Санау 4
4
Кохат улуланы къуллукълары
1Раббий Муссагъа бла Харуннга былай айтханды:
2– Лебий улуладан Кохат улуланы бутагъын тукъумларына бла юйюрлерине кёре, 3жыл санлары отуздан башлап эллиге дери болгъан эр кишилени сана. Ала Тюбешиу Чатырны жумушларын этсинле.
4Кохат улуланы Тюбешиу Чатыр бла байламлы къуллукълары буду: ала эм сыйлы затланы къайгъысын этсинле. 5Къонуш жолгъа чыгъарыкъ заманда Харун бла аны уланлары, кирип, бёлген жабыуну тешип алсынла да, аны бла Шагъатлыкъ Кюбюрню юсюн жапсынла. 6Жабыуну юсюне кёк сахтиян салсынла, аны юсюне уа кёк жабыуну жайсынла, къурукъларын#4:6 Къурукъ – орус. жердь, шест. тогъайларына кийирсинле.
7Сыйлы ётмек салыныучу аш къанганы юсюне ала кёк жабыуну жайсынла, табакъланы, чынланы эм къурманны юсюне къуюлгъан саугъагъа чагъыр къуяргъа ишленнген аякъланы бла къошунланы салсынла. Дайым ётмек да аны юсюнде тургъаныча турсун. 8Аланы юсюне къызыл жабыуну жайсынла, аны кёк сахтиян жабыу бла жапсынла, къурукъларын тогъайларына кийирсинле.
9Сора кёк жабыуну алсынла да чырахтанны да, аны чыракъларын да, къысхачларын, къуйгъучларын, жау къуяргъа ишленнген битеу сауутларын да жапсынла. 10Ала чырахтанны битеу кереклери бла бирге кёк сахтиян жабыугъа чулгъап, бокълауучха салсынла.
11Алтындан ишленнген, юсюнде ладан ийис чыгъарылыучу жерни юсюне кёк жабыуну жайсынла, аны кёк сахтиян жабыу бла жапсынла, къурукъларын тогъайларына кийирсинле.
12Сыйлы табыныучу жерде хайырланнган битеу кереклени алсынла да, аланы кёк жабыугъа чулгъасынла, юслерин кёк сахтиян жабыу бла жапсынла да, бокълауучха салсынла.
13Къурман этилиучю жерден кюлню кетерип, юсюне къызгъылдым жабыуну жайсынла. 14Аны юсюне къурман этилиучю жер бла байламлы къуллукъда хайырланнган битеу адырланы: мыдых алыучу сауутланы, сенеклени, кюреклени эм тазланы – салсынла. Аны юсюне кёк сахтиян жабыуну жайсынла, къурукъларын тогъайларына кийирсинле.
15Къонуш жолгъа тебиреген заманда, Харун бла уланлары табыныучу жерни эм аны адырларын жабып бошагъандан сора, быланы барын элтир ючюн Кохат улула келсинле. Ала кеслери бу сыйлы затлагъа тиймесинле, тийселе уа ёллюкдюле. Была Кохат улула ташырыкъ Тюбешиу Чатырны адырларыдыла.
16Дин къуллукъчу Харунну уланы Элазар чыракъ жауну, ариу ийисли затланы, дайым гыржын саугъаланы бла майлау жауну къайгъысын этсин. Ол сыйлы чатырны бла аны ичиндеги хар затны – Сыйлы Жерни бла аны адырларыны – къайгъысын этсин.
17Раббий Муссагъа бла Харуннга былай айтханды:
18– Лебийлилени арасында кохатлыланы тайпа тукъумларын жоюлуудан сакълагъыз. 19Ала Эм Сыйлы Жерге жууукълашханда ёлмегенлей, саулай турур ючюн былай этигиз: Харун бла аны уланлары, табыныучу жерге кирип, аланы хар бирине къуллугъун бла ташырыкъ затларын буюрсунла. 20Ала кеслери уа, сыйлы затлагъа жабыула салыннган заманда, кирип, алагъа къарармазгъа сакъ болсунла. Алайсыз, ёллюкдюле.
Гершон улуланы къуллукълары
21Раббий Муссагъа былай айтханды:
22– Гершон улуланы юйюрлерине бла тукъумларына кёре тизме этип, сана. 23Тюбешиу Чатыр бла байламлы къуллукъ эталлыкъ, жыл санлары отуздан башлап эллиге дери болгъан эр кишилени сана.
24Гершонлула тукъумланы жумуш этиуде бла жюк ташыуда къуллукълары буду: 25ала Сыйлы Чатырны жабыуларын ташысынла – Тюбешиу Чатырны жабыуун, аны юсюндеги кёк сахтияндан этилген тыш жабыуну, Тюбешиу Чатырны эшик жабыуун, 26Чатырны бла къурман этилиучю жерни тёгерегиндеги арбазны жабыуларын, арбазны эшик жабыуун, аланы жыжымларын эм битеу кереклерин ташысынла. Бу затла бла байламлы хар жумушну ала этсинле. 27Гершонлуланы битеу къуллукълары – жюк ташыу, не башха жумуш – Харунну бла аны уланларыны оноулары бла этилсинле. Гершон улула битеу ташыгъан затларына къарасынла. 28Гершонлуланы тукъумлары Тюбешиу Чатырда этерик жумушлары буду. Дин къуллукъчу Харунну уланы Итамар алагъа башчы болсун.
Мерарий улуланы къуллукълары
29Мерарий улуланы тукъумларына бла йюрлерине кёре сана. 30Тюбешиу Чатыр бла байламлы къуллукъ этер ючюн, жыл санлары отуздан башлап эллиге дери болгъан, къуллукъгъа жараулу эр кишилени сана. 31Ала Тюбешиу Чатыр бла байламлы жумуш этгенде, ала ташырыкъ затла быладыла: чатырны илкичлери, къурукълары, багъаналары#4:31 Багъана – орус. столб, опора. эм ыргъакълары, 32арбазны багъаналары бла аланы ыргъакълары, къазыкълары, жыжымлары, аланы битеу кереклери бла адырлары. Ала ташырыкъ затларын хар бирине билдир. 33Мерарий улуланы тукъумлары Тюбешиу Чатырда этерик жумушлары буду. Дин къуллукъчу Харунну уланы Итамар алагъа башчы болсун.
Лебийлилени тукъумлары саналадыла
34Мусса, Харун эм жамауатны бачамалары Кохат улуланы тукъумларына бла юйюрлерине кёре санагъандыла. 35Тюбешиу Чатырда къуллукъ этер ючюн, жыл санлары отуздан башлап эллиге дери болгъан, къуллукъгъа жараулу эр кишилени санагъандыла. 36Аланы тукъумларына кёре санагъанда, 2 750 адам болгъанды. 37Кохатлыланы тукъумларындан Тюбешиу Чатырда къуллукъ этгенлени саны буду. Мусса бла Харун аланы Раббий Муссагъа буюргъаны кибик, алай санагъандыла.
38Гершон улулары да тукъумларына бла юйюрлерине кёре эсепге алыннгандыла. 39Тюбешиу Чатырда къуллукъ этер ючюн, жыл санлары отуздан башлап эллиге дери болгъан, къуллукъгъа жараулу эр кишилени санагъандыла. 40Аланы тукъумларына бла юйюрлерине кёре санагъанда, 2 630 адам болгъанды. 41Гершон улуланы тукъумларында саналгъанланы, Тюбешиу Чатырда къуллукъ этгенлени саны буду. Мусса бла Харун аланы Раббий буюргъаны кибик, алай санагъандыла.
42Мерарий улуланы да тукъумларына бла юйюрлерине кёре санагъандыла. 43Тюбешиу Чатырда къуллукъ этер ючюн, жыл санлары отуздан башлап эллиге дери болгъан, къуллукъгъа жараулу эр кишилени санагъандыла. 44Аланы тукъумларына кёре санагъанда, 3 200 адам болгъанды. 45Мерарий улуланы тукъумларында адамланы саны буду. Мусса бла Харун аланы Раббий Муссагъа буюргъаны кибик, алай санагъандыла.
46Алай бла Мусса, Харун эм Исраилни бачамалары битеу лебийлилени аланы тукъумларына бла юйюрлерине кёре санагъандыла. 47Жыл санлары отуздан башлап эллиге дери болгъан, Тюбешиу Чатырда къуллукъ этерге эм аны ташыргъа жараулу адамланы санагъандыла. 48Аланы саны 8 580 адам болгъанды. 49Раббий Муссагъа буюргъаны кибик, аланы санап, хар бирине жумушун бла ташырыкъ затларын белгилегендиле.
Алай бла, аланы Раббий Муссагъа буюргъаны кибик санагъандыла.
Currently Selected:
Санау 4: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
