ki Yésu lapsobakadria, <<Tumémumu nia irigu tulune ni? Irigumumu? Salɨké blatɨ muamodringi mbuetɨ na ico ka nu ptikdruru mana ico; 19iku salɨké bɨlatɨ mdanɨ mwa ka ikɨmani amua kdrɨdrɨmɨdra, amua modringi brangɨdra, si lapigiadria mboelɨ.>> (Ki Yésu ka porké makaknenga ka mabula kidri.)
20Pacungulu la msobaka, <<Iku iptibula na ico ka slɨké adring mboelɨ. 21Iku salɨké adringi, amani ku salɨké kdrɨdrɨmɨdra na ico mboelɨ kidri iké ku makakuanga na makurathɨ kdrɨdrɨmɨ, ikné makurathɨ pakdrɨdrɨmɨ nurumaswa mwamia pkangoethɨ, kiupupa, ptémudu, 22mangungoethɨ, masamɨmsɨ, makurathɨ, utɨnangɨ, pakububuelɨ, pathrathra, padrɨkodrɨko, angtukakasɨ, angtartarese kini makapsailanenga. 23Kɨné makapsailanenga makurathɨ ka salɨké ico adringi mboelɨ amani matkadrɨngé iptibula na ico.>>
Singkodra ku sesa na abéya
(Matai 5.21-28)
24Ki Yésu gidra sɨvagé tékadra, mwa Taire dida. Amua sdanɨ sesa thɨkadanɨ, nisadra irigu kwa na ico ma, si iduru kbuli. 25Ispielɨ, iké sesa na abéya, ku vlakɨdra abéya modɨrapɨdria na gɨralɨ, ubciringi Yésu na ku makadepɨdranga sukunénga cɨnglɨdria, pokuru iké kukudra tlucubunga. 26Kɨné abéya ka skadrumanɨ na koka, kétvalkɨ iké Siriya ku Pinici. Kitubi Yésu na mradria ku modɨrapɨ iké tabotɨnani vlakɨli na gɨralɨ pigia. 27Ki Yésu ka lapsobakadria, <<Palalia pkanɨ pkalui vlakɨsu. Mara vlakɨsu knɨdra bongu biu atho pkanɨ ka pasrélékidri.>>
28Ku abéya labri, <<Iyo, musu ka Pɨlɨngɨ, makasi iku iké cukué dida na atho ka ukanɨ ku sungkanadra valavlake.>>
29Ki Yésu masobkadria, <<Pangtulru kné babɨka, nuduruma musu sviringa, ugianga ku gɨralɨ svagé tabotɨnadra ku vlakɨsu.>>
30Si iku abéya lagia sviri, cɨnglɨ vlakɨdra abéya iké tbingcɨngɨ ébare; gɨralɨ ka ugiangadria sɨvagénga.
Yésu ka pakragagi sesa na macɨcɨlɨ si manglu na ico
31Ki Yésu ku gidra sɨvagé Taire spégisi déda, uribatɨ Sidon, siliké Mengesle na Cɨkɨlɨ agisne sviri mwa Galrilri tubaru. 32Iké na ico emɨcɨ na macɨcɨlɨ manglu na ico mua tlucubungadra ki Yésu, ktubi Yésu na depaniamia. 33Ki Yésu ka amaradria psaliké ku icico orkɨ mboelɨ, ɨmcɨ mua birla, lasarké rimédra podringi cingirédra, si lasarké ngɨrédra drisidrisi ku rdamɨdra. 34Ki Yésu lapsévagarɨ, psosoro mnanekɨ, msobakadria ku ico, <<Ipata!>> ku tlunɨdra ka <<Anganga!>>
35Kidri ku cingirédra mualɨbɨnga, si ku rɨdangmdra kirthuku ka mwaskeskenga, anganga msobaka, tédranga ku spatérubudra. 36Ku Yésu ka latililadria mumu ngurubuanɨnga kɨné tumaneni depɨ musadra igia tilila; makasi kumidra kulula ka, sakukurama kcɨnganɨ kmani gia prabu. 37Iku makaiconga ubciringi ka rɨsama mrɨkɨmɨ, rɨsalia msobaka, <<Iku makadopaninga ka sakura margi! Ku macɨcɨlɨ ka ubciringinga, ku manglu ka lapobkanga.>>
Currently Selected:
Maruku 7: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
