Санау 6
6
Нюзюр#6:1 Нюзюр – ант этмеклик, сёз бермеклик; орус. торжественное обещание, обет. антны жорукълары
1Раббий Муссагъа былай айтханды:
2– Исраил улулагъа былай айт: «Бир эр киши неда тиширыу кесин Раббийге берир ючюн нюзюр ант этерге таукел болса, 3ол чагъырдан бла башха эсиртген ичгиден кесин сакъласын эмда чагъырдан бла башха эсиртген ичгиден этилген сиркесууну ичмесин, жюзюм суу ичмесин, жюзюм неда кишмиш ашамасын. 4Нюзюрлюгюню битеу заманында ол жюзюмден этилген бир зат да ашамасын, не бюртюгюн, не къабугъун окъуна къапмасын.
5Нюзюр анты болгъан битеу заманында аны башына жюлгюч тиймесин. Кесин Раббийге жоралагъан кюнлери бошалгъынчы ол сыйлы болсун, чачын ёсмеге къойсун. 6Кесин Раббийге жоралагъан кезиуде ол ёлюкге жууукълашмасын. 7Атасы, анасы, къарындашы неда эгечи ёлсе окъуна, ол кесин харам этмесин, нек дегенде, аны башында Аллахха нюзюрлюгю барды. 8Нюзюрлюгюню битеу кезиуюнде ол Раббийни сыйлысы болсун.
9Биреу аны къатында билмей тургъанлай ёлюп къалып, аны нюзюр башы харам болса, ол тазаланнган кюнюнде башын жюлютсюн, жетинчи кюн чачын къыркъдырсын. 10Сегизинчи кюн а ол дин къуллукъчугъа, Тюбешиу Чатырны эшик аллына эки къумру#6:10 Къумру – орус. горлица. неда эки жаш кёгюрчюн келтирсин. 11Дин къуллукъчу аладан бирин гюнях ючюн къурманнга, экинчисин а, толусунлай кюйдюрюлген къурманнга келтирип, аны жулусун, нек дегенде, ол ёлюкден харам болгъанды. Аны бла ол кюн башын жангыдан сыйлы этсин. 12Ол, нюзюрлюк кезиуге кесин жангыдан Раббийге берип, терслик ючюн къурманнга жыллыкъ къозу келтирсин. Ол нюзюрлюгюн харам этгени себепли, алгъыннгы кюнлери саналмайдыла.
13Нюзюрлюгю болгъан адамны юсюнден адет буду. Аны нюзюрлюк кезиую бошалгъан кюн, Тюбешиу Чатырны эшик аллына келтирсинле. 14Анда ол Раббийге быллай къурманла этсин: толусунлай кюйдюрюлген къурманнга – къыяусуз жыллыкъ эркек къозуну, гюнях ючюн къурманнга – къыяусуз жыллыкъ тиши къозуну, саламатлыкъ къурманнга – къыяусуз къочхарны келтирсин. 15Ала бла бирге мирзеу саугъала бла къурманлыкъгъа къуюлгъан саугъала келтирсин, эмда саугъагъа ачымагъан ётмекледен, бидиш#6:15 Бидиш – будайны бек сайламасы, бек иги сорту. ундан этилген зейтун жау бла басылгъан ётмекледен, зейтун жау жагъылгъан гюттюледен бир четен келтирсин.
16Дин къуллукъчу быланы Раббийни аллына келтирсин да, гюнях ючюн къурманны бла толусунлай кюйдюрюлген къурманны сойсун. 17Сора ол Раббийге саламатлыкъ къурманнга къочхар, биргесине да бир четен ачымагъан ётмек келтирсин. Дин къуллукъчу, дагъыда, мирзеу саугъала бла къурманлыкъгъа къуюлгъан саугъала келтирсин.
18Сора нюзюрю болгъан адам нюзюрлюкде ёсдюрген чачын Тюбешиу Чатырны эшик аллында къыркъдырсын, эмда чачын алып, саламатлыкъ къурманны тюбюндеги отха атсын.
19Нюзюр нюзюрлюкде ёсдюрген чачын къыркъдыргъандан сора, дин къуллукъчу къочхарны сууда бишген жаурунун, четенден бир ачымагъан ётмекни бла бир гюттюню алып, нюзюрню къолларына салсын. 20Сора дин къуллукъчу аланы кётюрюлген саугъагъа Раббийни аллында кётюрсюн. Ала кётюрюлген тёш бла эм саугъагъа берилген бут бла бирге дин къуллукъчуну сыйлы юлюшюдюле. Андан сора нюзюр чагъыр ичерге эркинди.
21Нюзюр антына кёре нюзюрлюгю ючюн Раббийге берген къурманланы юсюнден адет буду. Мындан башха зат келтирирге жетишимлиги болса, анга да эркинди. Берген антын ол нюзюрлюкню жоругъуна кёре толтурсун».
Дин къуллукъчуну алгъышы
22Раббий Муссагъа былай айтханды:
23– Харуннга бла аны уланларына айт: «Исраил улулагъа былай айтып алгъыш этигиз:
24Раббий сени алгъышлы этсин
эм сени сакъласын;
25Раббий сени жарыкъ бети бла жарытсын
эм санга мархаматлы болсун;
26Раббий санга бетин айландырсын
эм санга ырахатлыкъ берсин».
27Алай бла ала Мени атымы Исраил улулагъа алгъышха айтсынла, сора Мен аланы алгъышлы этерме.
Currently Selected:
Санау 6: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
