Maruku 6
6
Ku Nasaleng ico ka masmadrɨ Yésu na
(Matai 13.53-58; Luka 4.16-30)
1Ki Yésu svagédranga ku déda, siviri mwa cɨkɨcɨkɨlɨdra; ki sétodra kisapradriaa. 2Muidranga ku tébarbarvia na vienɨ, iké tisarbubua na Yudai ico adringi buburu na ico. Madro na ico biciring bkédra rɨsalia mrɨkɨmɨ msobaka, <<Kɨné ico ka salɨkanɨni mra na kɨcɨnga? Aci ku ubénia tumékɨné na rigiline? Laduru sdepɨ depɨdra Pɨlɨngɨ! 3Ikɨmani ku sidepɨ na angatu daikusang? Ikɨmani vlakɨdra ki Malriya, Yakobu, Yosépe, Yuda si Simon kakidria sovlé? Ligilidria bébibé ka ikaimtia kɨné sdanɨ terɨsɨ?>> Sukédra msangmdredria.
4Ki Yésu ka lapsobakadria, <<Ku maburosi iké cɨkɨcɨkɨlɨni, zukuni, dani na ico rɨsaliya pkiluvudria.>>
5Sukéni, ikédra ckɨlɨnika tédra adepadra depɨdra Pɨlɨngɨ, wakɨmanɨmani sraké riméni, pakargagidria ku macemɨ. 6Porké kɨné itkabɨkanɨ na ico, ka wakuro.
Yésu ka uru ku mengesle kudrusa sétodra
(Matai 10.5-15; Luka 9.1-6)
Ki Yésu ka itɨré iké idadelé maka cɨkɨcɨkɨlɨnga buburu na ico. 7La sorobu ku mengesle kudrusa sétodra, urudria matrudrudrusa gia, labédria na kɨcɨnga sudurunga pigia na gɨralɨ. 8Larudria msobaka, <<Iké mu dadɨranɨ tkathadra na sessa skudru, musadra imɨcɨ na makainunga, imɨcɨ na kɨne, imɨcɨ na kɨdé (tɨlethɨ), thubungusu adra ipthubungu na pésu, 9manɨmania skucu, adra ingidrusa na sadridringi mamɨne.>> 10Lapsobaka ladriaa, <<Ina muimunga sesa déda, ikédra madalamemwa tormane ku thɨkadanɨ ka, mukiadria sdanɨ, siektɨ gimugna svagédria déda. 11Kumidra uwamu makadédanɨnga, ina tilikédria na ico niktoromanemwa, si ibciringi bkému, mugia svagédria ku déda, iku iké kukumu na ado ka pipiadria ovra, spaigumu ku musadra itɨmainia yamu.>>
12Sugianga mua déndomia, mungépela miadria ku makaiconga. 13Madro ku pagiadra na gɨralɨ, sarké na sɨsɨ drisidrisidria ku madro macemɨ na ico, pakargagidria ku cemɨnedra.
Pababɨno Yuhani ku tkamudɨnadra
(Matai 14.1-12; Luka 9.7-9)
14Ku makadepɨdranga ki Yésu ka ubiciringa tlalé Hirudi, nakuniyadra ka aracɨni Yésu tédra ku ilrigungadria makadédanɨnga. Iké ico masobka, <<Kɨné ka amani pababɨno Yuhani sielanga, sukédra likédria kɨcɨnga duru sdepɨ depɨdra Pɨlɨngɨ.>>
15Iké ico masobka, <<Éliya kini.>>
Iké tumékɨné na ico msobaka, <<Kini ka maburosi, tumédria ku buruenɨ sesa na maburosi (yugingsia).>>
16Ki Hirudi biciringidra kɨné babɨka, lapusobaka, <<Kini ka amani ku otrévnavnedria pababɨno Yuhani, sielanga kidri!>> 17Ki Hirudi uru muapora Yuhani na mia, laradria krɨngɨ, ɨlɨbɨ piké tkrɨkrɨnga. Ku tumanidria Hirudi kiaké domu Hirodiya na, tlunɨdra Hirudi ka usiri lɨmengnedra Pilipi asiradra Hirodiya. 18Yuhani ka ukbielɨdra mgaucu Hirudi na, <<Urbici musu asiradra lɨmengnesu pasrélémusu!>>
19Sukédra Hirodiya ka tikiemɨ Yuhani na pké drɨdrɨmɨdra, kuptémudu driamia, makasi isuduru. 20Ki Hirudi akuludru Yuhani na, urugunia matkadrɨngé técavɨnani mabula srakéni, si lalkebedria. Ki Hirudi sɨnabiciringidra Yuhani ku spobakbakédra, iksukuro kdrɨdrɨmɨdra, makasi madalamɨlaa biciringi spobakbakédra.
21Ki Hirodiya ku adravadra kɨdrama ka amuanga. Ku kétevalekadra ki Hirudi na vienɨ, péngkanɨ sorbu ku séhu maragre mrigili na ico, maka otatarasɨnga, si Galrilri otatrasɨdria skabranɨ. 22Ku icɨngcɨngngɨdra ngékene, vlakɨdra abéya Hirodiya#6.22 <<vlakɨdra abéya Hirodiya>> iké druma na buruenɨ sulatɨ tuméné <<vlakɨdra abéya Hirodiya>>. mbuelɨ throbu; Hirudi si ku brabra rɨsaliya mrabrabre. Iku tlalé lapsobakadria, <<Ina ikédra makakuktubi yasukwa, iyo nomakswa buyi.>> 23Lapébrilne tɨmémakɨniamia, <<Ina maka kuktubiyasunga, kuméni kɨné dédali maka rgɨrgɨnga ka, nubémakɨswa pakratha!>>
24Iku vlavlakɨ abéya sugiangamwa kububuru ku ningdria, <<Aci ku nuktubiali?>>
Ningdria ka ubri musobaka, <<Orudra ki pababɨno Yuhani.>>
25Vlavlakɨ abéya laribungu sviri kcɨnglɨ ku tlalédra, ktubi musobaka, <<Ktubidria ku tlalédra mra ku orudra pababɨno Yuhani pwa pɨcɨnga buingkwa!>>
26Ku tlalé bicringidra kitubianɨdra, sakura mopungu, makasi masobɨkanga iké tulucubungadra ku brabra tmémakɨdriamia, si iduru éni miadira vlavlakɨ abéya ku kitubianɨdra. 27Si suribungunga uru ku popin mwa mra orudra ki Yuhani mia. Labalte popingi, mwa tkrɨkrɨnga, trévnavne orudra Yuhani. 28Piké pɨcɨnga, emɨcɨ psiviri bwi vlakɨdra abéya ki Hirodiya; vlakɨdra abéya laranga bwi ningdria. 29Ku sétodra Yuhani bicringidra tumédriamia, sukunénga mra tabotɨnadra ki Yuhani giaɨmɨcɨ, ubulu pké tabubla.
Ki Yésu pakɨne pkalui rima kzulu na ico
(Matai 14.13-21; Luka 9.10-17; Yuhani 6.1-14)
30Ku sétodra sivri cɨnglɨ Yésu na, mra ku makadopadranga, si adéngdavadra tililadria. 31Iku masavrivri na ico ka sakura madro, Yésu si sétodra tédra na samoru kuenɨ, sukéni Yésu ka lapsobakadria, <<Nanga, muksapara kwa tuwa wakmanɨmani rborbo na téka obailanɨ.>> 32Si sugianga kiudu avangɨ, thulungu mwa rborbo na tékika.
33Makasi, madro na ico ucɨnglɨdria gidra, rigungadria. Madro na salké makaskabranɨnga mukné, ku palalénga mia ribungu, mua thamdalɨnedria Yésu na si sétodra mwa ku déda. 34Ki Yésu mtablanɨdranga, lacɨngɨlɨ madro israbu na ico, sukéngadria magugucu na kdrɨdrɨmɨ, ina tuménidria ka tumé na tédra paknunuengɨ na ico ku iyu. Suskérodru buburungadria na makadepɨnga. 35Ku msamɨsmɨninga, lakuné ku sétodra cɨnglɨdria, musobaka, <<Masungunga, rborbo kɨné tékata. 36Mugia mɨvagvagé, mwa édadelé na ckɨckɨlɨ ngélangé ku nukanamu kne.>>
37Ki Yésu masobka, <<Mupkanania.>>
Lakbuburu, <<Musarkia na drusa ɨdé gingi longé na pangɨ bui pkanɨ mamusunɨma iyo?>>
38Ki Yésu ka lapusobakadria, <<Mwa cɨnglɨ apidra ngiculunga na iké pang?>>
Iku mkacɨnglɨdranga ka masobka, <<Rima na pang si drusa na akangɨ.>>
39Ki Yésu laurudria ku sétodra tila makaiconga mwa irubu mitisurienɨ inunu iké csrosrova déda. 40Ngurubuanɨdranga inunu, iké sesa surienɨ ka sesa ɨdé na ico, iké sesa surienɨ na mrémle ico. 41Ki Yésu laradria ku rima pang si drusa na akangɨ, lapsévagarɨ, takdrɨngésu Ticonɨmamia, lapciri pang, bui sétodra, supvalɨvalanga buidria ngurubuanɨnga. Tumaai, lara drusa akangɨ pvalɨvaladria. 42Rɨsaliya kuenɨ, mului. 43Sétodra ka lara songkanadra na pang si akangɨ pua psɨtɨ mngesle kdrusa na sboro. 44Iku ukanɨnga mului sovalé na ico ka, rima kuzulu.
Ki Yésu ka iké cɨlé garɨ dodavce
(Matai 14.22-33; Yuhani 6.16-21)
45Drienɨnga kɨné depɨ, ki Yésu padirivne ku sétodra mragra avangɨmia, palalémwa savkalɨ Béthesaida, si drodrodria pvagvagé ku icico. 46Setɨdrɨdranga dria si luva rgɨrgɨ sukbu. 47Ku msamɨsmɨninga, avangɨ ka ugianga mua tɨbaru bɨcreka, ki Yésu latangɨsa isubirili iké tibila. 48Lacɨngɨlɨ sétodra vɨlɨvɨlɨdra ku avangɨ sakura na abrélé, iku avangɨ kidrɨsɨngɨ na bsɨbsɨ gia. Kuklilierɨ midranga, ki Yésu ka iké tɨbaru garɨ dovdavce matlévéthadria mukné, la pakdrɨdrɨmɨ kongké bilani ribte gia mia#6.48 <<la pakdrɨdrɨmɨ kongké bilani ribte gia mia>> si tuméné <<ku ktaparania ma>>.. 49Rsalia cɨnglɨdria iké cɨlé garɨ dodavce, armé plɨngɨ otlobabradria, rɨsamia mrɨkmɨ thɨpɨrɨ. 50Iku cɨnglɨnidria, rɨsamia mrɨkmɨ.
Ki Yésu laribungu msobakadria, <<Ptapɨdrɨnga kdrɨdrɨm mu, amanikɨkɨ, musadra ikuldru!>> 51Si soragɨrenga avangɨ, muaterɨsɨ, iku bsɨbsɨ ka itrénga. Ku sétodra ka markɨmɨ si lakvingvingi, 52tumanidria ka irigula ku pavlavladra na pang ku tlunedra; pakdrɨdrɨmɨdra ka osodré.
Pakragagi macemɨ na Génésarétɨ ico
(Matai 14.34-36)
53Ku msavakledranga tɨbaru, iké Génésarétɨ mbila, lakrɨngɨ ɨbkɨ avangɨ. 54Rɨsalia siliké avangɨ mbuelɨ, ku makaiciconga mkakainga rigu Yésu kini miya. 55Sugianga ngiculu dodadavce ku tékanidria, bicringidra tikadra ki Yésu, laradria ku macemɨ na ico sarké spa lobɨca mwa tikadra. 56Ki Yésu kumédra mwa na ckɨlɨ, mwa ldreke, si skabranɨ, iku makaiciconga amaradria ku macemɨ pké dadɨranɨ, ktubi Yésu na nidepɨ macemɨ ɨbɨlɨni tpuruamia; iku udepɨnga na ico ka margarginga cemɨnedra.
Currently Selected:
Maruku 6: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
