Санау 5
5
Къонушну тазалыгъыны юсюнден буйрукъла
1Раббий Муссагъа былай айтханды:
2– Исраил улулагъа буюр, ала жукъгъан тери ауруулары болгъанланы, къан неда ирин чыкъгъанлары болгъанланы, ёлюкге тийип, харам болгъанланы, къонушдан тышына ашырсынла. 3Эр кишилени да, тиширыуланы да къонушдан тышына ашырыгъыз. Ала къонушларын харам этмесинле, нек десегиз, Мен аланы арасында жашайма.
4Исраил улула алай этгендиле, аланы къонушдан тышына ашыргъандыла. Исраил улула Раббий Муссагъа айтханы кибик, алай этгендиле.
Этилген аманлыкъ ючюн тёлеу
5Раббий Муссагъа былай айтханды:
6– Исраил улулагъа былай айт: «Эр киши, не тиширыу башха адамгъа къажау бир гюнях этип, аны бла Раббийге тюз ниетлилигин бузуп, терс болса, 7этген гюняхларын айтып, ачыкъ этсинле. Терсликлери ючюн ала толусунлай тёлеу берсинле, аны юсюне бешден бирин да къошуп, кимге къажау гюнях этген эселе, анга къайтарсынла. 8Заран тюшген адам ёлюп, тёлеу берирге жууукълары болмаса уа, заран ючюн тёлеу Раббийни боллукъду. Аны терс адамны тазалагъан къурман къочхар бла бирге дин къуллукъчугъа берсинле. 9Исраил улула дин къуллукъчугъа келтирген битеу сыйлы саугъала аны болсунла. 10Адам келтирген сыйлы саугъала дин къуллукъчуну болсунла; дин къуллукъчугъа берилген хар зат, аны болсун».
Зийна этген къатынны сынау
11Раббий Муссагъа былай айтханды:
12– Исраил улулагъа сёлешип, былай айт: «Биреуню къатыны, зийна этип, некях антын бузса, 13аны бла бир башха адам жатып, окъ тёксе, эри уа аны билмесе, къатын жашыртын аллай иш этип харам болса, эм анга шагъат болмай, ол айгъакъланмай#5:13 Айгъакъланыргъа – орус. вскрываться, обнаруживаться, выявляться. къалса, 14эри уа харам болгъан къатынына ишекли болуп, жаны къыйналса, неда къатынны харамлыгъы болмай, эри уа ишекли болуп жаны къыйналса, 15ол адам къатынын дин къуллукъчугъа келтирсин. Аны ючюн ол арпа ундан эфаны ондан бирин#5:15 2 литрге жууукъ. саугъагъа берсин, алай а унну юсюне зейтун жау къуймасын, ладан да салмасын, нек дегенде, бу ишеклилик саугъады, аманлыкъны эсгертген саугъады.
16Дин къуллукъчу ол къатынны келтирип Раббийни аллына сюесин. 17Сора дин къуллукъчу сыйлы сууну къошун сауутха къуйсун да, Сыйлы Чатырны тапхычындан#5:17 Тапхыч – юйню тюбю, пол. топуракъ алып, суугъа къошсун. 18Дин къуллукъчу ол къатынны Раббийни аллына сюесин, чачын ачсын, къолларына эсгертиу саугъаны, ишеклилик саугъаны берсин. Дин къуллукъчуну къолунда уа налат келтириучю ачы суу болсун. 19Сора дин къуллукъчу ант этип къатыннга былай айтсын: „Эрингден башха бир адам сени бла жатмагъан эсе, сен эринге берген некях антынгы бузмагъан эсенг эм харам болмагъан эсенг, бу налат келтириучю ачы суу санга заран этмез. 20Алай а сен, эринге берген некях антынгы бузуп, харам болгъан эсенг, сени бла эрингден башха биреу жатхан эсе, – 21деп, ол заманда дин къуллукъчу къатыннга ант этерге буюруп, быллай къаргъыш сёзле айтсын: – Раббий халкъны арасында сени къаргъасын эм санга налат берсин. Раббийни буйругъу бла сени ичинг кетсин эм къарынынг къаратон болсун. 22Ол налат келтириучю суу ичинге ётсюн да, къарынынг къаратон болсун эм ичинг кетсин“.
Ол заманда къатын: „Амин, алай болсун“, – деп айтсын.
23Дин къуллукъчу бу къаргъышланы къагъытха жазып, ол жазыуну жуууп ачы суугъа къуйсун. 24Сора налат келтириучю ачы сууну къатыннга ичирсин да, ол суу ичине кирип, анга заран этер. 25Дин къуллукъчу къатынны къолларындан ишеклилик саугъаны алсын, аны Раббийни аллында кётюрюп силкиндирсин да, къурман этилиучю жерге келтирсин. 26Дин къуллукъчу мирзеу саугъадан эсгертиу юлюшге бир уууч алсын да, аны къурман этилиучю жерде кюйдюрсюн, сора къатыннга сууну ичирсин. 27Анга сууну ичиргенден сора, къатын харам эсе, кишисине тюзлюгюн бузгъан эсе, налат келтириучю ачы суу, аны ичине кирип, заран этер, аны къарыны къаратон болур эм ичи кетер. Халкъ арасында ол къатын налатлы боллукъду. 28Ол къатын харам болмай, таза эсе уа, анга заран тюшерик тюйюлдю, ол сабий табаргъа болаллыкъды.
29Къатынына ишекли болууну юсюнден адет буду. Къатын эрине берген некях антын бузуп харам болса, 30неда эр киши къатынына ишекли болуп, жаны къыйналса, дин къуллукъчу ол къатынны Раббийни аллына сюеп, анга хар затны бу адетге кёре этсин. 31Алай бла ол адам гюняхдан таза болур, къатыны уа гюняхы ючюн, азап чегер».
Currently Selected:
Санау 5: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
