Лебийлиле 19
19
Сыйлылыкъны бла тюзлюкню юсюнден жорукъла
1Раббий Муссагъа былай айтды:
2– Исраилни жамауатына сёлешип, былай айт:
«Сыйлы болугъуз, нек дегенде, Мен, сизни Раббий Аллахыгъыз, сыйлыма.
3Анагъызгъа бла атагъызгъа сый беригиз, Мени шабат кюнлерими да сыйлы тутугъуз. Мен – сизни Раббий Аллахыгъызма.
4Тейрилеге баш урмагъыз; кесигизге магъадандан тейриле ишлемегиз. Мен – сизни Раббий Аллахыгъызма.
5Раббийге саламатлыкъ къурманны келтиргенде, аны, къабыл болурча, алай союгъуз. 6Къурманны этин, сиз аны кесген кюн эмда экинчи кюн ашаргъа керекди. Ючюнчю кюннге къалгъан этни отда кюйдюрюрге тийиншлиди. 7Биреу аны ючюнчю кюн ашаса, ол къутсузлукъгъа саналыр; къурманы къабыл болмаз. 8Аны ашагъан адам гюняхына жууаплы болур, нек дегенде, ол Раббийни сыйлысын харам этгенди. Ол адам ёз халкъыны арасындан жокъ этилсин.
9Жерингде тирлик оруп жыйгъан заманда, сабанынгы къыйырларын орма, къалгъан машакъланы#19:9 Машакъ – сабанда оруудан сора къалгъан къылкъыла. да жыйма. 10Жюзюм бахчаны битимин да толусунлай алма, жерге тюшген жюзюмлерин да кётюрме. Аланы факъырлагъа бла тыш адамгъа къой. Мен – Раббийме, сизни Аллахыгъыз.
11Урламагъыз.
Алдамагъыз.
Бир биригизге ётюрюк айтмагъыз.
12Мени Атымы айтып, жалгъан ант этмегиз. Аллахыгъызны Атын бедишлик этмегиз. Мен – Раббийме.
13Тенгинги унукъдурма, аны мюлкюн тонама.
Жалчыны хакъын эрттеннге дери тутма.
14Сангыраугъа къаргъыш этме, сокъургъа тыйгъыч салма. Аллахынгдан къоркъгъан эт. Мен – Раббийме.
15Терс хукму этме. Факъыргъа бетсинме, уллугъа да жакъ басма. Нёгеринге керти сюд эт.
16Халкъны арасында тилчи алтакъ болуп, сёз жюрютюп айланма.
Тенгинги жанын къоркъуугъа салма. Мен – Раббийме.
17Къарындашынга жюрегингде къажаулукъ тутма. Тенгинги терслигин ачыкъ айыпла да, аны гюняхына жууаплы болма.
18Халкъынгы адамына дерт жетдирме, ичингде ачыу тутма, алай а тенгинги, кесинги сюйгенинг кибик, сюй. Мен – Раббийме.
19Мени жорукъларымы тут.
Хайыуанынгы, тукъуму башха болгъан хайыуаннга къошма.
Сабанынга эки тюрлю урлукъ сепме.
Эки тюрлю халыдан, жюнден бла гетенден, тигилген кийим кийме.
20Бир адам тиширыу бла жатса, ол тиширыу а къул болуп, башха адам бла сёз тауусуп эсе, алай а азатлыкъгъа сатып алынмагъан болса неда азатлыкъгъа жиберилмеген болса, ол адам азап чегерге керекди, ёлтюрюрге уа жарамайды, нек дегенде, тиширыу азат тюйюлдю. 21Ол терс адам Раббийге терслик ючюн къурманнга Тюбешиу Чатырны эшигини аллына къочхар келтирсин. 22Дин къуллукъчу, къочхарны Раббийни аллында терслик ючюн къурманнга келтирип, этилген гюнях ючюн тазалау этсин да, ол адамны гюняхы кечилир.
23Сиз бу жерге келгенден сора, кёгет терекле орнатсагъыз, аланы кёгетлерин ашаргъа жараулугъа санамагъыз. Юч жылны ичинде кёгетлерин ашамагъыз. 24Тёртюнчю жыл битеу кёгетлери Раббийни махтаууна сыйлы саугъа болсунла. 25Бешинчи жыл кёгетлени ашаргъа эркинсиз. Алай бла, сизни битимлеригиз кёбейирле. Мен – Раббийме, сизни Аллахыгъызма.
26Къаны къалгъан этни ашамагъыз.
Таш салмагъыз, хыйны этмегиз.
27Къулакъ жанларыгъызда чачыгъызны, сакъалыгъызны къыйырларын да кесмегиз.
28Ёлген адам ючюн эт теригизге жара салмагъыз, ийне чанчып бир тюрлю жазыула жазмагъыз. Мен – Раббийме.
29Къызынгы саякълыкъ этерге бошлама, аны бедишлик этме. Болмаса, жер саякълыкъдан толур.
30Мени шабат кюнлерими сыйлы тутугъуз, Мени Сыйлы Жериме да хурмет этигиз. Мен – Раббийме.
31Ёлгенлени чакъыргъанлагъа бармагъыз, жинле чакъыргъанладан да болушлукъ излемегиз. Болмаса, сиз аладан харам болурсуз. Мен – Раббийме, сизни Аллахыгъызма.
32Акъсакъалны аллында тургъан эт, къарт адамгъа сый бер, алай бла Аллахынга да хурмет эт. Мен – Раббийме.
33Тыш адам арагъызда, сизни жеригизде жашаса, анга зулму сынатмагъыз. 34Арагъызда жашаргъа келген тыш адам, кеси адамыгъыз кибик болсун; аны, кесигизни сюйгенигиз кибик, сюйюгюз. Сиз да Мисирде тыш адамла кибик эдигиз. Мен – Раббийме, сизни Аллахыгъызма.
35Терс хукму этмегиз. Ёлчелеуде, ауурлукъда, санауда алдамагъыз. 36Сизни базманыгъыз бла базман ташларыгъыз, эфагъыз бла хинигиз#19:36 Эфа бли хин – ауурлукъну бла объёмну ёлчеулери. тюз болсунла. Мен – Раббийме, сизни Мисирден чыгъаргъан Аллахыгъызма.
37Мени битеу жорукъларымы бла битеу хукмуларымы тутугъуз эм толтуругъуз. Мен – Раббийме».
Currently Selected:
Лебийлиле 19: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
