Лебийлиле 20
20
Тюрлю гюняхла ючюн азап жетдириу
1Раббий Муссагъа былай айтханды:
2– Исраил улулагъа былай айт:
«Исраил улуладан бир адам неда исраиллилени арасында жашагъан тыш адам кесини сабийин Молек тейриге къурманнга келтирсе, аны ёлтюрюрге керекди. Ол жерни халкъы аны ташла бла уруп ёлтюрсюн. 3Мен да бетими ол адамгъа къажау айландырып, аны ёз халкъыны арасындан жокъ этерме; нек дегенде, сабийин Молек тейриге къурман этип, ол Мени Сыйлы Жерими харам этгенди, Мени сыйлы Атымы да бедишлик этгенди. 4Бу адам сабийин Молек тейриге келтирип, ол жерни халкъы уа анга эс бурмаса эмда аны ёлтюрмесе, 5Мен кесим бетими ол адамгъа да, аны тукъумуна да къажау айландырып, аны да, аны кибик Молекге къуллукъ этиу бла саякълыкъ этгенлени да, халкъны арасындан жокъ этерме.
6Ким ёлгенлени чакъыргъанлагъа неда жинле чакъыргъанлагъа барыу бла саякълыкъ этсе, Мен бетими ол адамгъа къажау айландырып, аны ёз халкъыны арасындан жокъ этерме.
7Кесигизни сыйлы этигиз эмда сыйлы болугъуз. Мен – Раббийме, сизни Аллахыгъызма. 8Мени жорукъларымы тутугъуз эм аланы толтуругъуз. Мен – сизни сыйлы этген Раббийме.
9Атасын неда анасын къаргъагъан адамны ёлтюрюрге керекди. Ол атасын неда анасын къаргъагъанды, аны къаны кесини хатасынданды.
10Бир адам эри болгъан тиширыу бла зийна этсе, бир башха адамны къатыны бла жатса, ол зийначы адамны да, зийначы тиширыуну да ёлтюрюрге керекди.
11Бир адам атасыны къатыны бла жатса, ол атасын бедишлик этгенди. Аны да, тиширыуну да ёлтюрюрге керекди. Аланы къанлары кеслерини хаталарынданды.
12Бир адам келини бла жатса, экисин да ёлтюрюрге керекди. Ала къутсуз иш этгендиле, къанлары кеслерини хаталарынданды.
13Бир адам, тиширыу бла жатхан кибик, эр киши бла жатса, ала экиси да къутсуз иш этгендиле. Аланы ёлтюрюрге керекди, къанлары кеслерини хаталарынданды.
14Бир адам къатыннга бла аны анасына бирча юйленсе, ол саякълыкъ иш этгенди. Аны да, тиширыуланы да отда кюйдюрюрге керекди; сизни арагъызда саякълыкъ болмасын.
15Бир адам хайыуан бла жатса, аны ёлтюрюрге керекди. Хайыуанны да ёлтюрюгюз.
16Тиширыу хайыуанны тюбюне жатса, ол тиширыуну да, хайыуанны да ёлтюрюгюз. Аланы ёлтюрюрге керекди; къанлары кеслерини хаталарынданды.
17Бир адам туугъан эгечине, атасыны неда анасыны къызына юйленип, аны бла жатса, ол бедишлик ишди. Аланы халкъ аллындан къыстасынла: ол туугъан эгечи бла жатханды, терслиги ючюн жууаплы болур.
18Бир адам, къатыны хайыз кёрген заманда, аны бла жатса, ол аны агъыуун айгъакълагъанды, тиширыу да кесини агъыуун ачыкъ этгенди. Аланы экисин да халкъ арасындан жокъ этерге керекди.
19Анангы неда атангы эгечи бла жатма, ол жууукълукъгъа бедишликди. Терслигигизге экигиз да жууап тутарыкъсыз.
20Бир адам атасыны неда анасыны къарындашыны къатыны бла жатса, ол атасыны неда анасыны къарындашын бедишлик этгенди. Ала гюняхларына жууаплы болурла эмда сабийсиз ёлюрле.
21Биреу къарындашыны къатынына юйленсе – ол харамлыкъды, ол адам къарындашын бедишлик этеди. Ала сабийсиз къаллыкъдыла.
22Мени битеу жорукъларымы бла битеу хукмуларымы тутугъуз эм толтуругъуз. Сора Мен, сиз жашар ючюн, элтген жер сизни къусуп атмаз. 23Мен сизден къыстагъан миллетлени адетлерине кёре жашамагъыз. Ала битеу бу затланы этип тургъандыла да, Мен алагъа андан ачыуланнганма. 24Сизге уа Мен былай айтама: „Сиз аланы жерлерин къолгъа аллыкъсыз. Мен сизге бу сют бла бал баргъан жерни мюлкге береме“. Мен – Раббийме, сизни Аллахыгъызма. Мен сизни башха халкъладан айыргъанма.
25Хайыуанланы бла къанатлыланы халалын харамындан айырыгъыз. Мен харам деп айыргъан хайыуанланы, къанатлыланы эмда жерде сюркелегенлени ашап, кесигизни харам этмегиз. 26Мени аллымда сыйлы болугъуз, нек дегенде, Мен, Раббий – сыйлыма. Сиз Меники болугъуз деп, Мен сизни башха халкъладан айыргъанма.
27Ёлгенлени чакъыргъан неда жинле чакъыргъан эр кишини неда тиширыуну ёлтюрюрге керекди. Аланы ташла бла уруп, ёлтюрюгюз; къанлары кеслерини хаталарынданды».
Currently Selected:
Лебийлиле 20: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
